Bibiriya irasubiza - Recent questions and answers in Ibibazo ku buzima bwa Gikristo

Answered: Inyigisho: Bimwe mu byaha 70 bivugwa cyane mu isezerano rishya no mu buzima bwa Gikristo

Tue, 27 Oct 2026 18:22:14 +0000

Tubanze dusobanure ko bibiliya idatanga urutonde rw'ibyaha, ndetse n'ibyaha bivugwa muri Bibiliya si byo byaha byonyine. Yesu ajya kugenda, yasize adusezeranije ko hari byinshi Mwuka Wera azatubwira, ndetse n'ibyo We atatubwiye. Rero hari ikintu gishobora kuba kitanditse nk'icyaha muri Bibiliya, ariko Mwuka Wera akaguhamiriza ko ari icyaha.

Yohana 16:12-13 “Ndacyafite ibyo kubabwira byinshi, ariko ubu ntimubasha kubyihanganira. [13]Uwo Mwuka w’ukuri naza azabayobora mu kuri kose kuko atazavuga ku bwe, ahubwo ibyo azumva ni byo azavuga, kandi azababwira ibyenda kubaho. [14]Uwo azanyubahiriza, kuko azenda ku byanjye akabibabwira.

Uru rutonde rw'ibyaha 70 ntirugamije guca umurongo ku byaha byose bibaho, nugira icyo utabonamo ntuzavuge ngo uhawe rugari rwo kugikora, ahubwo rugamije kungura ubwenge no kongerera ubumenyi abafite umuhate wo guhunga icyaha, hato hatazagira ugwa mu cyaha akitwaza ko atari azi ko ari icyaha. Ikindi kandi, hano turivugira gusa ibyaha bikunze kuvugwa cyane muri isezerano rishya, bikongera bikanaboneka kenshi mu buzima bwa Gikristo

Zaburi 119:11 "Nabikiye ijambo ryawe mu mutima wanjye, Kugira ngo ntagucumuraho."

Uru rutonde rushobora kwifashishwa mu nyigisho zivuga ku kwihana, kwezwa no kubaha Imana.

TUBIREBERE HAMWE MU BYICIRO BYABYO, N'IMIRONGO YA BIBILIYA: (Kubera ikibazo cy'imisemurire y'ururimi rw'ikinyarwanda, buri jambo twarishyiriyeho uko rivugwa mu gifaranza no mu cyongereza kugirango birusheho gusobanuka. Ikindi ni uko ijambo rimwe rishobora kuvugwa mu buryo butandukanye bitewe na version ya Bibiliya ukoresha)

1. Ibyaha byo mu mutima no mu bitekerezo

Ubwibone / orgueil / pride / — Mariko 7:21-22
Urwango / La haine / Hatred / — 1 Yohana 3:15
Kwifuza nabi / L'envie / Envy / — Abagalatiya 5:26
Ishyari / La jalousie / Jealousy / — Abagalatiya 5:20
Ubugome / La méchanceté / Wickedness / — Abaroma 1:29
Umururumba wo kwifuza ubutunzi / La cupidité / Greed /— Luka 12:15
Irari / La convoitise / Lust / — Abakolosayi 3:5
Ibitekerezo bibi / Les mauvaises pensées / Evil thoughts / — Matayo 15:19
Inzika / La rancune / Resentment / — Abefeso 4:31
Umujinya wo mu mutima / L'amertume / Bitterness /— Abaheburayo 12:15

2. Ibyaha byo mu mvugo

Kubeshya / Le mensonge / Lying / — Abakolosayi 3:9
Gusebanya / La calomnie / Slander / — Abakolosayi 3:8
Kuvuga abandi nabi / La médisance / Gossip and backbiting — Abaroma 1:30
Amagambo ateye isoni / Les paroles obscènes / Obscene language / — Abefeso 5:4
Amagambo atukana (Gutuka uwo mutari kumwe) / Les paroles injurieuses / Abusive speech / — Abakolosayi 3:8
Gushinja ibinyoma / Faux témoignages / False testimony / — Matayo 15:19
Gutukana (Uwo muri kumwe) / Les insultes / Insults / — Matayo 5:22
Amagambo y'impfabusa / Les paroles vaines / Vain words / — Matayo 12:36
Gusingiza abandi ngo ubakureho indamu / Les flatteries trompeuses / Deceptive flattery — Yuda 1:16
Intonganya / Les querelles / Verbal quarrels / — Efeso 4:31

3. Ibyaha by’ubusambanyi no kwiyanduza

Kuryamana n’uwo mutashakanye, akaba yarashatse cyangwa wowe warashatse / L'adultère / Adultery / — Matayo 5:27-28
Ubusambanyi muri rusange / La fornication / Fornication / — 1 Abakorinto 6:18
Ibikorwa by’umwanda mu mibonano mpuzabitsina / L'impureté sexuelle / Sexual impurity / — Abaheburayo 13:4
Iby’isoni nke bisa n'imyifatire y’ubusambanyi / La débauche / Debauchery — Abagalatiya 5:19
Kwiyonona / L'impudicité / Indecency / — Abefeso 5:3
Gukoresha imibiri uburyo bunyuranye n'ubwo yaremewe / Les passions déshonorantes (infames) / Dishonorable passions — Abaroma 1:26
Ubuhehesi no kureba umuntu ukamwifuza mu mutima / Les désirs mauvais / Evil desires / — Abakolosayi 3:5
Ubutinganyi / homosexualité / Homosexuality / -- 1 Abakorinto 6:9, Abaroma 1:27 — Abaroma 1:26-27
Kuryamana n’umuntu mufitanye isano ya hafi / L'inceste / Incest / — 1 Abakorinto 5:1
Kwigisha cyangwa gushora undi mu busambanyi / L'exploitation sexuelle / Sexual exploitation / Ibyahishuwe 2:20

4. Ibyaha by'iraha no kunezeza umubiri n'isi

Ubusinzi / L'ivrognerie / Drunkenness / — Abagalatiya 5:21
Ivutu (kurya birenze urugero) / Les excès de table / Overindulgence in food / — Luka 21:34
Kunywa ibisindisha / Les beuveries / Drinking acohol / — 1 Abatesaloniki 5:6,8
Gukunda ibinezeza aho gukunda Imana / L'amour du plaisir / Love of pleasure — 2 Timoteyo 3:4
Gukunda amafaranga n'iby'isi / L'amour de l'argent / Love of money / — 1 Timoteyo 6:10; 1 Yohana 2:15
Kwikunda no kutazirikana abandi: / L'amour de soi et ne pas considerer les interets des autres / Not considering the interests of others / Abafilipi 2:3-4
Kutanyurwa / L'insatisfaction / Not being content with what you have. / — Abaheburayo 13:5
Kwica gahunda, kudashaka gukora no kuba kazitereyemo / L'oisiveté désordonnée / Live and walk disordely, busybodies / — 2 Abatesalonike 3:11
Kwirata iby'ubu bugingo (ibyo ufite) / L'orgueil lié à ses possessions. / Pride in one's possessions — 1 Yyohana 2:16
Kuba igisonga kibi, gucunga nabi ibyo waragijwe / gaspillage irresponsable des biens confiés / Irresponsible waste of entrusted possessions /— Luka 16:1-2

5. Ibyaha mu mibanire n’abandi bantu

Amakimbirane / Les querelle / Quarreling / Yakobo 3:14
Amacakubiri / Les divisions / Divisions / — Abaroma 16:17
Impaka z’ubupfu zidafite umumaro / Les discussion folle inutilles / Arguments and foolish disputes — 2 Timoteyo 2:23
Uburakari / La colère / Anger / — Abefeso 4:31
Urugomo / La violence / Violence / — Abaroma 1:29-30
Kwanga kubabarira / L'absence de pardon / Unforgiveness / — Matayo 6:14-15
Kwihorera / La vengeance personnelle / Personal vengeance — Abaroma 12:19
Gukandamiza abakene n’abanyantege nke / L'oppression des faibles / Oppression of the weak — Yakobo 5:4-6
Kurobanura ku butoni / Le favoritisme / Favoritism / — Yakobo 2:1-9
Kwiba / Le vol / Thef / — Abefeso 4:28

6. Ibyaha by'imyizerere

Gusenga ibigirwamana / L'idolâtrie / Idolatry / — 1 Abakorinto 10:14
Ubupfumu / La sorcellerie / Sorcery / — Abagalatiya 5:20
Gutuka Imana no kuyivuga nabi / Le blasphème / Blasphemy / — Mariko 3:28-29
Kutizera / L'incrédulité / Unbelief / — Abaheburayo 3:12
Uburyarya mu byo kwizera / L'hypocrisie religieuse / Religious hypocrisy / — Matayo 23:27-28
Kwimura Imana / L'apostasie / Apostasy / — Abaheburayo 3:12
Kutumvira Imana / La désobéissance à Dieu / Disobedience to God / — Abefeso 5:6
Gukunda iby’isi kuruta Imana / L'amour du monde au détriment de Dieu / Love of the world at the expense of love for God / — 1 Yohana 2:15-16
Kugerageza Imana / La tentation de Dieu / Putting God to the test / — 1 Abakorinto 10:9
Kwanga kwihana / Le refus de se repentir / Refusal to repent / — Ibyahishuwe 2:21

7. Ibyaha by’ubutabera n’imyitwarire ikwiriye Umukristo

Kurenganya / L'injustice / Unrighteousness (Injustice) — 1 Abakorinto 6:9
Kunyaga iby'abandi / Les ravisseurs / / Extortioning— 1 Abakorinto 6:10
Ubwambuzi bushukana / L'escroquerie / Fraud and swindling / — 1 Abakorinto 6:10
Kwica umuntu / Le meurtre / Murder / — Matayo 15:19
Kutumvira ababyeyi / La désobéissance aux parents / Disobedience to parent — Abaroma 1:30
Kuba indashima / L'ingratitude / Ingratitude / — 2 Timoteyo 3:2
Kugambanira abandi / La trahison / — 2 Timoteyo 3:4
Kwirarira, kwirata, kwiyemera / La présomption / Recklessness and arrogance / — 2 Timoteyo 3:2
Kuba uzi gukora neza ntubikore / Le refus de pratiquer le bien que l'on sait devoir faire / Refusing to do good if you know to do it. — Yakobo 4:17
Kwima abakozi ibihembo byabo / Priver les travailleurs de leur salaire / Denying workers their rightful pay. / — Yakobo 5:4

Icyo dukwiriye kuzirikana:

Bibiliya ntitwereka ibigize ibyaha kugira ngo tujye duciraho abandi imanza, ahubwo ibitwereka kugirango ubwacu twisuzume, kuko Bibiliya ni indorerwamo ntabwo ari retroviseur, kandi akamaro k'indorerwamo twese turakazi.

“Ngaho nimwisuzume ubwanyu, mumenye yuko mukiri mu byo twizera kandi mwigerageze. Mbese ntimwimenya kandi ntimuzi yuko Yesu Kristo ari muri mwe? Keretse ahari mubaye abagawa.” — 2 Abakorinto 13:5

Icyo ugomba gukora igihe wibonyeho icyaha runaka:

1. Kwihana: Imana ihamagarira umunyabyaha kureka inzira ze mbi akayigarukira. Ibyakozwe n’Intumwa 3:19

2. Kubabarirwa: Iyo twatuye ibyaha byacu, Imana ni iyo kwizerwa kandi irakiranuka, ikatubabarira ibyaha byacu ikatwezaho gukiranirwa kose. 1 Yohana 1:9

Icyitonderwa cya nyuma

Uru rutonde ni incamacye y'ibyaha n’imyitwarire mibi bikunze kugaragara mu bizera, ntabwo ari urutonde rw'ibyaha byose bibaho. Ukuri guhari ni uko ibyaha byose bibaho biramutse bishyizwe ku rutonde, sinzi uko urwo rutonde rwaba rureshya.

N.B: Twabiteguye twifashishije inyigisho ya Pastor Moise K.

By. Ev. Innocent Munayneza

Answered: Ibimenyetso 30 byuko ukuze mu mwuka

Fri, 23 Oct 2026 20:52:42 +0000

Mu nyigisho mperuka gutanga ytwa "Inzego 7 z'umunyamasengesho" hari aho nageze ku rwego rwa 6 mvuga yuko muri uru rwego umuntu ashyira hasi ibyo kuba umwana mu Mwuka, akareka kunywa amata y'abana agatangira kuguguna amagufwa nk'abantu bakuru. Aho ni ho bamwe bambajije uko wamenye umukristo w'umwana mu Mwuka n'ukuze mu Mwuka, bintera gutegura iyi article.

Umukristo wese aho ava akagera, arangwa no gukura akava ku rwego rumwe akajye ku rundi, si ugukura mu mubiri gusa, ahubwo ni mu Mwuka. Ibi rwose ni ihame rishingiye kuri Bibiliya, ndetse Pawulo hari ahantu yigeze gutangazwa no kubona Abaheburayo basa n'abagwingiye, bakaguma bameze nk'abana bo kuramizwa amata kandi bakagombye kuba bageze nko ku rwego rwo kuba abigisha.

Abaheburayo 5:12-14

« [12] Kandi nubwo mwari mukwiriye kuba abigisha ubu kuko mumaze igihe kirekire mwiga, dore musigaye mukwiriye kongera kwigishwa namwe iby’ishingiro rya mbere ry’ibyavuzwe n’Imana, kandi mwahindutse abakwiriye kuramizwa amata aho kugaburirwa ibyokurya bikomeye,» [13] kuko unywa amata aba ataraca akenge mu by’ijambo ryo gukiranuka kuko akiri uruhinja, [13] ariko ibyokurya bikomeye ni iby’abakuru bafite ubwenge, kandi bamenyereye gutandukanya ikibi n’icyiza.

Noneho umuntu yakwibaza ati "N iki kigaragaza umuntu ukuze mu Mwuka? cyangwa nabwirwa n'iki niba nanjye nkuze mu Mwuka cyangwa naragwingiye?

Hari ibimenyetso 30 by'ingenzi bigaragaza Umukristo ukuze mu Mwuka, ariko mbere yo kubivuga reka tuvuge ko gukura mu Mwuka:

- Ntaho bihuriye n'imyaka umaze mu rusengero

- Ntaho bihuriye n'imirimo cyangwa inshingano ufite mu rusengero

- Ntaho bihuriye n'imyaka y'ubukure, amashuri cyangwa ubundi bumenyi

- Ntaho bihuriye n'ubwinshi bw'ibyanditswe waba uzi

Ahubwo bigaragarira cyane cyane mu mibereho yawe, uko witwara mu bibazo, uko ubabarira abandi n’uko wumvira Imana. Twakusanyije ibimenyetso bigera kuri 30 bigaragaza umukristo ukuze mu Mwuka. Iyo ntabwo ari liste twaciyeho umurongo nkaho nta kindi cyakwiyongeraho, ariko muri rusange iyo ubifite uba uri umukristo ukuze mu Mwuka.

1. Gukunda Bibiliya, kumva no kumvira Imana n’iyo nta muntu ukureba.

Gukura mu mwuka bituma ushyira imbere Ijambo ryayo, ugakunda gusoma Bibiliya nta gahato, ugakunda kumvira Imana no kuyubaha, ahantu hose no mu bihe byose, utitaye ku kuntu abandi bakubona nuramuka uyumviye. --- Zaburi 119:105; 1 Samuel 15:22 ; Gutegeka kwa kabiri 28:1-2 ; Yohana 14:21

2. Ntukubitisha abandi impano wahawe cyangwa ngo ubakange.

Iyo ukuze mu Mwuka, ntukangisha impano wahawe ngo uyikoreshe mu kwemeza abandi ko uri umunyamwuka kubarusha. Usobanukirwa ko iyo mpano ari inzira Imana igucishamo gusa, ngo igirire neza abantu bayo, iyo wayihawe ntuyikoresha ngo wemeze abandi ko ubarenze. Ntuvuga mu ndimi igihe kitari icyo kuvuga mu ndimi, ntuhanura igihe kitari icyo guhanura, mbese umenya neza ko "umwuka w'abahanuzi ugengwa na bo" -- 1 Abakorinto 14:32; 1 Abakorinto 12:7; 1 Abakorinto 4:7

3. Ntuhora ushaka gushimwa n’abantu kurusha gushaka gushimwa n'Imana.

Umukristo ukuze mu Mwuka aba azi ko agaciro ke gashingiye ku gushimwa n'Imana, aho gushimishwa no gukomerwa amashyi no gushimwa n’abantu. Byumvikane ko gushimwa n'abantu atari bibi, ariko kwifuza gukomerwa amashyi utanarebye icyo Imana ikuvugaho na byo si byo— Abagalatiya 1:10.

4. Ntutera Imana umugongo kubera ko unyuze mu bigeragezo.

Ukwizera kwawe ntigushingira gusa ku bihe byiza urimo. N’iyo wahura n'ikome ry'ibikugerageza, ukomeza kwizera Imana. — 2 Abakorinto 6:9-10; 1 Petero 4:12-13

5. Ushaka kubana n’Imana kuruta gushaka imigisha yayo gusa.

Iyo ukuze mu Mwuka, ushaka Imana ubwayo kuruta imigisha iguha, kuruta ubutunzi n’indi migisha ishobora guturuka kuri Yo. Ushyira imbere Utanga kuruta ibyo atanga. -- Yohana 6:26-27; Matayo 6:33; Habakuki 3:17-18; Kuva 33:15; Abafilipi 3:8;

6. Kwicisha bugufi

Iyo ugeze ku ntsinzi, ntiwibagirwa Imana yaguhaye imbaraga n’ubushobozi bwo kugera aho ugeze. Ntanubwo utekereza ko abandi hari icyo bazira kuba bataragera aho ugeze. Ntunatekereza ko abataragera aho uri badakwiye kubahwa — Gutegeka kwa Kabiri 8:17-18; Yakobo 4:6; Abafilipi 2:3

7. Gukunda amahoro, kwanga guteza amakimbirane n'abandi.

Uharanira kubaho mu mahoro no kubana amahoro n'abantu bose uko bishoboka kose, aho gushaka guhora mu ntonganya no mu mpaka. — Abaroma 12:18.

8. Uzi gutandukanya amahirwe n’ibikurangaza, no kwirinda ibidafite icyo bikumariye

Usobanukirwa ko muri iyi si hari ibintu byinshi bidafite icyo bikumariye, bidafite icyo bikongerera kabone n'iyo nta cyo bikugabanyiriza. Nta nyongeragaciro bikuzanira, kabone n'iyo byaba atari icyaha, mwene ibi bintu witoza kubyirinda. Umenya ko atari buri kintu cyose ushobora gukora kiba ari ingirakamaro cyangwa kigufitiye akamaro mu buryo bw’umwuka. — 1 Abakorinto 10:23.

9. Uharanira kurinda ubuzima bwawe bw’umwuka.

Witondera ibyo ureba, ibyo wumva, abo usabana na bo n’ibyo wemera kwinjiza mu mutima wawe, urinda umutima wawe kuruta ibindi byose. — Imigani 4:23.

10. Ubuzima bwa wenyine bwubahisha Imana n'iyo ntawe ukureba.

Ukwizera kwawe ntigushingira ku kuba uhora uri kumwe n’abandi. N’iyo nta muntu waba uri hafi yawe, ukomeza kugirana na we ubusabane. Ntusenga kuko uri kumwe n'abandi, ntusoma Bibiliya kuko uri kumwe n'abandi.... ubuzima bwa wenyine bugaragaza urwego witaye ku by'Imana. Zaburi 63:7; Matayo 6:6; Mariko 1:35

11. Uzi gutegeka ururimi rwawe.

Iyo ukuze mu Mwuka ntuba ugikeneye gusubiza buri wese ugusembuye. Wiga gutega amatwi no gutuza mbere yo kugira icyo uvuga, ubasha kugenga ururimi rwawe. Ntuganzwa no kugira icyo uhita uvuga utabanje kugitekerezaho. Ubanza gutega amatwi no gusuzuma ibyo wumvise. — Yakobo 1:19. ; Imigani 13:3.

12. Uzi kwemera amakosa yawe.

Umukristo ukuze mu mwuka ntahora ashaka kwisobanura cyangwa kwerekana ko atajya akora amakosa. — Imigani 28:13.

13. Urababarira aho gushaka kwihorera.

Umukriso ukuze mu Mwuka ntatekereza kwirwanirira no kwihorera. Areka Imana ikaba ari yo ica imanza mu butabera bwayo, kandi agahitamo kubabarira no kutagumana inzika mu mutima we. — Abefeso 4:32.

14. Ubasha gutandukanya ibiva ku Mana n’ibidaturuka kuri Yo.

Umukristo ukuze mu Mwuka ntiyasama ngo amire bunguri buri kintu cyose yumvise. Amenya kugenzura ibyo yigishwa kugira ngo amenye niba bihuje n’ukuri kw’Imana. — 1 Yohana 4:1 ; Ibyakozwe n'intumwa 17:10-11

15. Uzi kuvuga OYA aho biri ngombwa.

Habaho abantu benshi bagorwa no kuvuga OYA. Ntabwo buri busabe bwose ariko bukwiriye Yego. Aho biri ngombwa, umukristo ukuze mu Mwuka ntatinya kuvuga "Oya". Umukristo ukuze mu Mwuka abigaragariza mu kwifata no kurwanya ibyifuzo n'ibintu byose byamushyira mu kaga ko gukora icyaha. Ntava mu byaha gusa, ahubwo ava no mu bidatunganye. — 2 Timoteyo 2:19.

16. Wemera gukosorwa no kugirwa inama.

Iyo ukuze mu Mwuka wemera ko guhugurwa no gukosorwa bishobora kugufasha guhinduka no gukura mu bwenge no mu kwizera. — Imigani 12:1.

17. Ushobora kwishimira ibyiza abandi bagezeho.

Iyo ukuze mu mwuka, witandukanya n’ishyari cyangwa kwigereranya n’abandi, ahubwo ukishimana n’abishimye. — Abaroma 12:15.

18. Wiga gutegereza igihe cy’Imana.

Iyo ukuze mu Mwuka ntuhatiriza ibintu byose ngo bibe ako kanya uko ubyifuza no mu gihe ubyifuzamo. Wiga kwihangana no kwizera ko Imana ifite igihe cyayo cyagenwe. — Zaburi 27:14; Yesaya 60:22

19. Usenga n’iyo utabishaka kubera uko wiyumva.

Iyo ukuze mu Mwuka, usabana n’Imana bidatewe n’amarangamutima yawe gusa. Ukomeza gusenga no mu gihe udashaka gusenga. — 1 Abatesalonike 5:17.

20. Uzi kubika ibanga umuntu yakubikije.

Umenya ko atari amakuru yose ugomba gusakaza. Wubaha icyizere abandi bakugirira. — Imigani 11:13.

21. Uzi gutandukanya igihe cyo kuvuga n’igihe cyo guceceka.

Umenya ko hari igihe cyo kuvuga n’igihe cyo guceceka, kandi ko ubwenge ari ukumenya igihe gikwiye kuri buri kimwe mu mwanya wacyo. — Umubwiriza 3:7.

22. Ntucira abandi imanza uhubutse.

Wiga kureba abandi ubigiranye imbabazi, ubutabera n’ukuri, aho guhita ubacira urubanza utabanje gusobanukirwa neza. — Matayo 7:1-5.

23. Gukorera abandi utarwanira imyanya y’icyubahiro.

Witoza gukorera abandi, no kubagirira neza, kuko Yesu yerekanye ko gukomera nyakuri bitagaragarira mu gutegeka abandi, ahubwo bigaragarira mu kubakorera. — Mariko 10:43-45.

24. Urukundo.

Urukundo ni ingangagaciro ya mbere ku mukristo ukuze mu Mwuka. Urakunda kugeza aho ubasha no gukunda abatagukunda. Urukundo rwa gikristo ntirugarukira ku bantu mwemeranya muri byose. Ushobora gukomeza gukunda umuntu n’iyo mwaba mutabona ibintu kimwe. — Yohana 13:34-35; 1 Abakorinto 13:1

25. Ntuhora ushaka kwemeza abantu no kugaragaza ko ari wowe ufite ukuri.

Hari igihe uhitamo amahoro aho gutsinda impaka. Usobanukirwa ko gutsinda impaka atari ko buri gihe bisobanura gutsinda mu buryo bw’umwuka. -- Imigani 17:14; 2 Timoteyo 2:23; Imigani 20:3

26. Uzi gutahura hakiri kare abantu cyangwa ibintu bishobora kuguca intege.

Umenya guhitamo abo muba inshuti, ukamenya ko imibanire imwe n’imwe ishobora kwangiza ingeso nziza no kugabanya imbaraga zawe mu by’umwuka. — 1 Abakorinto 15:33.

27. Ukomeza kuba umwizerwa n’iyo nta muntu ugushimira.

Ubwizerwa bwawe ntibushingira ku kuba abantu bakubona, bagushima cyangwa baguha icyubahiro. Ukora ibikwiriye n’iyo nta muntu ubimenya ngo agushime. Yohana 5:44

28. Wemera ibihe Imana ikoresha kugira ngo ikugire umuntu ukuze mu Mwuka.

Umenya kandi ugasobanukirwa ko hari igihe Imana igukoreramo umurimo mu bihe, mu buryo no mu bintu abandi badasobanukirwa, cyangwa nawe ubwawe ntubisobanukirwe, byose ku bw'icyubahiro cy'Imana n'impamvu zayo. Kutumva igisubizo cy’Imana ako kanya ntibisobanura ko itari kumwe nawe. Ntigishwa impaka. Yobu 33:13

29. Imbuto z’Umwuka Wera.

Urukundo, umunezero, amahoro, kwihangana, kugira neza, ingeso nziza, gukiranuka, kugwa neza no kwirinda bigenda birushaho kugaragara mu mibereho yawe. — Abagalatiya 5:22-23.

30. Uva mu bwiza ujya mu bundi, ugenda urushaho gusa na Kristo

Iyi ni yo ntego ikomeye yo gukura mu mwuka: Si ukumenya Yesu gusa, ahubwo ni uguhindurwa kugira ngo urusheho gusa na We mu mico, mu myifatire no mu mibereho yawe. — 2 Abakorinto 3:18; Abaroma 8:29.

UMWANZURO

Gukura mu mwuka si ukuba umuntu utagikora amakosa cyangwa utagihura n’ibigeragezo. Ahubwo ni ugukomeza guhinduka, ukiga kumvira Imana, gukunda abandi, kwicisha bugufi no kwera imbuto zigaragaza imico ya Kristo.

Ibaze uti: Ese uko iminsi ishira, ndushaho gusa na Kristo, cyangwa ndushaho kumumenya mu magambo gusa no kumumenyera?

Kumenya Imana ni byiza, ariko ukwizera gukura ni ukwizera kugaragarira mu mibereho ya buri munsi. Ikindi kandi, ibyo byose uko ari 30 ntibizira rimwe. Uyu munsi ushobora gusanga wujuje 10 ukaba ugifite ibindi ukirwana na byo, ariko nyine ni cyo bita gukura, ibindi ugenda ubishobora hamwe n'igihe.

Uwiteka akomeze atugirire neza.

Ev. Innocent Munyaneza

Answered: Kuki Yesu yavumye igiti cy'umutini kuko atakibonyeho imbuto kandi bitari igihe cyawo cyo kwera imbuto?

Mon, 19 Oct 2026 18:47:26 +0000

Iki ni ikibazo cyiza pe! Umuntu wesee yacyibaza *Kuki Yesu yavumye umutini kuko awubuzeho imbuto, kandi kitari igihe cyawo cyo kwera imbuto?*

Mu rwanda nta biti by'umutini bihaba, ariko ababizi aho biba hari icyo babiziho:

Umutini, ni igiti kigira igihe cyo kwera nk'ibindi biti by'imbuto byose. Gusa umutini hari umwihariko ufite: Iyo atari igihe cyo kwera, igiti cy'umutini gitakaza amababi yacyo, gusa bijya bibaho ko igiti cy'umutini kigarura amababi mbere ya saison, kandi icyo gihe amababi azira kimwe n'imbuto za mbere y'igihe. Icyo gihe iyo ubonye amababi ku mutini, automatically uhita umenya ko hariho imbuto, n'iyo byaba atari muri saison yo kwera.

IKIBAZO RERO: Dore uko icyanditswe kibivuga:

Umurongo wa Bibiliya: Mariko 11:13

« Areba kure abona umutini uriho ibibabi, arawegera ngo ahari yawubonaho imbuto. Nyamara awugezeho ntiyagira icyo abona keretse ibibabi, kuko kitāri igihe cyo kwera kw'imitini."»

IKIBAZO: Uyu mutini wari ufite amababi. Uwurebeye kure warayabonaga. Ibi byatangaga ikizere ko nuwegera uwubonaho imbuto! Ariko nta mbuto❌. Ibi birutwa n'iyo utirirwa uzana amababi!

Iki kibazo gifite ubusobanuro bubiri bw'ukuri:

1) Umutini urebera kure ukawubonaho amababi, wawegera ukawuburaho imbuto, ni nk'umukristo urebera kure ukamubonaho ubukristo, ariko wamwegera ukamuburaho imbuto. N'ubwo kitari igihe cyo kwera, uyu mutindi wari ufite ibibabi, bisobanuye ko wanagomba kuba ufite imbuto‍♀️. Umukristo nta gihe cy'imbuto agira! Ahora atoshye, kandi iyo atoshye aba afite imbuto, igihe cyose.

Umukristo agomba kurangwaho imbuti, byaba mu gihe gikwiriye no mu kidakwiriye.

Izi mbuto Bibiliya izigaragara mu Bagalatiya 5:22

2) Igisobanuro cya kabiri, mu gihe cya Yesu umutini wasobanuraga igihugu cya Isirayeli:

Hoseya 9:10 “Mu gihe nabonaga Isirayeli yari ameze nk'inzabibu zo mu kidaturwa, ba sogokuruza nababonye bameze nk'imbuto z'umutini muto z'umwimambere, ariko bagiye i Bāli y'i Pewori biyegurira ibiteye isoni, baba babi bikabije nk'ikigirwamana bakunze."

Yesu yasanze Isirayeli, cyane cyane abatware n'abayobozi, ari abantu bagaragara inyuma nk'abamenetse imitima, ariko imbere barashize. Ibi yarabibabwiraga ku mugaragaro adaciye inyuma.

Mt 15:8 ‘Ubu bwoko bunshimisha iminwa, ariko imitima yabo imba kure'.

Ibyo bisobanuro byombi ni byo, kandi Yesu yashakaga kubisobanura akoresheje umutini.

Imana idufashe twere imbuto, "in season and out of season." Ni ukwera imbuto igihe ari agihe cyo kwera imbuto, kandi tukera imbuto n'igihe bigoye kwera imbuto.

Umurongo wa Bibiliya: 2 Tim 4:2

«Ubwirize abantu ijambo ry'Imana ugire umwete mu gihe kigukwiriye no mu kitagukwiriye, uhane, uteshe, uhugure ufite kwihangana kose no kwigisha»

Uwo murongo ndawukunda mu cyongereza: "(Preach the word; be instant in season and out of season; reprove, rebuke, exhort with all longsuffering and doctrine.")

Imana irahari kugirango ibidufashemo.

By Ev. Innocent Munyaneza

Answered: Inyigisho: Inzego 7 z'umunyamasengesho

Sun, 04 Oct 2026 18:23:46 +0000

Iyo umuntu amaze gukizwa, atangira ubuzima bushya aho asabwa gusabana n'Imana mu buryo buhoraho biciye mu masengesho. Umuntu ukijijwe uyu munsi ntiwakwitega ko ahita atangira gusenga nk'ubimazemo imyaka yo kurwana intambara zo mu buryo bw'Umwuka.

Bibililiya ivuga neza ko igihe cyo kuba umwana mu by'Imana kibaho, ariko nta wakwishimira gukomeza kunywa amata y'impinja, umukristo wese agomba gukura akagera aho arya ibiryo bikomeye by'abantu bakuru.

Umurongo wa Bibiliya: Abaheburayo 5:12-14

« [12]Kandi nubwo mwari mukwiriye kuba abigisha ubu kuko mumaze igihe kirekire mwiga, dore musigaye mukwiriye kongera kwigishwa namwe iby’ishingiro rya mbere ry’ibyavuzwe n’Imana, kandi mwahindutse abakwiriye kuramizwa amata aho kugaburirwa ibyokurya bikomeye, [13] kuko unywa amata aba ataraca akenge mu by’ijambo ryo gukiranuka kuko akiri uruhinja, [14] ariko ibyokurya bikomeye ni iby’abakuru bafite ubwenge, kandi bamenyereye gutandukanya ikibi n’icyiza.»

Nusoma, uraza gutangazwa no kubona ko igice kinini cy'abizera baguma ku rwego rwa 3, mu nzego zirindwi ! Wowe uherereye he? Tudatinze, reka turebe inzego 7: (Bimwe turabirekera mu ndimi z'amahanga kubera kubura ikinyarwanda cyiza gihamyamo, ariko turabisobanura neza)

1. Urwego rwa mbere: THE PANIC. (Ntabara)

HELP! Mana ntabara! Iki ni ikiciro twese twisangamo, cyangwa twigeze kwisangamo! ni hahandi Umukristo asenga kuko yugarijwe gusa! Iyo amakuba aje, ibyago bikaba byugarije, ibibazo bikomanga.... ukaba ari bwo wibuka gusenga! Muri iki cyiciro, Umukristo asenga kubera ibihe no kubera impamvu! (For a season and for a reason). Umukristo uri hano, iyo urusengero rwe rutatangaje amasengesho biragoye kubona yapanze amasengesho ye bwite. Hari abibuka kujya mu macyesha ku munsi wo gusoza umwaka gusa (31/12), ubundi ntumubaze ikitwa amakesha! Hari abibuka ko kwiyiriza bibaho iyo bugarijwe n'ibibazo, abandi bakabyibuka kubera ubwoba bw'ibyo babona bibategereje imbere! Aba baba banafite ibyanditswe bibarengera bitwaza, ko nibatabaza Imana ibatabara, kandi koko nta n'uwatinyuka ngo avuge ko Imana itabumva, ariko ibikwiriye buri mukristo ni ugutera intambwe akarenga iki cyiciro! Imana si umuntu, abari muri iki cyiciro rwose ntimugire ngo twabaciye intege, irabumva rwose, gusa icyo tubasaba ni ugutera intambwe mukisanga mu cyiciro gikurikiyeho.

2. Urwego rwa kabiri: THE CHECK LIST. ( Urutonde)

Iyo urenze urwego rwa mbere ugatera intambwe, ukagera aho utangira gusenga udatabaza gusa, akenshi wisanga ahantu utangira gusenga witwaje urutonde rw'ibyo uri busengere! Ushobora kuba utabyanditse ku rupapuro, ariko ku mutima uba uvuga uti "uyu munsi ndajya imbere y'Imana, kandi ndasengera ibi bintu: a, b, c ...". Ndetse akenshi iyo usoje gusenga, wibaza niba ntacyo wibagiwe! Si icyaha rwose si n'ikose kujya imbere yImana ufite ibyo uri busengere, ariko gutinda muri iki cyiciro bigaragaza urwego rw'ubusabane na Mwuka Wera uba uriho. Nusoma inzego zikurikiraho, uraza gusanga bidatangaje ko wakora urutonde rw'ibyo uri busengere, bikarangira unasengeye ibihabanye na byo!

3. Urwego rwa gatatu: INTERCESSION. (Kwingingira abandi)

Aha ni ahantu umukristo atangira kutirebaho gusa, akababazwa n'ibiri ku bandi kandi bikamubera umutwaro, ku buryo abigira icyifuza akakizana mu masengesho ye bwite. Abo asengera akenshi ntibanamenya ko hari umuntu urimo kubingingira. Aha ni ho hatangira gukoreshwa ijambo "Umwinginzi". Kuri uru rwego rwose Umukristo aba ageze ahantu heza, kandi aba arimo gushyira mu bikorwa ibyo Bibiliya idusaba:

Umurongo wa Bibiliya: Abafilipi 2:4

« Umuntu wese muri mwe areke kwizirikana ubwe gusa, ahubwo azirikane n’abandi.»

1 Abakorinto 10:24

« Ntihakagire umuntu wizirikana ubwe, ahubwo azirikane na mugenzi we.»

Uko twicuma mu nzego, bigenda birushaho gukomera: Ni umwanya wo kwisuzuma: Ni kangahe ufata amasengesho yo kwingingira abandi? Ni kangahe wibuka gusengera abo uzi n'abo utazi batanaguhaye icyifuzo cyo kubasengera? Imana idufashe, kuko uru rwego usanga abizera benshi bigumira aha, kandi bakumva birabanyuze, gusa Imana iba ibategereje no gutera indi ntambwe.

4. Urwego rwa kane: THE DIALOGUE. ( Ikiganiro )

Kuri uru rwego ibiryo biba byatangiye gukomera! Uwahoze anywa amata y'abana noneho aba atangiye kurya imyumbati! Gusa nanone aba ataratangira kuguguna amagufa no kuyahekenya! Gusa igitangaje ni uko Abizera benshi uzasanga badashishikajwe no kugera hano kandi ari ingenzi cyane kuri buri wese.

Uru ni urwego rw'ikiganiro n'Imana. Umwinginzi wageze hano, aba abasha gusenga abwira Imana, ariko akaba anashobora kumva icyo Imana imusubiza. Amasengesho arenga kuba "Monologue" (Kwivugisha) agahinduka "Dialogue" (kuba ufite uwo muvugana). Ni kenshi uzasanga Umukristo yibaza uko Imana ivuga, nyamara mwaganira akaguhamiriza ko ivuga! Biravuguruzanya, kandi Imana ntinezezwa no kuba tutabasha kuyumva ivuga. Bibabaza Imana kuba yavuga ntiwumve, cyangwa ukayibeshyera ngo yavuze kandi itavuze. Inyigisho izakurikira iyi iravuga iti "Uburyo 7 Imana ivugamo", ntizagucike. Umunyamasengesho wese ahamagarirwa kugera kuri uru rwego, ibi bizafasha benshi kutiruka mu bahanuzi babaza icyo Imana ibavugaho, aho ninaho havuka ubuhanuzi bupfuye n'inyigisho z'ibinyoma. Gusenga no gusaba ni byiza, ariko se wamenya ute niba Imana yagusubije ukanamenya icyo yagusubije?

Umurongo wa Bibiliya: Yohana 10:27

« Intama zanjye zumva ijwi ryanjye, nanjye ndazizi kandi zirankurikira.»

Kwisuzuma: Ese ujya ubasha kuganira n'Imana? Ujya uyumva ivuga? Urayibaza ikagusubiza? Mugirana ikiganiro?

5. Urwego rwa gatanu: THE AUTHORITY. ( Ubutware )

Kuri uru rwego, noneho umwinginzi aba yatangiye kuguguna amagufa! Gusa aba atarayahekenya ngo ayaturitse! Uru ni urwego aho umuseenzi amenya neza adashidikanya imbaraga n'ubutware afite hejuru y'imbaraga z'umwijima. Hano, umunyamasengesho atangira kumenya ko kwirukana abadayimoni bitahawe abashumba bamwe, arekera aho gutinya abarozi n'abapfumu, atangira kwizera ko uri muri we akomeye kurusha uri mu banzi be, atangira kugendana ubutware bw'umwana, ntiyongera gutinya umurimbuzi wa nijoro, abagaragu ntibongera kurya ibye abareba. POWER.

Kuri uru rwego, umunyamasengesho yizera adashidikanya iki cyanditswe:

Umurongo wa Bibiliya: Mariko 16:17-18

« [16] Kandi ibimenyetso bizagumana n’abizera ngibi: bazirukana abadayimoni mu izina ryanjye, bazavuga indimi nshya, [17] bazafata inzoka, kandi nibanywa ikintu cyica nta cyo kizabatwara na hato, bazarambika ibiganza ku barwayi bakire.»

Kwisuzuma: Ese kuva wakizwa wari wirukanaho idayimoni nibura rimwe? Ese basi wiyumvamo ubutware n'ububasha bwo kuba wayirukana ikagenda? Imana idufashe

6. Urwego rwa gatandatu: THE DISAPPERANCE (Kubura)

Ahahaha.... Noneho ibyo ngiye kuvuga kuri uru rwego Uwiteka ambe hafi hatagira untera amabuye! Kuri uru rwego birenga kuba ibikomeye bigahinduka ibisharira. Munyihanganire biransaba gukoresha amagambo akomeye. Uru ni urwego aho umunyamasengesho yitegura ko byose bishoboka! Iyo umuntu akiri umwana, aba yibwira ngo "Imana ntiyakwemera ko ibi cyangwa biriya bimbaho!" (Abo byabayeho se nuko Imana ibanga? Nuko yabaretse se? Nuko bitwaye nabi se? ....) Umuntu ukiri umwana yibwira ko ibikomeye bigera ku muntu runaka kubera ibyaha bye cyangwa imyitwarire runaka.... Umunyanyamasengesho wageze ku rwego rwa 6, aba azi neza ko igisubizo cy'Imana gishobora kuba OYA itsindagiye, cyangwa na OYA ntiyiguhe, ikagucecekana bikakuyobera, kandi agakomeza urugendo atarakaye cyangwa ngo acike intege. Kuri uru rwego, umunyamasengesho ahishurirwa ko muri uru rugendo, ikintu cyonyine Imana itashyigikira ni icyaha gusa, ibindi byose yakwemera ko bitugeraho kubera impamvu zayo nziza n'urukundo idufitiye, kuko inzira zayo zitandukanye n'izacu nk'isi n'ijuru! Kuri uru rwego, umunyamasengesho amenya neza ko Imana yakwemera ko ibyago n'amakuba bimugeraho, yanemera ko imyambi n'amacumu bimuhinguranya, kandi agakomeza urugendo avirirana inzira yose ariko agakomeza urugendo atarakaye cyangwa ngo yinube.

Muri uru rwego, umunyamasengesho arenga ibyo dukunze kwita "Ubutesi bwo mu Mwuka", ibyanditswe byera bimwe na bimwe ababisoma nabi bakabona bitarimo kumukorera, na we akabibona nkaho bidakora, agacuruza agahomba kandi Bibiliya ubusanzwe ivuga ko Imana izaha umugisha ibyo dukora, agakora ikizamini akaba uwa nyuma kandi ubusanzwe Bibiliya itwizeza ko tuzahora turi imitwe ntitube imirizo, akarwaza abana kandi ubusanzwe Bibiliya ivuga ko Imana izakura indwara z'Abanyegiputa muri twe, agapfusha, akarekwa, agahemukirwa, isi n'ijuru bikamuheza hagati akayoberwa aho aherereye, ariko igitangaje, ibyo byose bikamera nk'ibikubita ku rutare, aho guhunga Imana akarushaho kuyegera, agakomeza urugendo arira cyangwa acumbagira ariko agakomeza! Ababibonera hanze babona iryo kome ry'umuriro bakabona yaragushije ishyano, ariko we yibuka uko Petero yabivuze:

1 Pet 4:12-13 "Bakundwa, mwe gutangazwa n'ikome ryo kubagerageza riri hagati yanyu ngo mumere nk'abagushije ishyano. [13]Ahubwo munezezwe n'uko mufatanije imibabaro ya Kristo, kugira ngo muzanezerwe mwishima bihebuje, ubwo ubwiza bwe buzahishurwa."

Kuri uru rwego, umunyamasengesho abasha kuvuga yemye ati "Imana ibasha kunkiza, ariko n'aho itankiza.....". Kuri uru rwego, abasha kuvuga nka Yesu ati:

Luka 2:42

« Data, nubishaka undenze iki gikombe, ariko bye kuba uko nshaka, ahubwo bibe uko ushaka.»

Icyo ni cyo bamwe bita "umubatizo w'umuriro". Yego ni byo, habaho umubatizo w'umuriro wo kubatizwa mu Mwuka, ariko hanabaho umubatizo w'umuriro utwika ibidatunganye, tukawusohokamo tumeze nk'izahabu itunganijwe, twiteguye gukorera Imana mu yindi level. Abakozi b'Imana benshi, benshi pe, hafi ya bose, mu buryo bumwe cyangwa ubundi bacishijwe muri uru rwego rwa 6. Hari uwo nzi hano mu Rwanda uzwi na bose, namwumvise we ubwe yitangira ubuhamya, yigezege gupfusha umwana, mu gahinda kenshi abaza Imana ati "Mana wari uri he ubwo umwana wanjye yapfaga?" Imana yahise imubaza iti "ko utigeze umbaza aho nari ndi igihe uwanjye yapfaga? Aho nari ndi igihe uwanjye yapfiraga ku musaraba ku manywa y'ihangu, ninaho nari ndi igihe uwawe yapfaga!"

Ni byo rwose, ijya ibyemera! Muri uru rwego rwa 6, umunyamasengesho amenya neza ko Imana itigeze idusezeranya ko tutazigera duca mu muriro, gusa yadusezeranije ko niduca mu muriro izaba iri kumwe natwe! Ntiyigeze idusezeranya ko tutazaca mu mazi, icyakoze yadusezeranije ko niduca mu mazi atazadutembana! Ntiyigeze itubwira ko amakuba n'ibyago bitazaza, ndetse ahubwo yatubwiye ko bizaza ari byinshi, ariko yadusezeranije ko izadukiza muri byose! Pawulo yazuraga n'abapfuye, nyamara yari afite igishakwe cyo mu mubiri yananiwe kwikiza! Yaninginze Imana gatatu kose ngo ikimukize, ariko Imana yaramusubije iti "Ubuntu bwanjye buraguhagije". Ni ko bimeze: Muri uyu muriro wo kugotwa, uyu munyamasengesho asengera iby'abandi bigasubizwa, ariko ibye ukagirango ntawe ubyitayeho!

Icyo rero ni cyo twita KUBURA! Urimo guca muri ibi, abamurebera hanze ntibabasha kwiyumvisha uko abyikuramo! ariko we aba azi ibanga: Si we uriho, ni Kristo muri we! Aba abizi ko nta kibaho cyamutandukanya n'urukundo rwa Kristo. Arabura neza, ku buryo iby'isi iyo bimurebye bimubona nk'ubambwe!

Gusa hari ihumure: Nta Mukristo n'umwe ushobora kugwira muri uru rwego. Mbere yo kwinjira muri uru rwego rwa 6, Imana iba yabanje kuba sure 100% ko uzahasohoka amahoro.

Umurongo wa Bibiliya: Abagalatiya 2:20

« Nabambanywe na Kristo ariko ndiho, nyamara si jye uriho, ahubwo ni Kristo uriho muri jye. [...] »

Abagalatiya 6:14

« Ariko jyeweho sinkiratana ikindi, keretse umusaraba w’Umwami wacu Yesu Kristo wateye ko iby’isi bimbera nk’ibibambwe, nanjye nkabera iby’isi nk’ubambwe.»

Abaroma 8:35 ; 37

« Ni nde wadutandukanya n’urukundo rwa Kristo? Mbese ni amakuba, cyangwa ni ibyago, cyangwa ni ukurenganywa, cyangwa ni inzara, cyangwa ni ukwambara ubusa, cyangwa ni ukuba mu kaga, cyangwa ni inkota? [37] Oya, ahubwo muri ibyo byose turushishwaho kunesha n’uwadukunze»

Ng'ibyo iby'urwego rwa 6. Kurubamo ntibihoraho, ni igice cy'ubuzima bwa Gikristo mu rugendo rugana ijuru, igihe kurubamo bimara n'igihe bizira si twe tubigena, gusa ururimo, uwarunyuzemo n'Uwitegura kurucamo, turabizi ko byose biba biri mu mugambi mwiza w'urukundo rw'Imana, no kudutunganya ngo turusheho kumukorera uko abishaka, cyangwa tubere imfashanyigisho abandi bazahaca mu gihe runaka.

7. Urwego rwa karindwi: THE CONSTANT UNION (Kuba mu Mwuka w'amasengesho)

Munyemerere mvuge aka kantu mu cyongereza, ni quote y'umuhanga umwe: "Living in unbroken, constant fellowship and walking as one with God, where prayer feels like breathing."

Mu myaka yashize, nari umu member w'umuryango umwe utanga za Bibiliya ku buntu mu bigo by'amashuri n'ahandi. Twagiranga isaha imwe ku munsi yo gusengera abo twabaga twahaye za Bibiliya, kugirango Ijambo ry'Imana rikore umurimo waryo mu bo twabaga twazihaye. Ndibuka umwe mu bashya bari batwiyunzeho, yarabajije ati "byashoboka gute gusenga iyo saha kandi tuba turi ku kazi? Igisubizo yahawe cyaranshimishije: "Ni ugutandukanya gusenga no kuba mu Mwuka w'amasengesho.

Muri uru rwego rwa 7 ari na rwo rwa nyuma, umukristo arenga ibyo gufata umwanya wo gusenga, ahubwo akaba mu Mwuka w'amasengesho mu buryo buhoraho, kugeza aho gusenga bihinduka nko guhumeka. Ku kazi, mu rugo, mu kiruhuko, Umwuka Wera agufasha kubaho mu busabane buhoraho n'Imana. Hari umukristo wigeze kumbwira ikintu nanubu ndacyacyibazaho: Yarambwiye ngo icyamuha Yesu naza gutwara itorero akazaza ku cyumweru mbere ya sasasi. Naramubajije nti kuberiki? Yaransubije ngo ayo masaha abarokora baba bari mu rusengero bari tayari kuzamukana na Yesu! Byanteye kwibaza ukuntu tuba tayari kuzamukana na Yesu iyo turi mu rusengero gusa? Ntibikwiriye rwose, tugomba kuba mu busabane na Mwuka Wera mu buryo buhoraho. Muri Bibiliya hari umuntu wagendanye atyo n'Imana imyaka 300, kugeza ubwo Imana yamwimuye ajyanwa mu ijuru adapfuye.

Umurongo wa Bibiliya: Itangiriro 5:22; 24

« Amaze kubyara Metusela, Henoki agendana n’Imana imyaka magana atatu, ayibyaramo abahungu n’abakobwa. [24] Kandi Henoki yagendanaga n’Imana, ntiyaboneka, kuko Imana yamwimuye.»

Abaheburayo 11:5

« Kwizera ni ko kwatumye Henoki yimurirwa mu ijuru ngo adapfa, kandi ntiyaboneka kuko Imana yamwimuye, kuko yahamijwe atarimurwa yuko yanejeje Imana»

Mbere yo gusoza, tuvuge ko uko izi nzego zikurikirana, buri wese bimufitiye akamaro kwifuza kuzibamo mu buryo bukurikiyanye uko zikurikiranye n'ubundi. Ntiwavuka uyu munsi ngo utangire urye imyumbati. Ntiwakizwa uyu munsi ngo uwo munsi ukore dry y'iminsi 7 utaranamenya dry icyo ari cyo. Ariko nanone, birababaza kubona umukristo umaze imyaka 5 mu rusengero ariko adashobora gusenga wenyine isaha 1. Ibyo ni byo byatangaje uwandikiye Abaheburayo, ubwo yabonaga bameze nk'abana bo kuramizwa amata kandi bakagombye kuba ari abigisha.

byose si ku bw'imbaraga zacu, dushobozwa byose na Kristo uduha imbaraga.

Imana ibahe umugisha

Ev. Innocent Munyaneza

Answered: Ibinyoma 15 bakubwiye ku cyacumi

Fri, 02 Oct 2026 21:59:06 +0000

IBINYOMA 15 BIKUNZE KUVUGWA KU BYEREKEYE ICYACUMI

----------------------------------

1. IKINYOMA: «Icyacumi cyahimbwe n’abapasiteri ngo bibonere amafaranga. »

UKURI: Ntabwo icyacumi ari igihimbano cy'abapasiteri. Imana ubwayo ni yo yategetse Abisirayeli kujya bazana icyacumi cy'ibyo bejeje bakagishyira mu rusengero kugirango Abatambyi bakoraga imirimo y'urusengero babone ikibatunga. Ibyo byose byabayeho na mbere y'uko Itorero ribaho, na mbere y'uko abapasiteri babaho. ABALEWI 27:30 ; MALAKI 3:10

2. IKINYOMA: «Icyacumi nticyabagaho mbere y’Amategeko ya Mose. »

UKURI: Mbere y'amategeko ya Mose, icyacumi cyaratanzwe. Umuntu wa mbere watanze icyacumi muri Bibiliya ni Aburahamu wagihaye Melikisedeki kandi byabayeho mbere y'amategeko ya Mose. (Itangiriro 14:20) Na Yakobo yahize umuhigo wo gutanga icyacumi cyera cyane mbere y'amategeko ya Mose (Itangiriro 28:20-22)

3. IKINYOMA: «Yesu yakuyeho burundu ibijyanye n’icyacumi. »

UKURI: Yesu ntiyigeze akuraho icyacumi, ahubwo yakivuzeho avuga ko tutagomba kwirengagiza kugitanga (Matayo 23:23.) Gusa yongeyeho ko gutanga icyacumi bitagomba gutuma umuntu yirengagiza ibindi bintu by’ingenzi, nk'ubutabera, gukiranuka, imbabazi, kwizera....

4. IKINYOMA: « Nudatanga icyacumi, Imana ntizongera kugukunda. »

UKURI: Urukundo rw’Imana ntirugurwa amafaranga kandi ntirushingiye ku bwinshi cyangwa ubuke bw’ibyo umuntu atanga. Imana yadukunze tukiri babi, tutaranamenya iby'icyacumi, urukundo rwayo rurihariye kuko ntirunashingira ku gukiranuka kwa muntu cyangwa ibikorwa bye byiza. Gutanga icyacumi bigomba kuva ku mutima ushaka gushimisha Imana, atari ugushaka kugura urukundo rwayo.(Abaroma 5:8; Yohana 3:16; Abefeso 2:8–9.

5. IKINYOMA: «Gutanga icyacumi bituma umuntu ahita aba umukire. »

UKURI: Nta na hamwe Bibiliya ivuga ko nutanga icyacumi uzahita uba umukire, icyakoze ivuga ko nugitanga izaguha umugisha, kandi umugisha w'Imana ntugomba kureberwa mu butunzi n'amafaranga gusa. Bibiliya ivuga ku migisha y’Imana myinshi, ariko nta hantu yigisha ko gutanga icyacumi bituma buri muntu ahita agira ubutunzi bw’ibintu cyangwa ngo ajye kure y'ibibazo byose by’ubukungu. Imana ishobora guha umugisha umuntu mu buryo butandukanye, mu nzira zitandukanye, mu bihe bitansukanye ... kandi imigisha yayo ntigomba gutekerezwa na rimwe ko wabasha kuyigura. ICYACUMI NI KIMWE MU BYATUMA UBONA UMUGISHA, ARIKO UBWACYO CYONYINE SI AGAKONI KA MAJI GATUMA UBONA IMIGISHA. (Imigani 10:22; 1 Timoteyo 6:6–10.

6. IKINYOMA: «Abakene ntibagomba gutanga icyacumi na mba.»

UKURI: Kuba umuntu ari umukene ntibivuze ko adashobora kugira icyo atanga. Imana ntinezezwa n'ubwinshi bw'ibyo utanga, inezezwa n'umutima ubitanganye. Kuva mu isezerano rya cyera, Abisirayeli bakiri mu butayu, Imana yashyiriyeho buri wese uburyo bwo gutanga icyacumi bitewe n'uko yifite. NaYesu yashimye ituro ry’umupfakazi wari umukene, kuko yatanze nubwo yari afite bike cyane. (Mariko 12:41–44; Luka 21:1–4.

Icy’ingenzi si ubwinshi bw’ituro gusa, ahubwo ni n’umutima umuntu atangiramo.

7. IKINYOMA: « Icyacumi ni cyo cyonyine gifite agaciro; ubundi buryo bwo gutanga nta gaciro bufite. »

UKURI: Uretse icyacumi, Bibiliya yigisha n’ubundi buryo bwinshi bwo gutanga no kugira ubuntu: Gufasha abakene, gutanga amaturo ku bushake, kwita ku bafite ibyo bakeneye, gufatanya n'abandi bizera mu mirimo y'Itorero.... Gutanga kwa Gikristo ntikugomba kurebwa gusa nk’ijanisha runaka ry’umutungo, ahubwo ni igice cy’ubuzima burangwa n’urukundo, ubugwaneza n’ubugiraneza. (2 Abakorinto 9:6–8; Ibyakozwe n’Intumwa 2:44–45; Abagalatiya 6:9–10; Abaheburayo 13:16.)

8. IKINYOMA: «Umupasiteri ashobora gukoresha icyacumi uko yishakiye nk’amafaranga ye bwite. »

UKURI: Abayobozi b’Itorero bahamagarirwa kuba abizerwa mu byo bashinzwe, kandi ibyo Imana yashyize mu maboko yabo bigomba gucungwa mu bunyangamugayo no mu mucyo. Ntabwo ubuyobozi bw’Itorero bugomba guhinduka uburyo bwo kwikungahaza cyangwa gukoresha nabi ibyo abantu batanze. Pawulo yabwiye Abakorinto ko yirinda kugirango hatagira umugaya uburyo acunga impano nyinshi yabaga yahawe. Ibyo ni byo bibiliya yita "KUBA IBISONGA BYIZA" (1 Abakorinto 4:1–2; 2 Abakorinto 8:20–21; 1 Petero 5:2–3.)

9. IKINYOMA: «Utanga icyacumi ntazigera agira ibibazo by’amafaranga. »

UKURI: Kuba umuntu ari umwizera ku cyacumi akaba inyangamugayo n’indahemuka ntibimubuza guhura n’ibigeragezo cyangwa ibihe bikomeye by’ubukungu. Bibiliya igaragaza ko n’abizera bashobora kunyura mu bihe by’ubukene no mu makuba. Ahubwo Bibiliya irabateguza ko bazahura na byo ndetse byinshi, gusa ikabahumuriza ko izabana na bo muri byose. (Zaburi 34:20) (Abafilipi 4:12–13; 2 Abakorinto 8:1–2; 2 Abakorinto 11:27.)

10. IKINYOMA: «Umuntu ashobora kwikundisha ku Mana, cyangwa kugura ubutoni ku Mana akoresheje icyacumi. »

UKURI: Icyo ni ikinyoma cyambaye ubusa. Ubuntu bw’Imana no kuba umutoni kuri yo ntibigurwa amafaranga. Agakiza n’ubuntu bw’Imana tubihabwa ku buntu binyuze mu kwizera Yesu Kristo n'umurimo yarangirije ku musaraba, ntushobora kubibona ukoresheje ubutunzi n'iyo bwaba bungana gute, si ibintu umuntu ashobora kugura. Ndetse n’iyo umuntu atanga byinshi, ibyo ntibimuhesha uburenganzira bwo kwitwa umutoni w'Imana. (Abefeso 2:8–9; Ibyakozwe n’Intumwa 8:18–23.)

11. IKINYOMA: «Gutanga icyacumi bisimbura ubuzima bwo kwera, gukiranuka no kumvira Imana. »

UKURI: Icyo ni ikinyoma cyambaye ubusa, Imana ntishaka ko umuntu akora igikorwa cyo gutanga gusa, ariko ubuzima bwe bwose bukaba butumvira Imana. Icy’ingenzi ni umutima wumvira Imana kandi ugendera mu nzira zayo no gukiranuka.Yesu na we yagaragaje ko bidakwiriye ko umuntu yakora ibikorwa by’idini ariko akirengagiza ibintu by’ingenzi kurushaho nko gukiranuka no kumvira Imana. (1 Samweli 15:22; Mika 6:6–8; Matayo 23:23.

12. IKINYOMA: «Gutanga icyacumi bituma umuntu atagomba gufasha abakene»

UKURI: Gutanga icyacumi ntibisimbura inshingano yo gufasha abakene, gukunda mugenzi wawe no gukora ibyo gukiranuka. (Mika 6:8; Matayo 23:23; Matayo 22:37–40; Yakobo 2:14–17.)

13. IKINYOMA: «Umuntu agomba gutanga icyacumi kubera gutinya umuvumo.»

UKURI: Bamwe bavuga ko kudatanga icyacumi bizana umuvumo witwa "inyatsi", bigatuma batanga icyacumi batabitewe n'umutima ukunze ahubwo babitewe n'ubwoba! Gutanga icyacumi kwa Gikristo ntibikwiriye gukorwa gusa kubera ubwoba bw'umuvumo. Gutanga icyacumi ni igikorwa cyo kuramya Imana no kuyigaragariza umutima ushima kuruta gutekereza ko kugitanga hari icyo byongerera Imana cyangwa uwo ugishyikirije. Pawulo yigisha ko umuntu agomba gutanga nk’uko yabigambiriye mu mutima we, atabitewe n’agahato, kuko Imana ikunda utanga anezerewe.

Umurongo wa Bibiliya: 2 Abakorinto 9:7.

« Umuntu wese atange nk’uko yabigambiriye mu mutima we, atababaye cyangwa atahatwa, kuko Imana ikunda utanga anezerewe. »

14. IKINYOMA: «Abakristo bose bumva kimwe ibijyanye n'icyacumi»

UKURI: Abakristo ntibumva kimwe ibirebana n’icyacumi muri iki gihe. Hari ababona ko icyacumi ari itegeko, mu gihe abandi bashimangira ko gitangwa ku bushake. Ni yo mpamvu iyi ngingo ikwiye kwigishwa neza, umuntu akareba imirongo ya Bibiliya yose ireba gutanga aho gufata umurongo umwe gusa akawugira ihame rya buri wese. Kwigisha Abizera ibijyanye n'icyacumi ni ingenzi cyane, kuko bagomba kubikora bazi neza impamvu yabyo.

Imirongo ya Bibiliya: Matayo 23:23; 2 Abakorinto 9:6–7.

15. IKINYOMA: «Icyacumi ni cyo gipimo cyo hejuru cy’umukristo ukuze mu Mwuka»

UKURI: Umukristo ukuze mu buryo bw'Umwuka ntareberwa mu gutanga icyacumi gusa. Umukristo ukuze mu Mwuka areberwa muri byinshi bijyanye n'ubuzima bwe bwite n'imibereho itanga urugero, gukunda Imana n'abantu, kwihangana... n'ibindi byinshi bijyanye n'inyigisho za Bibiliya. Ni byo ko Bibiliya ihamagarira abizera kugira ubuzima burangwa no gutanga, gukorera abandi, gufasha abakene no kugira impuhwe, ariko ntabwo Umukristo ukuze mu buryo bw'Umwuka yareberwa mu gutanga icyacumi gusa. Yesu yashimangiye ko gukurikira Imana bidashingiye gusa ku ijanisha ry’amafaranga umuntu atanga, ahubwo bikubiyemo ubuzima bwe bwose. (Luka 6:38; 2 Abakorinto 9:6–8; 1 Timoteyo 6:17–19; Matayo 22:37–39.)

Gutanga icyacumi rero ubwabyo byonyine ntibigomba gufatwa nk’igipimo cy'urugero umukristo agezeho; umwizera ahamagarirwa kugira umutima w’ubugiraneza no gukunda Imana na mugenzi we mu buzima bwe bwose.

Murakoze cyane.

Ev. Innocent Munyaneza

Answered: Iyo umuntu apfuye ajya he?

Sun, 09 Nov 2025 07:58:23 +0000

Iki kibazo kirasa n'ikindi bifitanye isano, kigira kiti: "Ese nyuma y'ubu buzima hari ubundi buzima?" Wakanda hano ukabona igisubizo

Answered: Ese kunywa inzoga ni icyaha?

Thu, 08 May 2025 18:45:05 +0000

Iki kibazo kirasa n'ikindi kigira kiti : "i Kana Yesu yahinduye amazi inzoga, cyangwa umutobe?"

Wakanda hano ukabona igisubizo

Answered: Umunsi w'abakundana uzwi nka "Saint Valentin": Ese Abakristo bemerewe kuwizihiza?

Fri, 14 Feb 2025 21:07:55 +0000

Iki ni ikibazo Abakristo benshi bakunze kwibaza, kandi cyane cyane bakakibaza bucece kuko batabona uko bakibaza bisanzuye.

Mbere na mbere, reka tubanze turebe inkomoko y'uyu munsi wa "Saint Valentin" uko bivugwa mu bitabo by'amateka bitandukanye.

Uyu munsi wagiye uvugwaho byinshi, ndetse wagiye usobanurwa bitandukanye guhera cyera. Gusa ibyemeranywaho na benshi ni ibi bikurikira:

Ahagana mu kinyejana cya gatatu nyuma ya Yesu, ubwami bw'Abaroma bwari buyobowe numwami w'abami (Emperor) witwaga Claudius. Muri iyo myaka, hahoragaho intambara z'urudaca hagati y'ubwami n'ubundi. Uyu Claudius ngo yaje kwitegereza asanga abasore b'ingaragu bakora neza umurimo wa gisirikare kurusha abagabo bafite ingo. Ngo ibyo ni cyo cyaba cyaratumye ategeka ko abasirikare batongera gushaka abagore.

Muri iyo myaka, Valentin wari ufite ububasha bwo gushyingira abashaka kurushinga, we yirengagije itegeko ry'umwami w'abami, ahubwo akomeza gushyingira abasore bifuzaga kurushinga, yirengagije itegeko ry'umwami, ndetse anirengagije ingaruka byashoboraga kumukururira. Iyo nkuru yaje kugera ku mwami w'abami Claudius, afata umwanzuro wo gufunga Valentin. Igihe Valentin yari muri gereza, bivugwa ko yakundanye n'umukobwa w'umwe mu bacungagereza. Valentin ngo yaje no kwandikira uyu mukobwa, arangiza asinya ,muri aya magambo "Love, Your Valentine".

Bivugwa ko Valentin yaba yaritabye Imana ahagana mu mwaka wa 270 w'igihe cyacu. Mu kwizihiza igikorwa cy'ubutwari yakoze, umunsi wa Saint Valentin watangiye kwizihizwa ahagana mu mwaka wa 1806, aho abakundana batangiye kujya bohererezanya indabo no kwizihiza umunsi bise uwa Saint Valentin. Hari n'ibindi byagiye bivugwa ku nkomoko z'uyu munsi, ndetse hari na benshi bavuga ko uyu munsi ufite inkomoko ku mihango ya gipagani, bagaherako bahamya ko kubera iyi mpamvu, ngo Abakristo ntibakwiriye kuwizihiza.

Uko byaba bimeze kose, n'inkomoko yawo uko yaba imeze kose, reka twigarukire kuri iki kibazo: Ese Abakristo bemerewe kuwizihiza?

Icya mbere dukwiriye kumenya, ni uko uyu munsi wa Saint Valentin ntaho uhuriye n'Ubukristo uko buvugwa muri Bibiliya. Umukristo uyoborwa n'Ijambo ry'Imana ntakwiriye gutegereza umunsi umwe mu mwaka ngo agire uwo yereka urukundo. Iki kibazo gisa n'ikindi abantu bamwe bibaza niba umukristo agomba kwizihiza Noheli. Ntabwo Umukristo yizihiza Noheli nk'umunsi 1 mu mwaka, ahubwo Umukristo yizihiza Noheli azirikana igikorwa Imana yadukoreye cyo kuza ubwayo ikavukira mu bantu yambaye umubiri, ibingibi tubizirikana buri munsi wo kubaho kwacu.

Urukundo ni indangagaciro iri ku mwanya wa 1 mu ndangagaciro zigomba kuranga Umukristo, ndetse Bibiliya ihamya idaca ku ruhande ko ibyo wakora byose udafite urukundo ntacyo byaba bimaze. 1 Abakorinto 13:1-3 "Nubwo navuga indimi z’abantu n’iz’abamarayika, ariko singire urukundo, mba mpindutse nk’umuringa uvuga cyangwa icyuma kirenga. [2]Kandi nubwo nagira impano yo guhanura, nkamenya ibihishwe byose n’ubwenge bwose, kandi nubwo nagira kwizera kose nkabasha gukuraho imisozi, ariko singire urukundo nta cyo mba ndi cyo. [3]Kandi nubwo natanga ibyanjye byose ngo ngaburire abakene, ndetse nkitanga ubwanjye ngo ntwikwe ariko singire urukundo, nta cyo byamarira.

Mu isezerano rya cyera, Abisirayeli bahawe amategeko menshi, abasesenguzi basanga muri Bibiliya Yera amategeko arenga 600, ariko Yesu amaze kuza, amategeko yose yarayafashe ayabumbira mu itegeko rimwe: Itegeko ry'urukundo. (Abagalatiya 5:14)

Bibiliya ubwayo yose aho iva ikagera, ntabwo yandikiwe kutumara amatsiko, ahubwo yandikiwe kutwereka umugambi mwiza w'urukundo Imana ifitiye umuntu. Ntabwo ushobora gufata indangagaciro nk'iyi ngo uburemere bwayo uburangirize mu munsi umwe. Umukristo uyoborwa n'Umwuka Wera, arangwa n'urukundo buri kanya kose k'ubuzima bwe. Yerekana urukundo aho ari hose, ntabwo agomba gutegereza umunsi wa Saint Valentin ngo yerekane urukundo.

Ku byerekeranye n'abizihiza uyu munsi kandi ari Abakristo, ntitwemerewe guca imanza izo ari zo zose kuko Bibiliya irabitubuza, gusa Bibiliya itwemerera kuburira abantu: Nk'uko twabivuze, inkomoko z'uyu munsi ntizizwi neza, bityo rero, ibintu bitazwi neza dusaba Abakristo kubigiraho amakenga, bakareka kumira bunguri buri cyose kije. Turi mu bihe bigoye aho satani akoresha uburiganya n'uburyarya buhishe mu bintu bisa n'aho ntacyo bitwaye: Ibyo ari byo byose, kuwizihiza nta cyo binyungura no kutawizihiza ntacyo bimpombya. Byose turabyemererwa, nyamara ibitugira umumaro si byose. 1 Abakorinto 6:12 "Byose ndabyemererwa, nyamara ibingirira akamaro si byose. Byose ndabyemererwa ariko sinzategekwa n’ikintu cyose.".

Ibintu nk'ibyo bidafite icyo bitwunguye, ntitugafate risk z'uko byadushyira mu kaga ako ariko kose. Nta mpamvu.

Icyemezo cyo kwizihiza cyangwa kutizihiza saint Valentin ni icyemezo buri wese yakagombye gushingira kuri uyu murongo no ku bibazo bitatu: 1 Abakorinto 10:31 "Namwe iyo murya cyangwa munywa cyangwa mukora ikindi kintu cyose, mujye mukorera byose guhimbaza Imana. [32]Ntimukabere Abayuda ikigusha, cyangwa Abagiriki cyangwa Itorero ry’Imana, [33]nk’uko nanjye nezeza bose muri byose, sinishakira ikinyungura ubwanjye, keretse icyungura benshi kugira ngo bakizwe.

Ibibazo bitatu buri wese akwiriye kwibaza mbere yo gufata umwanzuro wo kwizihiza Saint Valentin:

1: Ese birahimbaza Imana?

2: Ese nta muntu bibera ikigusha?

3: Ese urishakira ibikunezeza gusa? Cyangwa ugamije gukora ibyungura benshi?

Ibisigaye, tuyoborwe n'Umwuka Wera, ni bwo tuzanezeza Imana

Murakoze, Uwiteka akomeze atwiyoborere

Ev. Innocent M.

Answered: Ese kwibagirwa ibyahise ni inyigisho ya Bibibiriya? Bibiriya ibivugaho iki?

Wed, 04 Oct 2023 21:08:46 +0000

Uretse no kuba Bibiriya itadusaba kwibagirwa ibyahise, ubwabyo ntibinashoboka kuko umuntu ntakoze nka mudasobwa aho umuntu akanda bouton agasiba ibyo adakeneye.

Umukristo se yakora iki cyangwa yakora ate ngo yibagirwe ko mu myaka 5 ishize yapfushije umwana? Ubu urimo gusoma iyi article, wakora iki cyangwa wakora ute ngo wibagirwe uko umunsi w'ejo hashize wari umeze?

Hari icyanditswe bamwe bakunze gufata nk'aho Bibiriya idusaba kwibagirwa ibyahise tugatumbira iby'imbere gusa, kiri mu Bafilipi 3:13 aho Pawulo agira ati: "Bene Data, sinibwira yuko maze kugifata, ariko kimwe cyo nibagirwa ibiri inyuma, ngasingira ibiri imbere." Ese muri iki cyanditswe Pawulo arimo kudusaba kwibagirwa ahahise nk'uhanagura ikibaho? Ni byiza kubanza kureba imirongo ibanziriza uwo dushyize hejuru: Pawulo yabanje kwerekana impamvu nyinshi zakamuhesheje kumvirwa no kubahwa mu maso y'Abayuda, nk'urugegero, ku mironogo ya 4-6 aragira ati "Niba hari undi wese wibwira ko afite impamvu imutera kwiringira umubiri, jyeweho namurusha. [5]Dore nakebwe ku munsi wa munani, ndi uwo mu bwoko bw’Abisirayeli, ndi uwo mu muryango wa Benyamini, ndi Umuheburayo w’Abaheburayo, ndi Umufarisayo ku by’amategeko. [6]Ku by’ishyaka narenganyaga Itorero, ku byo gukiranuka kuzanwa n’amategeko nari inyangamugayo."

Nubwo Pawulo akora urutonde rw'ibyakamuhesheje kuba akwiriye mu maso y'abantu, ibyo byose abihindura ubusa ku murongo ukurikiyeho wa 7-8 "Nyamara ibyari indamu yanjye nabitekereje ko ari igihombo ku bwa Kristo, [8]ndetse n’ibintu byose mbitekereza ko ari igihombo ku bw’ubutunzi butagira akagero, ari bwo kumenya Kristo Yesu. Ku bw’uwo nahombye ibyanjye byose, ndetse mbitekereza ko ari amase kugira ngo ndonke Kristo."

Amashuri yize, gukebwa yakebwe, amategeko yakurikije, ishyaka yagize, gukiranuka ku bw'amategeko.... ibyo byose bigize amateka ya Pawulo yaje gusanga ntacyo bimugira cyo ugereranije no kwizera Yesu. Tutitaye ku kuba twari beza cyangwa babi cyera, twese tugomba kuza kuri Yesu mu buryo bumwe: Kwizera, kwatura, kwihana no guca bugufi tukemera ko tutari dukwiriye kugirirwa izo mbababazi. Iyo Pawulo avuga ati "Nibagirwa ibiri inyuma ngasingira ibiri imbere", ntabwo aba avuga ko yasibye mu bwonko bwe ibyabaye mu mateka ye, kuko ntiyigeze abyibagirwa aranabivuga. None se yaba yarabyibagiwe yarangiza akabivuga? Ahubwo aba avuga ko atakiri imbohe y'amateka ye, ibyamubayeho cyera ntibimuraje ishinga, si byo yitayeho ahubwo yitaye ku mateka ye mashya muri Kristo Yesu.

Ubwonko bwacu bubitse amamiriyoni y'amakuru y'ibyahise, kugerageza kubihanagura byaba ari ukwivunira ubusa, ntibishoboka. Icyo Pawulo avuga ni uko ibyo byose n'ubwo bikiri mu bwonko bwacu, ntibikwiriye kutubera umugozi utubohera mu mateka, tugomba gutumbera iby'ubuzima bushya twaboneye muri Kristo Yesu.

Ahubwo rero, Imana yagiye isaba Abisirayeli inshuro nyinshi kutibagirwa, bagahora bibuka iby'amateka yabo ariko batabaye imbata yabyo. Gutegeka kwa kabiri 9:7 "Ujye wibuka, ntukibagirwe uko warakazaga Uwiteka Imana yawe uri mu butayu, uhereye igihe mwaviriye mu gihugu cya Egiputa ukageza aho mwaziye aha, mugomera Uwiteka." Umwanditsi wa Zaburi ya 77 (Asafu) na we ati "Nzibutsa abantu ibikomeye Uwiteka yakoze, Kuko nzibuka ibitangaza byawe bya kera." (Zaburi 77:11)

Muri make, ntabwo Bibiriya idusaba kwibagirwa ibyahise ahubwo idusaba kutaba imbata zabyo. Ahubwo idusaba kwibuka no kuzirikana ibyo byose bidufasha mu buryo bw'Umwuka no ku bw'icyubahiro cy'Imana. Abenshi muri twe dukurura inyuma yacu amateka atari meza, ariko iyo satani agerageje kubidukubitisha tumubwira ko uretse n'ibyo azi, hari n'ibindi byinshi ariko byose Yesu yarabitubabariye, dore ko Imana ubwayo idashobora kubidukubitisha cyangwa kubiducyurira: Abaheburayo 8:12 "Kuko nzabababarira gukiranirwa kwabo, Kandi ibyaha byabo sinzabyibuka ukundi.”

Murakoze, uwiteka abagirire neza.

Answered: Ese kwizera gushobora guhindura imigambi y'Imana?

Sat, 30 Sep 2023 10:06:16 +0000

Iki kibazo ubwacyo gihita kigaragaza kamere ya mwene-muntu: Ese kwizera gushobora guhindura imigambi y'Imana? None se ubundi dukeneye guhindura imigambi y'Imana kubera iki? Ukwizera k'Umukristo ntikubereyeho guhindura imigambi y'Imana, kubereyeho gutuma imigambi y'Imana ishoboka mu buzima bwe.

Imana ubwayo iri perfect, iratunganye rwose, inzira zayo zose ziragororotse, kandi buri cyose yifuriza umuntu ni icyiza gusa. Imana ubwayo ibasha kuduhumuriza iti: (Yeremiya 29:11) "Erega nzi ibyo nibwira nzabagirira! Ni amahoro si bibi, kugira ngo mbareme umutima w’ibyo muzabona hanyuma. Ni ko Uwiteka avuga." Ntabwo rero byumvikana uburyo umuntu yakwifuza kugira Ukwizera kwabasha guhindura imigambi y'Imana, mu gihe yaba azi neza ko iyo migambi Imana imufiteho ari myiza gusa. Yewe, ubanza koko umuntu yarananiranye: Kubera iki umwana yakwifuza guhindura imigambi myiza umubyeyi amufiteho?

Ukuri guhari ni uko Imana idahinduka, (Malaki 3:6 “Kuko jyewe Uwiteka ntabwo mpinduka, ni cyo gituma abahungu ba Yakobo mutamarwaho.") habe n'igicucu cyo guhinduka (Yakobo 1:17 "utanga kose kwiza n’impano yose itunganye rwose ni byo biva mu ijuru, bimanuka bituruka kuri Se w’imicyo udahinduka, cyangwa ngo agire n’igicucu cyo guhinduka.") N'Ibiyigize ntibihinduka, mu gihe no mu isanzure:

- Urukundo rwayo ntiruhinduka (Yeremiya 31:3),

- Ijambo ryayo ntitihinduka (Yesaya 40:8),

- N'imigambi yayo ntihinduka.

Munsi y'Ijuru nta muntu cyangwa ikintu gishobora guhindura umugambi w'Imana, n'iyo byaba ukwizera kungana iki. Ariko rero, Imana iha abana bayo ukwizera kugirango ikorere muri uko kwizera isohoze imigambi na gahunda ibafiteho, ibi ni byo bikora itandukaniro mu maso y'abantu.

Iyo urebeye mu nguni ya kimuntu, ushobora gutekereza ko ukwizera kwawe kwahinduye gahunda y'Imana. Dufate ingero: Yesu akiri mu isi, ni kenshi yabwiraga abantu ati "kwizera kwawe kuragukijije" (Matayo 9:22, Luka 17:19, ....); Ariko rero, hari n'aho Yesu atagize icyo akora kuko abantu babuze ukwizera. Mariko 6:4-6 "Yesu arababwira ati “Umuhanuzi ntabura icyubahiro keretse mu gihugu cy’iwabo, no mu muryango wabo no mu nzu yabo.” [5]Nuko ntiyashobora kugira igitangaza ahakorera na kimwe, keretse abarwayi bake yarambitseho ibiganza arabakiza, [6]atangazwa n’uko batizeye. Agendagenda mu birorero impande zose yigisha." Biragaragara ko hamwe na hamwe, abantu bakize kubera ukwizera kwabo, ahandi bakananirwa gukira kubera kubura ukwizera: None se bisobanuye ko umugambi w'Imana wahindutse? Reka tubisuzume:

Yesaya 46;10 Bibiriya igira iti: "Mpera mu itangiriro nkavuga iherezo, mpera no mu bihe bya kera nkavuga ibitarakorwa nkavuga nti ‘Imigambi yanjye izakomera kandi ibyo nzashaka byose nzabikora." Imana mu Bumana bwayo, imenya iherezo ry'ikintu kitaranabaho, ihera ku itangiriro ry'ikintu ikavuga iherezo ryacyo. Yesu ataranaza mu isi yari azi neza ko abantu b'i Nazareti bazabura kwizera bigatuma atahakorera igitangaza. Yari azi neza ko ikirema cyo ku kidendezi kizagira kwizera kigakira indwara y'imyaka 38. Yari azi neza ko azazura Lazaro nyuma y'iminsi 4 apfuye. Yari azi neza ko hari umugore uzagira kwizera akamukora ku gishura, agakira indwara y'imyaka 12. Kubera iyo mpamvu, abagize kwizera cyangwa bakabura kwizera, ntacyo bahinduye kuri gahunda y'Imana. Gusa mu maso y'abantu, ukwizera kwabo kwakoze itandukaniro (Kuko abantu ntibazi ibyari biriho bitarabaho), ukwizera kwabo kwatumye umugambi w'Imana usohora mu buzima bwabo.

Muri kamere y'Imana ntishobora kwivuguruza, iryo ni ihame ridakuka: Iyaba kwizera k'umuntu kwashoboraga guhindura gahunda y'Imana, byatuma Imana yivuguruza kandi bitabaho. Iyo ugize kwizera ikintu runaka kigakoreka, cyangwa ukabura kwizera ntigikoreke, ntibisobanuye ko gahunda y'Imana yahindutse, bisobanuye ko wemereye Imana gusohoza umugambi igufiteho; Buri muntu wese yaremanywe icyo bita "Ubushake" (Free will) n'uburenganzira bwo guhitamo (Choice), kandi Imana yubaha ubushake bw'umuntu n'amahitamo ye kugirango itadutwara nka robot. Ukwizera na ko ubwako ni impano y'Imana, uku kwizera kukaba kudufasha kuringaniza ubushake n'amahitamo byacu n'umugambi w'Imana.

URUGERO: Iyo umubyeyi abwiye umwana ati "Jya i Kigali hariyo ibyo naguteganirijeyo", iyo ni gahunda cyangwa umugambi umubyeyi afitiye umwana we. Iyo umwana yanze kujya i Kigali agahitamo kujya i Butare, aba ahisemo kutumvira se agakoresha ubushake bwe uko abyumva. None se ibyo bisobanuye ko gahunda ya se yahindutse? Oya rwose. Ukwizera rero, ni cya kintu kidufasha kuringaniza ubushake n'amahitamo byacu, tukavuga tuti 'Ndajya i Kigali kuko ari byo Data ashaka". Ntabwo kwizera kubereyeho kwemeza umubyeyi ngo ave ku izima anyemerere kujya aho nshaka.... oya rwose.

Muri make dusoza, ntabwo Kwizera gushobora guhindura umugambi w'Imana, icyakora kwizera gutuma umugambi w'Imana usohora mu buzima bwa muntu. Kwizera guhindura umugambi wa satani, ariko ntikwahindura uw'Imana

Ariko ikirenze kuri ibyo, nta n'impamvu ifatika yo kuba twakwifuza ko umugambi w'Imana uhinduka. Kwizera ni ikintu cy'ingenzi mu buzima bw'Umukristo kuko tutanashobora kunezeza Imana tutagufite: Abaheburayo 11:6 "Ariko utizera ntibishoboka ko ayinezeza, kuko uwegera Imana akwiriye kwizera yuko iriho, ikagororera abayishaka."

Muri iki gice cya 11 cy'Abaheburayo, havugwamo intwari zo kwizera nyinshi. Nk'urugero, umurongo wa 11 ugira uti: "Kwizera ni ko kwatumye na Sara abashishwa gusama inda nubwo yari acuze, kuko yatekereje ko Iyasezeranije ari iyo kwizerwa." Nta wavuga ngo Imana yari ifite indi gahunda... hanyuma kwizera kwa Sara gutuma Imana ihindura gahunda .... Oya, Imana yari ibisanganywe muri gahunda yayo, icyakora uyu mukecuru w'ukwizera yatumye gahunda Imana yari imufiteho isohora. Ushobora kwibaza uti iyo Sara abura kwizera byari kugenda gute? Ni byo twasobanuye hejuru: Ubirebye nk'umuntu utazi ibyariho mbere na mbere, watekereza ko gahunda y'Imana yahindutse kuko Sara yabuze kwizera. Ariko Imana izi iherezo guhera mu itangiriro, yo yari kuba ibizi mbere na mbere ko sara azabura kwizera, bityo nta gahunda yayo yari kuba ihindutse, kuko icyari kiriho mbere ni cyo cyari kuba kibaye.

"Abaheburayo 11:30 "Kwizera ni ko kwatumye inkike z’amabuye z’i Yeriko ziriduka, bamaze kuzizenguruka iminsi irindwi." Nta wavuga ko Joshuwa yatumye Imana ihindura gahunda yayo ihitamo kusenya Yeriko, Oya, Imana yari ibisanganywe muri gahunda yayo, icyakora uyu mugabo Yosuwa yagize kwizera bituma Imana imucishamo gusohora k'umugambi wayo. N'iyo Yosuwa abura kwizera, Imana yari gukoresha undi ugufite, ariko amaherezo Yeriko yari kuriduka.

Turangije tubifuriza kugira ubuzima bwuzuye "Kwizera" kugirango mubashe kuyinezeza, kuyisobanukirwa kurushaho, kugendana na yo uko bikwiriye, cyane cyane, kugirango umugambi w'Imana usohore. Ibirenze kuri ibyo, ntimukifuze guhindura gahunda y'Imana kuko ni nziza.

Uwiteka abagirire neza

Answered: Nakoze divorce: Ese ukurikije bibiriya nshobora kongera gushaka?

Fri, 29 Sep 2023 09:23:57 +0000

Iki ni kimwe mu bibazo bitigeze bivugwaho rumwe mu mateka y'itorero rya kristo. Twaba twirariye turamutse twihandagaje tukavuga ko ari twe tuzanye igisubizo ngenderwaho ku isi yose.

Gusa mutwemerere tugaragaze icyo Bibiriya ibivugaho. Uretse no kongera gushaka ku muntu wigeze gushaka, hari abakozi b'Imana bagiye bafata umwanzuro wo kudashaka n'ubwo batabigize ihame cyangwa itegeko. Pawulo ntiyigeze ashaka, ndetse yandikiraga abakorinto yabagiriye inama ikurikira: "Abatararongorana kandi n’abapfakazi, ndababwira yuko icyiza kuri bo ari uko bagumya kumera nkanjye." (1 Abakorinto 7:9).

Icyemezo cyo kudashaka ntigikwiriye kumvikana nk'igihano cyangwa umutwaro, ahubwo na Yesu ubwe yabivuzeho, avuga ko bikorwa n'uwiyemeje kugira icyo yiyima kugirango abone uko arushaho kunezeza Umwami Imana. Yabivuze muri aya magambo: Matayo 19:12 "Kuko hariho ibiremba byavutse bityo mu nda za ba nyina, hariho n’inkone zakonwe n’abantu, hariho n’inkone zikona ubwazo ku bw’ubwami bwo mu ijuru. Ubasha kubyemera abyemere.”

Impamvu yabyo na yo Bibiriya iyisobanura muri aya magambo: 1 Abakorinto 7:32-33 "Ariko ndashaka ko mutiganyira. Ingaragu yiganyira iby’Umwami wacu uko yamunezeza, [33]ariko uwarongoye yiganyira iby’isi ngo abone uko anezeza umugore we." Byumvikane neza ko kudashaka cyangwa kutongera gushaka atari ihame (Principe) ahubwo ni irengayobora (Exception). Impamvu ari irengayobora na yo turayibona tuyikuye muri Bibiriya: Mu itangiriro. Imana imaze kurema byose, yitegereje ibyo yaremye isanga byose ari byiza uretse ikintu kimwe gusa ni cyo yarebye ibona atari cyiza, ihita ikibonera igisubizo: Kuba wenyine. Itangiriro 1:31 "Imana ireba ibyo yaremye byose, n’uko byari byiza cyane". Bibiriya ikongeraho iti: (Itangiriro 2:18 "Kandi Uwiteka Imana iravuga iti “Si byiza ko uyu muntu aba wenyine". Ntabwo Imana yashyizeho ishyingirwa kugirango umuntu anezeze umubiri, nta n'ubwo yagirango inyoko-muntu yororoke gusa, ahubwo yanagirango ikemure ikibazo cy'ubwigunge bwa muntu. N'ubwo Imana yanga divorce, (Ushobora gukanda hano ukareba impamvu iyanga), twasanze hari impamvu Bibiriya yemera zishobora gutuma abashakanye batandukana. (Ushobora gukanda hano ukareba icyo kibazo n'igisubizo). Igihe izo mpamvu zabayeho, Pawulo yandikiye Abakorinto ababwira ko uwakoze divorce agirwa inama yo kuguma ari igishubaziko. (Igishubaziko = Umuntu wigeze gushaka, agatandukana n'uwo bashakanye agasubira iwabo). 1 abakorinto 7:10-11 "Abamaze kurongorana ndabategeka, nyamara si jye ahubwo ni Umwami wacu, umugore ye kwahukana n’umugabo we. [11]Ariko niba yahukanye, abe igishubaziko cyangwa yiyunge n’umugabo we, kandi umugabo ye gusenda umugore we."

Gusa n'ubwo Bibiriya itanga iyi nama, ntibura no kongeraho ko k'uwo bitazashobokera kwigumira wenyine, ibyiza ari uko yashaka aho gushyuha. 1 Abakorinto 7:9 "Ariko niba badashobora kwirinda barongorane, kuko ibyiza ari ukurongorana kuruta gushyuha." Icyongeye kuri ibi, hari aho Bibiriya igaragaza ko hari ubwo mwenedata yaba atagihambiriwe ku wo bari barashakanye, muri aya magambo: "Icyakora wa wundi utizera, niba ashaka gutana atane. Mwene Data w’umugabo cyangwa w’umugore ntaba agihambiriwe iyo bimeze bityo, kuko Imana yaduhamagariye amahoro." (1 Abakorinto 7:15)

Ubundi Divorce yose aho iva ikagera ni ingaruka z'icyaha cy'umwe mu bashakanye cyangwa bombi icyarimwe. Ndetse na divorce ubwayo ni icyaha kuko Imana irayanga kandi igihe cyose dukoze icyo Imana yanga tuba dukoze icyaha. Aha ni ho havukira ikibazo kivuga ngo "Ese Imana yababarira icyaha cya divorce?" Mu buryo butajijinganywaho igisubizo ni YEGO, kuko icyaha kidashobora kubabarirwa ni kimwe gusa. (Kanda hano ukirebe) Kubera ibyo byose tumaze gusobanura, dusubire ku kibazo cyacu: Ese uwakoze divorce ashobora kongera gushaka? Ntitwakwihandagaza ngo dusubize yego cyangwa oya mu buryo bwa rusange. Iki ni ikibazo cy'uwo kireba n'Imana ye kuruta uko cyaba icya rusange. Ukoresheje Bibiriya ubona YEGO na OYA byombi ari ibisubizo bishoboka.

Iyo bimeze bityo, uwo iki kibazo kireba agirwa inama yo gushaka Imana, akihatira kumva ijwi ry'Umwuka Wera, agashyira mu nyurabwenge mu bwenge bw'imigenzereze bumurikiwe n'Imana, kandi agashyira ku munzani ibyiza n'ibibi biri mu kongera gushaka n'iziri mu kuguma ari wenyine.

Uko bimeze kose, twibwira ko nta wakwihandagaza ngo acireho iteka uwashatse bwa kabiri nyuma yo gukora divorce, kimwe n'uko nta wariciraho awahisemo kuguma uko ari akareka kongera gushaka.

Murakoze, uwiteka abagirire neza.

Answered: Umuntu wari ufite abagore barenze umwe, yakora iki nyuma yo gukizwa? Ese yabagumana?

Fri, 29 Sep 2023 08:13:45 +0000

Mbere yo gusubiza iki kibazo, ni byiza ko tubanza tukemeranya ko muri gahunda z'umwimerere z'Imana, Imana ntiyigeze yifuza ko umugabo yarongora abagore barenze umwe. Umuhanuzi Malaki avuga yeruye ko Imana yari ifite umwuka uhagije. ku buryo iyo ibishaka yari kuremera Adamu abagore barenze umwe, ariko kuba yaramuremeye umwe bifite ubutumwa bitanga. Malaki 2:15 "Mbese ntiyaremye umwe, naho yari afite umwuka usagutse? Icyatumye arema umwe ni iki? Ni uko yashakaga urubyaro rwubaha Imana. Nuko rero murinde imitima yanyu hatagira uriganya umugore wo mu busore bwe."

Mu mateka ya muntu, hari ibintu byinshi Imana yagiye ireka bikabaho, ku bw'umutima wa muntu unangiye, ariko kureka bikabaho ntibisobanuye uruhushya rwo kubikora. Kuba Aburahamu yararongoye abagore batatu ntimwice, kuba Dawidi yararongoye abagore 8 ntimwice, kuba Salomon yararongoye abagore 1001 ntimwice, ibi byose nta na kimwe gisobanuye ko Imana yaba yaratanze uruhushya rwo kurongora umugore urenze umwe. Gahunda y'Imana kuva kuri Adamu na Eva byari uko umugabo agira umugore umwe, ariko ku bw'umutima wa muntu unangiye, muntu yishyiriyeho ibindi bimubereye, Imana irareka bibaho, bidasobanuye ko yatanze uruhushya rwo kubikora.

Mu ngero z'abatubanjirije tubonye hejuru, igihe cyose muntu yatandukiriye ubushake bw'Imana akazana abagore benshi byamukururiye ingaruka: Ntitwakwirirwa tuvuga ibya Aburahamu na Hagari, ibya Dawidi na Betisheba, ibya Salomon n'abagore 1001.... ingero ni nyinshi.

Tukiri hano mu isi, igihe cyose umuntu atandukanye n'ubushake bw'Imana agomba kwitegura kwirengera ingaruka zabyo. Iyo umuntu akoze ibyaha atarakizwa, iyo akijijwe akihana arababarirwa, ariko kubabarirwa kwe ntibisobanuye ko ingaruka z'ibyo yakoze atarakizwa zisibama. Ni kenshi dukizwa ariko ingaruka z'ibyo twakoze tutarakizwa zikadukururukanaho mu buzima bushya, ibyo rwose si igitangaza. Bibiriya igira iti : (1 Timoteyo 5:24 "Ibyaha by’abantu bamwe bigaragara hakiri kare, bikabakururira mu rubanza, naho iby’abandi bizagaragara hanyuma.")

Hari ibihugu bimwe na bimwe byemerera mu mategeko yabyo umugabo kugira abagore benshi, ariko uko byagenda kose amategeko y'bihugu ntakuraho ubushake bw'Imana. Ibyakozwe n'Intumwa 5:29 "Petero n’izindi ntumwa barabasubiza bati “Ibikwiriye ni ukumvira Imana kuruta abantu."

N'iyo umugabo yaba adakijijwe ariko akaba afite abagore barenze umwe, uretse mu bihugu byemera gushaka abagore benshi, ahandi hose amabwiriza ni uko uyu mugabo yaba afite nibura umugore umwe yasezeranye na we imbere y'amategeko. Insengero z'abavutse ubwa kabiri zemera kandi zikubaha ubuyobozi. Kuko turimo kwandika ikinyarwanda reka tuvuge ibyo mu Rwanda, nta Torero ry'abavutse ubwa kabiri riyoborwa n'Umwuka Wera ryasezeranya abageni batabanje gusezerana imbere y'amategeko. Abaroma 13:1 "Umuntu wese agandukire abatware bamutwara, kuko ari nta butware butava ku Mana, n’abatware bariho bashyizweho n’Imana." Kubera iyo mpamvu, Itorero ryemera umugore w'isezerano nk'umugore uyu mugabo agomba gukomezanya na we nyuma yo gukizwa.

Iyo ntanumwe yasezeranye na we mu mategeko, uyu mugabo agirwa inama yo gukomezanya n'umugore yashatse mbere, kuko uyu mugore ni we ufatwa nk' "umugore wo mu bosore bwe." Malaki 2;14 bibiriya igira iti: "Nyamara mukabaza muti ‘Impamvu ni iki?’ Impamvu ni uko Uwiteka yabaye umugabo wo guhamya ibyawe, n’iby’umugore wo mu busore bwawe wariganije nubwo yari mugenzi wawe, akaba n’umugore mwasezeranye isezerano." Birumvikana, uyu mugabo asigarana n'inshingano zo kwita no gufasha abagore bandi ndetse n'abana bose babavutseho, gusa ntiyemerewe gukomeza kubana na bo nk'umugabo n'umugore. Bishobora kumuvuna mu buryo bumwe cyangwa ubundi, ariko ni bya bindi twatangiye tuvuga, iyo umuntu amaze gukizwa agomba guhagarara kigabo, akihanganira bimwe na bimwe bitamutunganiye bikomoka ku buzima yabayemo mbere yo gukizwa.

Murakoze, Uwiteka abagirire neza

Answered: Ese hari impamvu za divorce Bibiriya yaba yemera?

Fri, 29 Sep 2023 05:54:53 +0000

Iki kibazo kirakomeye, ndetse biragoye kukibonera igisubizo cyanyura buri wese.

Iyo tuvuga ku mpamvu Bibiriya yemera za divorce, ni ngombwa cyane mbere ya byose kubanza kuzirika iki cyanditswe kiri muri Malaki 2:16 "Kuko nanga gusenda [Divorce], ni ko Uwiteka Imana ya Isirayeli ivuga," Tubanze twisegure: N'ubwo hari impamvu Bibiriya yemera zatuma abashakanye batandukana, ibi ntibisobanura ko Imana ishyigikiye divorce. Mu mateka ya muntu, hari ibintu byinshi Imana yagiye ireka bikabaho, ku bw'umutima wa muntu unangiye, ariko kureka bikabaho ntibisobanuye ko ibishyigikiye. Kuba Aburahamu yararongoye abagore batatu ntimwice, kuba Dawidi yararongoye abagore 8 ntimwice, kuba Salomon yararongoye abagore 1001 ntimwice, ibi byose nta na kimwe gisobanuye ko Imana yatanze uruhushya rwo kurongora umugore urenze umwe. Gahunda y'Imana kuva kuri Adamu na Eva byari uko umugabo agira umugore umwe, ariko ku bw'umutima wa muntu unangiye, muntu yishyiriyeho ibindi bimubereye, Imana irareka bibaho, bidasobanuye ko yatanze uruhushya rwo kubikora.

Mu buryo busobanutse, Bibiriya itanga impamvu 2 abashakanye bashobora gutandukana: Ubusambanyi, n'igihe utizera afashe umwanzuro wo guta uwizera. Tubisobanure:

1) Ubusambanyi:

Matayo 5:32 Bibiriya igira iti: "Ariko jyeweho ndababwira yuko umuntu wese usenda umugore we atamuhora gusambana, aba amuteye gusambana, kandi uzacyura uwasenzwe azaba asambanye." (Ushobora kureba ikibazo kigira kiti: "Kuki icyaha cy'ubusambanyi gifatwa mu buryo bw'umwihariko?" Wakanda hano kareba igisubizo)

2) Igihe umwe mu bashakanye atari umwizera, akaba ari we ufata umwanzuro wo gutana

1 Abakorinto 7:15 "Icyakora wa wundi utizera, niba ashaka gutana atane. Mwene Data w’umugabo cyangwa w’umugore ntaba agihambiriwe iyo bimeze bityo, kuko Imana yaduhamagariye amahoro."

Uko byagenda kose, n'ubwo Bibiriya yemera izo mpamvu ebyiri tuvuze haruguru, igihe kimwe muri ibyo kibaye ntibisobanuye ko divorce ari automatique nk'aho nta bundi buryo bwakemura icyo kibazo cyavutse. Ikindi kandi, ikibazo cya divorce ntabwo ari ikibazo cyareberwa mu ndorerwamo ya rusange, ahubwo kirebwa buri cyose ukwacyo kuko nta rugo rusa n'urundi. Ni kimwe n'abibaza niba nyuma y'izo mpamvu ebyiri nta kindi cyatuma abashakanye batandukana: Zishobora kubaho, gusa Bibiriya itubuza "gutekereza ibirenze ibyanditswe" (1 abakorinto 4:6 "Nuko bene Data, ibyo mbyigereranijeho jyewe na Apolo ku bwanyu nk’ubacira umugani, kugira ngo ibyo mvuze kuri twe bibigishe kudatekereza ibirenze ibyanditswe, hatagira umuntu wihimbaza arwana ishyaka ry’umwe agahinyura undi."

Aho niho tuvugira ko buri cyose gisuzumwa ukwacyo, kuko hari abibaza niba umwe mu bashakanye yatega agahanga igihe undi ashaka kumwica (ngo nuko bitavugwa muri Bibiriya), cyangwa amuhoza ku nkeke ibabaza umubiri cyangwa umutima, n'itoteza ry'umubiri cyangwa ry'ibyiyumviro (Physical or emotional abuse). N'ubwo nk'iki kitavugwa na Bibiriya nk'impamvu yemewe ya divorce, ariko sintekereza ko hari umuntu uyobowe n'Umwuka Wera wabwira umukristo ngo "tega agahanga bakwice kubera ko utagomba gutana..." Ese yaba yirengagije ko na Yesu dukurikira ubwe yahungiye muri Egiputa ubwo bashakaga kumwica? Ese hari uwakwirengagiza ko incuro nyinshi Yesu bashatse kumutembagaza mu manga akabaca mu myanya y'intoki akabahunga? Ese hari uwakwirengagiza ko ushobora gukoresha imbaraga z'umubiri ngo udakora divorce, ugahungabanya byinshi mu buryo bw'Umwuka?

Abakozi b'Imana basanzwe bagira inama abo bashinzwe gushumba, bagomba gukoresha Umwuka w'ubushishozi na Discernement, bagatanga inama zikwiye bakurikije abo babwira abo aribo, aho bari, uburemere bw'ikibazo, imiterere y'urushako rwabo, abana babo, ingaruka z'umubiri n'iz'umwuka;..... buri cyose kigasuzumwa ukwacyo kitagereranijwe n''ibindi.

Bibiriya ni inyanja ngari kandi ntivuguruzanya, ni ngombwa gushyira ku munzani ku ruhande rumwe iryo Jambo rivuga ngo Imana yanga divorce (si divorce yonyine yanga ifite n'ibindi byinshi yanga), ku rundi ruhande iryo jambo rivuga ngo Imana yaduhamagariye amahoro. Ibirenze kuri ibyo hakora Umwuka w'ubushishozi na Discernement.

Ikindi bibazo wasoma: - Kuki Imana yanga divorce? Kanda hano usome igisubizo.

Murakoze, Uwite abagirire neza

Answered: Kuki Imana yanga divorce?

Fri, 29 Sep 2023 05:17:00 +0000

NOTE: [Turaza gukoresha cyane ijambo divorce = Gutandukana kw'abashakanye]

Umurongo uri budufasshe gusubiza iki kibazo turawusanga muri Malaki 2:16 "Kuko nanga gusenda, ni ko Uwiteka Imana ya Isirayeli ivuga, nanga n’umuntu utwikiriza urugomo umwambaro we. Ni ko Uwiteka Nyiringabo avuga. Nuko rero murinde imitima yanyu mwe kuriganya."

Imana ivuga idaca ku ruhande ko yanga divorce, ariko impamvu iyanga iboneka neza iyo usomye imirongo ibanziriza uyunguyu; mutwemerere tuyisome

Malaki 2:13-15 “Kandi hariho n’ibindi mukora: mutwikira igicaniro cy’Uwiteka amarira no kuboroga, mugasuhuza imitima, bigatuma atita ku maturo mutura, ntayakire ngo anezerwe. [14Nyamara mukabaza muti ‘Impamvu ni iki?’ Impamvu ni uko Uwiteka yabaye umugabo wo guhamya ibyawe, n’iby’umugore wo mu busore bwawe wariganije nubwo yari mugenzi wawe, akaba n’umugore mwasezeranye isezerano. [15Mbese ntiyaremye umwe, naho yari afite umwuka usagutse? Icyatumye arema umwe ni iki? Ni uko yashakaga urubyaro rwubaha Imana. Nuko rero murinde imitima yanyu hatagira uriganya umugore wo mu busore bwe."

Ibyo byanditswe biratwigisha byinshi: Icya mbere, biratwereka ko Imana itanezererwa amaturo kandi ntiyumve amarira y'umuntu wariganije umugore wo mu bosore bwe akica isezerano ryo gushyingirwa. Ibi kandi bishimangirwa n'ikindi cyanditswe kiri muri 1 Petero 3:7 "Namwe bagabo ni uko; mubane n’abagore banyu, mwerekane ubwenge mu byo mubagirira kuko bameze nk’inzabya zidahwanije namwe gukomera, kandi mubūbahe nk’abaraganwa namwe ubuntu bw’ubugingo, kugira ngo amasengesho yanyu ye kugira inkomyi" Kugirango amasengesho yanyu ye kugira inkomyi.... bisobanuye ko iyo wishe isezerano ryo gushyingirwa, amasengesho yawe aba afite inkomyi. Imana ubwayo isobanura impamvu z'agaciro iha urushako: Ni uko ari umushinga wayo ubwayo. Ugushyingirwa kw'abashakanye ni igitekerezo cy'Imana ubwayo, ntibyavuye mu masengesho y'uwo ari we wese. Kuko uyu ari umushinga w'Imana ubwayo, ni yo yawisobanuriye, iwushyiriraho imbibi n'amabwiriza. Gutandukira aya mabwiriza ni ukwica gahunda y'Imana

Ishyingirwa si amasezerano, ni isezerano. [Biratandukanye]. Divorce yangiza imfatiro z'iri sezerano rikomeye mu maso y'Imana. Muri Bibiriya, Imana yifashisha kenshi ibishushanyo n'ibigereranyo bitandukanye kugirango muntu asobanukirwe kurushaho gahunda zayo. Igihe Imana yasabaga Aburahamu kuyitambira umwana we w'ikinege Isaka, byari ikigereranyo cy'Umwana wayo w'ikinege wagombaga kuzitambira abantu (Itangiriro 22:9; Abaroma 8:32) Igihe Imana yasabaga Abisirayeli gutamba ibitambo byoswa bimena amaraso kugirango babarirwe ibyaha, byari igishushanyo cy'amaraso Imana ubwayo yari igiye kuzatumenera ku musaraba kugirango tubabarirwe ibyaha mu buryo butagira inenge (Abaheburayo 10:10)

Isezerano ryo gushyingirwa, ni ikigereranyo n'igishushanyo cy'isezeranyo Imana ifitanye n'abantu bayo. [Abaheburayo 9:15]. Kwica isezerano ryo gushyingirwa ni nko kuneguriza izuru umushinga w'Imana, ni no gushyira icyasha ku isezerano Imana ifitanye n'abantu bayo, kuko kenshi muri Bibiriya, Itorero rigereranywa n'umugeni wa Kristo. [2 Abakorinto 11:2; Ibyahishuwe 19:7-9] Muri Eden, igihe Imana yashyiragaho ishyingirwa, yifuzaga ko umuntu asobanukirwa neza ubumwe buhebuje umuntu ashobora kugirana n'undi kugeza bahindutse umubiri umwe. Uko umuntu ahinduka umubiri umwe n'uwo bashakanye, ni nako umuntu ahinduka Umwuka umwe na Kristo iyo bifatanije. Itangiriro 2:24 "Ni cyo gituma umuntu azasiga se na nyina, akabana n’umugore we akaramata, bombi bakaba umubiri umwe:" 1 Abakorinto 6:17 "Ariko uwifatanya n’Umwami Yesu aba abaye umwuka umwe na we;"

Iyo umwe mu bashakanye yishe isezerano ry'ugushyingirwa, aba yangije igishushanyo cy'isezerano rikomeye Imana ifitanye n'abantu bayo. Hari kandi n'iyindi mpamvu ikomeye ituma Imana yanga divorce nk'uko twabisomye muri Malaki 2:15 "Mbese ntiyaremye umwe, naho yari afite umwuka usagutse? Icyatumye arema umwe ni iki? Ni uko yashakaga urubyaro rwubaha Imana.”

Imana yashakaga urubyaro rwubaha Imana: Urubyaro rukuriye mu muryango w'abantu batinya Imana, abantu bubashye isezerano ryo gushyingirwa, rutandukana n'urubyaro rukomoka mu baciye kuri iryo sezerano. Abashyingiranywe bagomba kuzirikana icyo kintu, bakita ku kuba urubyaro rwabo rwazavamo urubyaro rwubaha Imana. Yesu yigeze kubazwa impamvu amategeko ya Mose yemeraga divorce, yabasubije adaciye iburyo cyangwa ibumoso: “Mose yabemereye gusenda abagore banyu kuko imitima yanyu inangiye, ariko uhereye mbere hose ntibyari bimeze bityo". (Matayo 19:8); Nguko uko Mose yemereraga abantu gukora divorce: Si uko byari mu bushake bw'Imana, ahubwo ni ku bw'imitima y'abantu inangiye.

Uwiteka Imana Ibahe umugisha.

Answered: Ese kwifuza ikintu runaka ni bibi?

Tue, 26 Sep 2023 19:45:15 +0000

Kwifuza ni kimwe mu bintu buri muntu wese yaremanywe. Umuntu yaremanywe amaranga-mutima n'ibyiyumviro bitandukanye. Kwifuza ikintu ni bwo buryo bwo kumenyekanisha ko hari icyo ukeneye, cyaba icy'umubiri cyangwa icy'Umwuka, cyaba icyo wowe ubwawe ukeneye cyangwa icyo wifuriza undi muntu.

Imana isezeranya Abraham yaramubwiye iti: "Kandi nzaha umugisha abakwifuriza umugisha, ...[Itangiriro 12:3], bisobanuye ko kwifuza ubwabyo atari bibi cyangwa icyaha, ahubwo igishobora kuba kibi cyangwa icyaha ni icyongicyo wifuza. Kwifuza impinduka nziza, kwifuza iby'ukuri biri mu ijambo ry'Imana... aho rwose nta kibazo kirimo, ndetse ahubwo Bibiriya idushishikariza kwifuza nk'uko kwiza mu mirongo ikurikira:

- 1 Abakorinto 14:1 "Mushimikire urukundo kandi mwifuze impano z’Umwuka, ariko cyane cyane mwifuze guhanura."

- 1 Petero 2:2 "Mumere nk’impinja zivutse vuba, mwifuze amata y’umwuka adafunguye, kugira ngo abakuze abageze ku gakiza"

Ukwifuza nk'uko kurera, ni kwiza, kandi Bibiriya idushishikariza kukugira. Ariko rero ibyo kwitondera:

1) Ukwifuza kose, kabone n'ubwo kwaba ari kwiza, kugomba kuza nyuma y'ubushake bw'Imana. Igihe dusenga tugomba kwereka Imana ibyo twifuza, ibyo dukeneye, ariko tukaba twiteguye ko Imana ishobora kuba itwifuriza ibitandukanye n'uko twe dutekereza.

2) Habaho kwifuza kubi, uko tugomba kukwirinda, ni icyaha. Ukwifuza kose gutandukanye n'ijambo ry'Imana ni icyaha. Kwifuza ikintu Imana yarangije kubuzanya mu Ijambo ryayo ni icyaha.

3) Kwifuza ikintu cyane, kabone n'ubwo icyo kintu cyaba atari icyaha, ukagera ku rwego rwo kukirarikira, ni bibi. 1 Timoteyo 6:10 "Kuko gukunda impiya ari umuzi w’ibibi byose, hariho abantu bamwe bazirarikiye barayoba, bava mu byo kwizera bihandisha imibabaro myinshi."

4) Kwifuza amafaranga arenze ayo ukeneye, si icyaha ariko ni ibyo kwitondera. 1 Timoteyo 6:9 "Kuko abifuza kuba abatunzi bagwa mu moshya no mu mutego, no mu irari ryinshi ry’ubupfu ryangiza, rikaroha abantu mu bibahenebereza bikabarimbuza."

5) Irari ryose aho riva rikagera ni icyaha, ntiribarizwa mu kwifuza ahubwo ribarirwa mu byaha. 1 Abatesalonike 4:4-5 "...umuntu wese muri mwe amenye gutegeka umubiri we wezwe ufite icyubahiro, mudatwarwa n’irari ryo kurigira nk’abapagani batazi Imana"

Iyo Umukristo abayeho ubuzima bunezeza Imana, Imana na yo imubashisha kuringaniza ibyifuzo bye n'ubushake bw'Imana. Iryo ni ihame. Muri make, iyo ibyifuzo byacu bizingiye ku byo Imana yifuza, aho ni ho dusezeranywa ngo "dusabe icyo dushaka cyose tuzagihabwa".

Ikindi Umukristo wese agomba kumenya, ni uko iyo uri mu Mana uhagazemo neza, Imana ntiguha ibyo ushaka ahubwo iguha ibyo ukeneye. Ikibazo gikunze kuvuka kenshi iyo Umukristo yarangije guhabwa ibyo akeneye byose, ariko we akarenzaho agakomeza kwifuza ibyo ashaka. Ibyo rwose ni ibyo kwirinda kuko amaherezo bibyara irari, irari na ryo rigakura rikabyara icyaha.

Murakoze, Uwiteka abagirire neza

Answered: Ituro ry'umuganura ni iki? ese Umukristo ategetswe gutanga ituro ry'umuganura?

Tue, 26 Sep 2023 19:24:13 +0000

Iki ni ikibazo abakristo benshi bakunze kwibaza, mbere yo kugisubiza byaba byiza tubanje kureba icyo umuganura usobanura n'inkomoko yawo.

Igihe Abisirayeli bavaga muri Egiputa berekeza i Kanani, bageze mu butayu bahabwa amategeko n'amabwiriza atandukanye agamije gutunganya imibereho hagati yabo ubwabo no hagati yabo n'Imana. Hari amaturo n'ibitambo by'ubwoko butandukanye basabwe kujya bazana imbere y'Imana, hakabamo amaturo yitwa ay'umuganura. Mu ndimi z'amahanga iri jambo risobanuzwa "firstfruits" cyangwa "Premices".

Umuganura = Umusaruro wa mbere.

Umuganura ni iki?: Mu ijambo rimwe umuganura = umusaruro wa mbere. Itegeko rya mbere ryahawe Abisirayeli ryo kuzanira Imana umuganura rigaragara mu Kuva 23:19 “Umuganura w’ibibanje kwera mu butaka bwawe, ujye uwuzana mu nzu y’Uwiteka Imana yawe..." ; Aya mabwiriza yari asobanutse neza kandi afite agaciro ku buryo byari bibujijwe kwisarurira no kurya utarazana umuganura mu nzu y'Imana.

Abalewi 23:14 "Ntimukagire umutsima murya cyangwa impeke zikaranze cyangwa amahundo mabisi, uwo munsi utarasohora ngo muganurire Imana yanyu. Iryo rizababere itegeko ridakuka mu bihe byanyu byose no mu buturo bwanyu bwose".

Umuganura ni umwe mu minsi mikuru ikomeye Abisirayeli bagiraga, haba mu gihe cyo mu butayu cyangwa bamaze kugera mu gihugu cy'isezerano, dore ko wizihizwaga mu bihe bya Pasika: Habanzaga Pasika yabaga ku munsi wa 14 w'ukwezi kwa Nisan, ku munsi wa 15 hagahita hajyaho umunsi mukuru w'imitsima idasembuye, ku munsi wa 16 hagahita hajyaho umunsi mukuru w'umuganura. Mu isezerano rishya, ntaho Bibiriya igaragaza itegeko ryo gukomeza umunsi mukuru w'umuganura. Ukoresheje Bibiriya Yera, ijambo "umuganura" ribonekamo kenshi mu isezerano rya cyera aho riganisha ku munsi mukuru w'ibisarurwa by'imyaka ya mbere nk'uko byahoze, rikanaganisha ku "musaruro wa mbere w'ibikorwa runaka".

Mu isezerano rishya, Bibiriya yita Yesu "Umuganura w'abasinziriye", bisobanuye ko ari we wabanjirije abagomba kuzuka mu izuka rishya: 1 Korinto 15:20 "Ariko noneho Kristo yarazutse, ni we muganura w’abasinziriye." Ibindi byanditswe twavuga ni nka: Abaroma 16:5 "Muntahirize Itorero ryo mu rugo rwabo, muntahirize na Epayineto uwo nkunda, ari we muganura w’abo muri Asiya bahindukiriye Kristo." (Bishatse kuvuga ngo Epayineto ni we wabaye uwa mbere wahindukiriye Kristo muri Asiya)

Ese Umukristo ategetswe gutanga ituro ry'umuganura? Tumaze gusobanura icyo umuganura ari cyo. Ntabwo Imana yasabye abantu kuyiha umuganura w'umusarura wabo kuko hari icyo icyennye, abakristo bagomba mbere na mbere kumva ko umuganura ari ikibazo cyo "gushima (Thanks-giving)". Guhera kera, kuzanira Imana umuganura byari ukuvuga ngo "Warakoze Mana, narahinze narejeje, narakoze narungutse.... none mbere y'uko ndyoherwa n'umusaruro wanjye, mpisemo kubanza kugushimira." Nta cyaha kirimo rwose kandi si ubuyobe kuba umuntu yazana umuganura mu nzu y'Imana, ariko akaba asunitswe n'umutima ukunze kurusha uko yasunikwa n'itegeko.

Ubu abenshi mu barimo gusoma baribaza bati ko tudahinga, umuganura wacu ni iki? Ibyo ni byo bakunze kumbaza bibaza niba bagomba kuzana umushahara wabo wa mbere. Rwose niba utarasobanukirwa n'impamvu zo kuzana umuganura, ntacyo bimaze kuwuzana ku bw'itegeko ritanahari. Ntacyo bikumariye gutanga umushahara wawe wa mbere mu rusengero niba utarasobanukirwa n'impamvu ugomba kuwutanga. Itegeko ririca, kandi "imbaraga z'ibyaha ni amategeko" (1 Abakorinto 15:56). Niba wumva ukwiriye gushima Imana kuko yaguhaye akazi nyuma y'imyaka uyigasaba, niba umutima wawe ukwemeza ko ukwiriye kwemera ko ibyo ubonye ubikesha Imana, ahongaho Umwuka Wera azakwemeza ko ukwiriye kuzana umuganura mu rusengero.

Uko byangenda kose, buri Mukristo wese agomba kuzirikana iki cyanditswe: 2 Abakorinto 9:7 "Umuntu wese atange nk’uko abigambiriye mu mutima we, atinuba kandi adahatwa kuko Imana ikunda utanga anezerewe."

Murakoze, Uwiteka abagirire neza.

Answered: Special: Sobanukirwa uko wagenzura Ubuhanuzi ngo umenye niba buvuye ku Mana koko

Tue, 26 Sep 2023 08:08:25 +0000

Ikibazo cyo kumenya niba ubuhanuzi bwakugezeho ari ukuri cyangwa ari ikinyoma ni ikibazo gihangayikisha abizera ku rwego rwo hejuru. Kandi bifite ishingiro, kuko Yesu yaduteguje ko mu minsi ya nyuma abahanuzi b'ibinyoma bazaba benshi. Ni byo ko Imana ishobora kutuyobora no kutuvugisha biciye mu buryo butandukanye, bumwe muri bwo ni ubuhanuzi. Uyu munsi turasesengura dukoresheje Bibiriya turebe uko wamenya niba ubuhanuzi buvuye ku Mana koko.

Umuhanuzi si umuntu uvuga ibizaba gusa (future): Umuntu wigisha, wungura abantu ubwenge, ubayobora akoresheje ijambo ry'Imana, akabasobanurira ibyahise, akababwira ibiriho, cyangwa ibizaba, ni umuhanuzi. Ibyakozwe n'Intumwa 15:32 "Yuda na Sila kuko na bo bari abahanuzi, bahuguza bene Data amagambo menshi barabakomeza." Biragaragara ko nubwo Bibiriya ivuga ko Yuda na Sila bari abahanuzi, icyo bakoraga ntabwo ari ukuvuga ibizaba gusa, ahubwo bahuguraga benedata bakababwira amagambo yo kubakomeza.

Guhanura ni kimwe mu mihamagaro uko ari 5 ivugwa muri Bibiriya (Efeso 4:11-12), bikaba n'imwe mu mpano 9 za Mwuka Wera (1 Kor 12:6-10). Tubanze tubabwire ko atari byiza na gato kujya gushaka umuhanuzi ngo aguhanurire. Iyo Imana yahisemo kukuvugisha ikoresheje umuhanuzi imugutumaho. Igihe ubuhanuzi buje, bugenzure, ugundire ibyiza. Bibiriya igira iti 1 Tes 5:19-21 [19]Ntimukazimye Umwuka w'Imana [20]kandi ntimugahinyure ibihanurwa,[21]ahubwo mugerageze byose mugundire ibyiza"

Kuva cyera hahozeho abahanura ibyo mu byuyumviro byabo yabo, kandi Imana itabatumye. Yeremiya 14:14-15 [14]Maze Uwiteka arambwira ati “Abahanuzi bahanura ibinyoma mu izina ryanjye, si jye wabatumye kandi sinabategetse, haba no kuvugana na bo. Babahanurira iyerekwa ry'ibinyoma, n'iby'ubupfumu n'ibitagize umumaro, n'uburiganya bwo mu mitima yabo."

Muri iyi minsi ubuhanuzi bureze hirya no hino. Bumwe ni ubw'ukuri, ubundi ni ibinyoma. Igihe Umukristo yakiriye ubuhanuzi, agomba kubucisha mu kayunguruzo, Bibiriya ibivuga muri aya magambo: 1 Yh 4:1 "Bakundwa, ntimwizere imyuka yose ahubwo mugerageze imyuka ko yavuye ku Mana, kuko abahanuzi b'ibinyoma benshi badutse bakaza mu isi."

Hari akayunguruzo kagizwe n'ibintu 7 by'ingenzi byafasha Umukristo kumenya niba ubuhanuzi bwamugezeho ari ukuri: Tubirebe dukoresheje Ijambo ry'Imana:

1) IJAMBO RY'IMANA

Nta na rimwe ubuhanuzi bushobora kunyuranya n'Ijambo ry'Imana. Kirazira kikaziririzwa, n'iyo Mose yazuka akaguhanurira ibinyuranye na Bibiliya ntuzabyemere. Gal 1:8 "Ariko nihagira ubabwiriza ubutumwa butari ubwo twababwirije, ari twe cyangwa ndetse marayika uvuye mu ijuru, avumwe."

2) IMBUTO Z'UMUHANUZI

Muzabamenyera ku mbuto zabo. Umuhanuzi utera imbuto z'abihannye ntuzamutinye. Ibi ni Yesu wabyivugiye: Mt 7:15-17 “Mwirinde abahanuzi b'ibinyoma baza aho muri basa n'intama, ariko imbere ari amasega aryana.[16]Muzabamenyera ku mbuto zabo. Mbese hari abasoroma imizabibu ku mugenge, cyangwa imbuto z'umutini ku gitovu? [17]Nuko igiti cyiza cyose cyera imbuto nziza, ariko igiti kibi cyera imbuto mbi.

3) UMUHANUZI UHANURA UBUDASOHORA, NTUZAMUTINYE

Gutegeka kwa kabiri 18:21-22 [21]Kandi niwibaza uti “Tuzamenya dute ijambo Uwiteka atavuze?” [22]Umuhanuzi navuga mu izina ry'Uwiteka hanyuma icyo yavuze ntikibe, ntigisohore, icyo kizaba ikitavuzwe n'Uwiteka. Uwo muhanuzi azaba ahangaye kucyihimbira, ntuzamutinye."

4) UBUHANUZI BWOSE BUGOMBA GUHESHA ICYUBAHIRO KRISTO, NTIBUSHYIRA IMBERE UMUHANUZI.

Habaho abahanuzi benshi bafite icyo bita "inarijye". Inarijye ni ukuvuga Imana ariko ugamije ko wowe ushyirwa imbere, ugasanga umuntu arakangisha buri gihe ikintu kitwa "Njye, Njyewe, buri kanya agakora ibintu bigamije kwemeza abantu no kubakururira kumwemera, nk'urugero akavuga mu ndimi kenshi agamije gukanga gusa, ntanazisobanure, mbese ibye byose ukabona bigamije gutuma atinywa, cyangwa yemerwa kuruta uko yahesha Kristo icyubahiro. Mwene abo akenshi banarangwa no gusaba. Abo ntuzabatinye.

Yohana 16:13-14 [13]Uwo Mwuka w'ukuri naza azabayobora mu kuri kose kuko atazavuga ku bwe, ahubwo ibyo azumva ni byo azavuga, kandi azababwira ibyenda kubaho.[14]Uwo azanyubahiriza, kuko azenda ku byanjye akabibabwira."

5) UBUHANUZI BWOSE BUGOMBA KUBA BUGENZWA N'IBINTU 3: Kungura, guhugura, guhumuriza

(Ubuhanuzi butera ubwoba, butera guhangayika, ubuyobya, ubutera urujijo, ...... Ntuzabwemere). N'ubwo ubuhanuzi bwaba bukubwira ibitagushimishije cyangwa ibyo utifuzaga kumva, imvugo y'umuhanuzi ubwayo ntiguhahamura kurushaho, ahubwo igusunikira ku Mana kurushaho. Ese igihe Dawidi yari yasambanye, ntimwibuka imvugo y'umuhanuzi Natani uko yari imeze? 1 Kor 14:3,31 [3]Ariko uhanura we abwira abantu ibyo kubungura n'ibyo kubahugura, n'ibyo kubahumuriza." Ibyakozwe 15:30-31 "Yuda na Sila kuko na bo bari abahanuzi, bahuguza bene Data amagambo menshi barabakomeza."

6) N'IYO UMUHANUZI YAHANURA UBUSOHORA, NARAMUKA AGUHANURIYE UBUKUJYANA KURE Y'IMANA CYANGWA UBUGUKORESHA ICYAHA NTUZABWEMERE

Hari uburyo abantu bajya bemera umuhanuzi ku kigero cy'aho icyo yamubwira cyose yagikora. Ibyo babyita kwizerera mu muntu ku buryo icyo yakubwira cyose wagikora utajijinganije. Igihe kimwe higeze gutambuka amashusho ku mbuga nkoranyambaga aho Umupastori umwe mu bihugu byo hanze, yasabye abakristo be kurisha ibyatsi nk'inka, amashusho yagaragaye barimo kurisha! Nashatse kumenya niba ibintu nk'ibyo byagera n'iwacu, abo twaganiraga barambwira bati "Imana izaturindire umushumba ntzayobe... kuko ibyo azambwira byose nzabikora..."

Iki ni ikibazo gikomeye: Nubwo yaba asanzwe aguhanurira ibiri byo, umunsi yagusabye gukora ibikujyana kure y'Imana, ibikujyana mu nyigisho zipfuye, ibikujyana mu byaha.... ntuzamwemere na gato. Gutegeka kwa kabiri 13:2-4 "Muri mwe nihaboneka umuhanuzi cyangwa umurōsi, akakubwira ikimenyetso cyangwa igitangaza, [3]icyo kimenyetso cyangwa icyo gitangaza kigasohora, icyo yakubwiye agira ati “Duhindukirire izindi mana izo utigeze kumenya tuzikorere”, [4]ntuzemere amagambo y’uwo muhanuzi cyangwa y’uwo murōsi, kuko Uwiteka Imana yanyu izaba ibagerageza, ngo imenye yuko mukundisha Uwiteka Imana yanyu imitima yanyu yose n’ubugingo bwanyu bwose. [5]Ahubwo mujye muyoborwa n’Uwiteka Imana yanyu muyubahe, mwitondere amategeko yayo muyumvire, muyikorere muyifatanyeho akaramata.

7) UBUHANUZI BUHAMANYA N'UMWUKA WERA URI MURI WOWE

N'iyo ubuhanuzi bwakugeraho bukakuzanira ubutumwa utifuzaga cyangwa utari utegereje, iyo buvuye ku Mana igihe cyose buhamanya n'Umwuka Wera uri muri wowe, bigashimangirwa n'amahoro wumva mu mutima, kuko Bibiliya ihamya neza ko nawe wasizwe n'Uwera kandi uzi byose: 1 Yohana 2:20 "Nyamara mwebweho mwasīzwe n’Uwera kandi muzi byose." 1 Yohana 2:20 Umwuka w’Imana ubwe ahamanya n’umwuka wacu yuko turi abana b’Imana.

Byumvikane neza ko ibyo bintu 7 tuvuze hejuru ari byo by'ingenzi gusa, ariko ku Mukristo uri mu busabane bwiza n"Imana ashobora kumenya ko ubuhanuzi runaka buvuye ku Mana cyangwa butahavuye akoresheje Umwuka Wera umurimo. Inzira z'Imana ntizirondoreka, Imana ishobora gukoresha imwe mu nzira zayo zitazwi n'abantu kugirango yiyoborere umwana wayo.

Murakoze, Uwiteka atugirire neza.

Ev. Innocent Munyaneza

Answered: Igihe Umukristo asubiramo icyaha kimwe buri gihe, Imana izakomeza imubabarire n'ubundi n'ubundi kugeza ryari?

Sun, 24 Sep 2023 20:39:03 +0000

Mbere yo gusubiza iki kibazo, tubanze tuvuge ko bidakwiye kandi bidasanzwe ko Umukristo yibera mu cyaha kimwe kisubiramo. Iyo umukristo yabaye imbata y'icyaha runaka, agomba kwemera ko nta mbaraga yifitemo zo kukigobotora. Aragikora bikamubabaza, agasaba Imana imbabazi, ariko mu buryo na we atazi akajya kwisanga akisanga yongeye yagikoze. Aha rwose uyu muntu nta kindi cyamukiza uretse gushaka umukozi w'Imana akamukorera deliverance. Bibiriya isaba buri mukristo wese "Kwisuzuma" akareba niba akiri mu kwizera: 2 Abakorinto 13:5 "Ngaho nimwisuzume ubwanyu, mumenye yuko mukiri mu byo twizera kandi mwigerageze. Mbese ntimwimenya kandi ntimuzi yuko Yesu Kristo ari muri mwe? Keretse ahari mubaye abagawa."

Tugaruke ku kibazo cyacu: Ese Imana izakomeza ibabarire ubuziraherezo icyaha kimwe cyisubiramo buri gihe? (Gusobanukirwa neza iki kibazo, byaba byiza mubanje gusoma ibibazo bikurikira mukareba ibisubizo byabyo:

- "Ni ikihe cyaha kidashobora kubabarirwa?" kanda hano urebe igisubizo

- "Ni irihe tandukaniro hagati y'icyaha, gukiranirwa n'igicumuro? Kanda hano ukirebe

Imwe mu ntwaro satani ajya akoresha mu bugome bwe, ni ukumvisha uwakoze icyaha ko atababariwe. Ni kenshi Umukristo abana n'ipfunwe ryo kwibaza niba koko ababarirwa iyo akoze icyaha, kabone n'iyo cyaba icyaha cyisubiramo buri gihe. Dusuzumire hamwe ibi byanditswe:

- Zaburi 103:11-13 "Nk’uko ijuru ryitaruye isi, Ni ko imbabazi agirira abamwubaha zingana. [12]Nk’uko aho izuba rirasira hitaruye aho rirengera, Uko ni ko yajyanye kure yacu ibicumuro byacu.[13] Nk'uko se w’abana abagirira ibambe, Ni ko Uwiteka arigirira abamwubaha."

- 1 Yohana 1:8-10 "Nituvuga yuko ari nta cyaha dufite tuba twishutse, ukuri kuba kutari muri twe. [9]Ariko nitwatura ibyaha byacu, ni yo yo kwizerwa kandi ikiranukira kutubabarira ibyaha byacu no kutwezaho gukiranirwa kose. [10]Nituvuga yuko ari nta cyaha twakoze tuba tuyise umunyabinyoma, kandi n’ijambo ryayo ntiriba riri muri twe."

Abadayimoni barababara cyane iyo umuntu ababariwe icyaha bamugushishijemo, ni yo mpamvu bakora ibishoboka byose bakamushyiramo kujijinganya yibaza niba yarababariwe. Ibyanditswe tubonye hejuru, bigaragaza mu buryo budashidikanywaho ko igihe cyose umuntu akiriho, aba ashobora kubabarirwa icyaha yakoze igihe cyose asabye Imana imbabazi. Ibi byanditswe bitweretse ko Imana itatubabarira gusa, ahubwo inajugunya kure yayo ibyaha byacu.

ICYITONDERWA:

Uko byagenda kose, nta Mukristo wemerewe gukora icyaha yitwaje ko imbabazi z'Imana zihari. Nta wemerewe kwitwaza Ubuntu bw'Imana ngo akore icyaha nkana. Bibiriya igira iti: "Nuko tuvuge iki? Tugumye gukora ibyaha ngo ubuntu busage? Ntibikabeho! Mbese twebwe abapfuye ku byaha, twakomeza kuramira muri byo dute?" (Abaroma 6:1-2)

Bibiriya iburira mu buryo bukomeye abantu bakora ibyaha babigendereye, bakabikora nkana bitwaje ko babizi neza ko bazababaririrwa kandi baramaze kumenya ukuri. Ibivuga muri aya magambo: "Niba dukora ibyaha nkana tumaze kumenya ukuri, ntihaba hagisigaye igitambo cy’ibyaha, keretse gutegerezanya ubwoba gucirwa ho iteka, no gutegereza umuriro w’inkazi uzarya abanzi b’Imana." (Abaheburayo 10:26-27)

Iyo Umukristo ufite Umwuka Wera muri we aguye mu cyaha, agomba kubabara akiyumvamo "agahinda ko mu buryo bw'Imana"; Bibiriya ivuga ko mwene aka gahinda gatera "kwihana". (2 Abakorinto 7:10 "Agahinda ko mu buryo bw’Imana gatera kwihana kuticuzwa, na ko kukazana agakiza, ariko agahinda ko mu buryo bw’isi gatera urupfu.").

Naho ubundi iyo Umukristo ahisemo kugereka icyaha ku kindi, akihana ejo akacyongera, akihana ejo akacyongera, n'ubwo yakomeza kubabarirwa ku bw'imbabazi z'Imana zitagira akagero, ariko ubwo buzima bumuzanira imibereho yumye kandi yuzuyemo ingaruka zitandukanye mu buryo bw'umubiri.

Imana ibahe umugisha.

Answered: Special: Menya abantu 5 Umukrito akeneye mu buzima bwe mu rugendo rugana Ijuru

Sun, 24 Sep 2023 18:19:24 +0000

Murakoze cyane nshuti bavandimwe bakunda urubuga bazabibiriya.org. Uyu munsi turarebera hamwe abantu 5 buri Mukristo wifuza gukura mu buryo bwose yari akwiriye kugira mu mibereho ye.

Muri uyu murimo no muri uru rugendo, nta muntu wahamagariwe kugenda wenyine, gukura wenyine cyangwa gukora wenyine. Buri wese atitaye ku rwego ariho, nta Mukristo ugomba kuba nyamwigendaho! Buri wese yigeze kugira uwo yigiraho, yigeze kugira uwamwigisha, buri wese akeneye gutyazwa mu buryo bumwe cyangwa ubundi, uko byangenda kose buri wese akeneye mugenzi we mu buryo bumwe cyangwa ubundi. Yesu na we akiri hano mu isi yivugiraga ko we na Se bakorera hamwe, mu bumwe bwuzuye. Yesu yatoranije intumwa 70. Muri 70 atoranyamo 12. Muri 12 atoranyamo 3 (Yakobo, Yohana na Petero). Muri eshatu yagiraga imwe yakundaga kurusha izindi (Yohana) akagira n'undi umukunda kurusha abandi (Petero). Ibi bitwereka mu buryo budasubirwaho ko atari icyaha, si n'ikosa, gutoranya abantu wumva bafite icyo bagufasha ukabiyumvamo kurenza abandi.

Dushingiye kuri Bibiriya n'inyigisho zayo, hari abantu batanu bafasha Umukristo mu rugendo turimo. Aba bantu uko ari batanu, Umukristo ni we ubihitiramo bitewe n'impamvu zitandukanye, nta muntu washakira undi umwe muri aba bantu batanu. Reka tubarebere hamwe:

1. UMUBEYI WO MU MWUKA. (Spiritual Father/Mother, Père Spirituel).

Buri wese azi akamara k'umubyeyi w'umuntu. Ibyo papa wo mu mubiri akumarira mu buryo bw'umubiri, Papa wo mu mwuka na we abikumarira mu buryo bw'Umwuka. Mbere yo kuvuga byinshi kuri papa wo mu Mwuka, tubanze tuvuge kuri ibi byanditswe:

1 Timoteyo 1:2 "Ndakwandikiye Timoteyo, umwana wanjye nyakuri nibyariye mu byo kwizera..."

Tito 1:4 "Ndakwandikiye Tito, umwana wanjye nyakuri ku bwo kwizera dusangiye...."

Filemoni 1:10 "Ndakwingingira umwana wanjye nabyariye mu minyururu yanjye Onesimo,.."

Twese turabizi ko pawulo atigeze ashaka umugore, nta n'umwana yagiraga mu buryo bw'umubiri. Ariko aba bana abita abe: Timoteyo, Tito, Onesimo n'abandi. Birumvikana ko ari mu buryo bw'Umwuka nk'uko na we abyivugira. Na bo kandi ni ko bamufataga, bamufataga nka Papa mu buryo bw'Umwuka. Baramwumviraga, akabatuma, bakamutumikira.

Umubyeyi wo mu Mwuka akenshi aba ari n'umushumba wawe kuko ni we ubasha kukwitaho uko bikwiriye mu buryo bwa hafi. Rimwe na rimwe Abakristo bahitamo uwababyaje ubutumwa bwiza akaba ariwe bafata nk'umubyeyi wo mu Mwuka, ibyo si ikibazo. Ibyo aribyo byose, umubyeyi wawe wo mu Mwuka mugomba kuba muziranye bya hafi, kandi agomba kuba ari umuntu ufite icyo akurusha mu buryo bw'Umwuka ku buryo hari icyo yakumararia muri ibi bikurikira:

- Akwitaho mu kugusengera no kumenya ibyo ukennye mu Mwuka

- Akugaburira ijambo n'izindi nyigisho zigukuza mu Mwuka

- Akugira inama zikenewe haba mu by'Umwuka cyangwa iby'umubiri bisanzwe

- Umwisanzuraho ukamumenyesha ibikugoye n'ibikubabaje kugirango abone aho ahera akugira inama.

Abakristo bamwe bazinutswe ibyo kumva iby'ababyeyi bo mu Mwuka kuko wenda bababonyeho inenge cyangwa icyaha, ariko bagomba kwibuka ko kwitwa umubyeyi wo mu mwuka bitaguhindura umumarayika. Na bo bakwiye gusengerwa, na Pawulo uko yandikaga akenshi yasozaga avuga ati "Munsengere...."

2. ROLE MODEL (Umuntu wifuza gusa na we)

Uyu ni umuntu uhora wifuza gusa na we. Si ngombwa ko amenya ko umufata nka role model, wowe gusa uramwitegereza imibereho, imikorere, imivugire, ukumva wifuje kumwigana no gusa na we. Pawulo yandikira abafilipi yarababwiye ati: "Ibyo nabigishije, ibyo nababwirije, ibyo mwanyumvanye, n’ibyo mwambonanye abe ari byo mukora. Ni bwo Imana itanga amahoro izabana namwe." (Abafilipi 4:9). Kureba Pawulo, kumva Pawulo, ukumva urifuza kumwishushanyaho, ubwo ni Role model wawe. Role model wawe si ngombwa ko muba muziranye. Si na ngombwa ko yaba akiriho, umuntu ashobora kukubera role model atakiri no muri uyu mubiri. N'iyo yaba ariho, si ngombwa ko umwigereraho ngo umuvugishe. Kumwitegereza gusa ukumva wifuje kumera nka we no gukora nka we ni byo bimugira Role model wawe. Umuntu ashobora kugira ba role models benshi: Hari abo ushobora kwigiraho iby'umubiri, abandi ukabigiraho iby'umwuka.....

3. ICYITEGEREREZO (Exemplaire)

Umuntu ufata nk'icyitegererezo ni umuntu uba uzi, akaba ariho kandi mukaba muziranye, ukamwitegereza ukumva wifuza kugira icyo wamwigiraho kuko akubera intangarugero. Aho atanira na role mode ni uko Umuntu w'icyitegererezo we agomba kuba ariho, mugomba no kuba muziranye ndetse mushobora no kuganira, ukamubaza ibibazo bitandukanye, ukamusobanuza byinshi. Dore uko Pawulo yandikiye abana be (Mu Mwuka): Tito 2:7-8 "Wiyerekane muri byose nk’icyitegererezo cy’imirimo myiza, kandi mu iyigisha ryawe ugaragaze uko uboneye udapfa gutera waraza, n’ijambo ryawe ribe rizima ritariho umugayo, kugira ngo umuntu uri mu ruhande rw’ababisha amware atabonye ikibi yakuvuga." Iri jambo rirakomeye: Umuntu ufata nk'icyitegererezo agomba kuba aboneye mu mirimo myiza, agomba kuba aboneye mu byo yigisha, amagambo ye agomba kuba mazima atariho umugayo, mbese ku buryo bigoye kugira ikibi wamuvugaho. 1 Timoteyo 4:12 "Ntihakagire uhinyura ubusore bwawe, ahubwo ube icyitegererezo cy’abizera ku byo uvuga, no ku ngeso zawe no ku rukundo, no ku kwizera no ku mutima uboneye."

Ibi na byo birasobanutse: Umuntu ufata ck'icyitegerezo cyawe agomba kuba aboneye mu byo avuga, mu ngeso ze, mu rukundo, mu kwizera no ku mutima uboneye. Umuntu nk'uwo Pawulo yavugaga, iyo umwegereye ukamugira inshuti hari icyo umukuraho.

4. MENTOR: (Umutyaza, Umwigisha)

Mentor kumubonera ikinyarwanda byatugoye ariko mutwemerere tumwite umutyaza. Umutyaza ni umuntu wemera kujya ku birenge bye ukemera ko hari icyo akurusha akakwigisha. Umuntu ashobora kukubera kimwe mu byo twavuze haruguru akanakubera umutyaza. Umutyaza akwigisha mu bikorwa, si mu magambo. Umutyaza arakora ukareba, ukiga ibyo akora, amaherezo ukazabikora nawe. Mentor ntakwigisha iby'umwuka gusa, yanakwigisha iby'umubiri bisanzwe. Ushobora kureba umuntu uzi gukora umwuga runaka, akazi runaka, ukumva wifuje kumwigiraho. Si ikosa rwose kwemera ko hari icyo ukeneye kumenya, ukamwegera akagutyaza. Umunsi Eliya yahamagaye Elisa, Elisa yasize byose yemera gukurikira Eliya, akajya amukorera. Dore uko Bibiriya ibivuga:1 Abami 19:20-21 "Maze Elisa asiga inka aho arirukanka, akurikira Eliya aramubwira ati “Ndakwinginze reka mbanze njye guhoberana na data na mama, mbone kugukurikira.” Na we aramubwira ati “Subirayo, hari icyo ngutwaye?” [21]Nuko arorera kumukurikira, asubirayo yenda inka ebyiri arazica, atekesha inyama ibiti by’imitambiko yazo, agaburira abantu bararya. Aherako arahaguruka akurikira Eliya, akajya amukorera."

Elisa yaremeye aba umugaragu wa Eliya: Akamutekera, akamumesera, ariko akaba afite icyo akurikiye, yari ari mu ishuri. Umusaruro wavuyemo: Byarangiye Elisa abonye inshuro 2 z'Umwuka wari kuri Eliya, ku buryo igitangaza cya nyuma Eliya yakoze ni cyo Elisa yatangiriyeho, ndetse n'ibitangaza Eliya yakoze Elisa yabikubye kabiri! Iyo utarangaye Mentor wawe amaherezo umukuraho umwitero! Elisa yasigaranye umwitero wa Eliya; Elisa na we yari afite umugaragu witwaga Gehazi.Gehazi yabaye umunyeshuri mubi, ntiyamenye agaciro ka mentor we, aho guharanira umwitero wa Shebuja aharanira ubutunzi buciye mu byaha, mu kimbo cy'umwitero yagabanye ibibembe! Dore uko Pawulo avuga Mentor Ibyakozwe n'intumwa 7:58 “Ndi Umuyuda wavukiye i Taruso y’i Kilikiya, ariko nakuriye muri uyu murwa, nigishirizwa ku birenge bya Gamaliyeli kwitondera cyane amategeko ya ba sogokuruza yose, ngira ishyaka ry’Imana nk’uko namwe mwese murigira none." Pawulo yigiye ku birenge bya Gamaliyeli; Elisa yigiye ku birenge bya Eliya, Timoteyo yigiye ku birenge bya Pawulo, ..... Si icyaha rwose si n'ikosa kugira uwo wigira aho gukora, nta n'ubwo twemeranya n'abakristo bikomanga ku gatuza bakavuga ko bazigishwa na Mwuka wera gusa..... None se bafite Umwuka Mwinshi kurusha uwari muri Pawulo? Barusha Elisa se? Pawulo yazuye umuntu, Elisa yazuye babiri, nyamara mbere y'ibyo byose baciye bugufi bajya ku birenge by'abo bemera ko hari icyo babarusha, bariga! Birakwiye rwose kugira uwo wigiraho gukora, Imana idufashe.

5. INSHUTI IRUTA IZINDI (Best Friend)

Muri ubu buzima umuntu agira inshuti nyinshi, ariko ni byiza kugira inshuti iruta izindi. Mu kinyarwanda hari abakoresha ijambo "Inshuti-magara", si icyaha. Twatangiye tubivuga ko na Yesu ubwe mu bigishwa be 12, hari aho yageraga mu bihe by'umwihariko agatoranyamo batatu,Yakobo, Yohana na Petero, akaba aribo bagirana ibihe by'umwihariko. Ndetse no muri abo batatu, Bibiriya ivuga ko harimo umwe Yesu yakundaga, ari we Yohana; Dawidi yari afite inshuti nyinshi, ariko muri zo akagira inshuti iruta izindi yitwaga Yonatani. Barakundanaga ku buryo ni bo bantu bonyine Bibiriya ivuga ko umwe yakundaga undi nk'uko yikunda. Yonatani yashyize ubizima bwe mu kaga inshuro nyinshi arengera ubuzima bw'inshuti ye Dawidi. Ngo imitima yabo bombi yari yarabaye nk'agati gakubiranye! 1 Samuel 18:1 "Nuko Dawidi amaze kuvugana na Sawuli, umutima wa Yonatani uherako uba agati gakubiranye n’uwa Dawidi, kandi Yonatani akamukunda nk’uko yikunda". Ubu bushuti bwabo ntibwari ubw'agahararo, kuko batangiye gukundana Yonatani ari umwana w'umwami, Dawidi ari umushumba. Bamaze gukura n'ubundi bakomeje gukundana, bakajya babitsanya amabanga y'ubuzima akomeye.

Ngabo bantu 5 buri Mukristo wese akwiriye kuba afite mu buzima bwe. Buri wese afite uko ahitamo, ariko cyane cyane ni ngombwa igihe cyose kuyoborwa na Mwuka Wera nkuko atuyobora mu buzima bwa buri munsi.

Murakoze, Imana ibahe umugisha

Answered: Ese birashoboka kubaho ubuzima budakora icyaha muri iyi si?

Sat, 23 Sep 2023 18:38:12 +0000

Hari ibintu abantu bihimbiye babivuga cyane kugeza aho benshi bakeka ko byanditse muri Bibiriya. Urugero: Ngo "N'Intungane bwira icumuye karindwi...." Reka rwose tubanze dukureho urujijo: Ibyo ntaho byanditse muri Bibiriya Yera.

Dusubire ku kibazo cyacu: Ese birashoboka kubaho ubuzima budakora icyaha hano mu isi? Dusuzume iki kibazo twifashishije ibyanditswe byera: Abefeso 4:11-13 Bibiriya igira iti: "Nuko aha bamwe kuba intumwa ze, n’abandi kuba abahanuzi, n’abandi kuba ababwirizabutumwa bwiza, n’abandi kuba abungeri n’abigisha, [12]kugira ngo abera batunganirizwe rwose gukora umurimo wo kugabura iby’Imana no gukomeza umubiri wa Kristo, [13]kugeza ubwo twese tuzasohora kugira ubumwe bwo kwizera no kumenya Umwana w’Imana, kandi kugeza ubwo tuzasohora kuba abantu bashyitse bageze ku rugero rushyitse rw’igihagararo cya Kristo."

Umurongo wa 13 hari aho utsindagira uti "Kugeza ubwo tuzasohora kuba abantu bashyitse bageze ku rugero rushyitse rw’igihagararo cya Kristo". Aka gace mutwemerere tukarebe uko Bibiriya ikavuga mu ndimi z'amahanga: "Till we all come in the unity of the faith, and of the knowledge of the Son of God, unto a perfect man..."; "Jusqu'à ce que nous nous rencontrions tous dans l'unité de la foi, et de la connaissance du Fils de Dieu, dans l'état d'un homme parfait, dans la mesure de la parfaite stature de Christ". Uyu murongo uravuga ngo "Kugeza ubwo tuzashobora kuba abantu bashyitse." mu cyongereza version nyinshi zikoresha ijambo "PERFECT", cyangwa "PARFAIT" mu gifaransa. Ese umuntu ashobora kuba parfait akiri mu isi? Kuba parfait, bisobanuye ngo ni nta makemwa 100%, nta nenge 100%, nta defaut 100%, nta cyaha 100%, nta kosa 100%! Uwo murongo twatinzeho haruguru, ntabwo rwose usobanura ko dushobora kuba ba Ntamakemwa 100%!; Icyakora, uko dukura mu Mwuka, uko dukomera mu Mwuka, umunsi ku wundi tugenda duhinduka kandi dukomera, tugasatira ikigero kiza Imana itwifuzaho, ariko kugera ku gihagararo cya Kristo byo rwose ntaho Bibiriya yigisha ko bishoboka tukiri mu mubiri hano mu isi. ICYAKORA, uko tugenda turushaho kwegera cya gihagararo twavuze haruguru, muri Kristo Yesu Imana itureba mu buryo butandukanye n'ubwo isi itubonamo: Abakolosayi 1:28 "Ni we twamamaza tuburira umuntu wese, tumwigisha ubwenge bwose kugira ngo tumurikire Imana umuntu wese, amaze gutunganirizwa rwose muri Kristo."; murabona iri jambo "Gutunganirizwa rwose muri Kristo," ngibyo ibyo Imana idushakaho!

Ubundi kuva umuntu wambere yacumura, umuntu yinjiye muri kamere ibogamira ku cyaha. (Sinful nature). Buri muntu wese aho ava akagera, agira iyo kamere ibogamira ku cyaha muri we: Nowa, Aburahamu, Isaka, Yakobo, Yosefu, Yuda, Dawidi, Salomon, Petero, Pawulo.... Njyewe, wowe, apotre., Pastor, ..... buri wese arayigendana. Icyo ni cyo cyatumye Imana iha abisirayeli amategeko, ariko amategeko ntabwo yari agamije gutunganya umuntu, ahubwo yari agamije kumwereka uwo ari we. Ni nk'indorerwamo: Iyo wirebye mu ndererwamo ufite umwanda mu maso, indorerwamo ikwereka ko ufite umwanda, ariko nta ruhare rundi igira mu kugukuraho uwo mwanda. Nta watekereza ko habaho umuntu uri perfect, ariko Bibiriya itubwira ko hariho gukiranuka kundi kwahishuwe (gutandukanye n'uko abantu bibwira); Abaroma 3:21-22 "Ariko noneho hariho gukiranuka kw’Imana kwahishuwe kudaheshwa n’amategeko, nubwo amategeko n’ibyahanuwe ari byo biguhamya, [22]ni ko gukiranuka kw’Imana abizeye bose baheshwa no kwizera Yesu Kristo ari nta tandukaniro." (Bisobanuye ko uko Imana itubona iturebeye muri Yesu, bitandukanye n'uko abantu batubona baturebeye mu mubiri).

Pawulo we yarirebye, yanga kwirarira ati "Mu banyabyaha ni jye w'imbere!" (1 Timoteyo 1:15). Muri version zo mu zindi ndimi, akoresha ijambo "Chief of sinners"! Yari abizi ko yababariwe, ariko ntiyanirengagizaga ko atari ntamakemwa kuva ari umuntu! Kubaho ubuzima buzira ikizinga, buzira amakemwa, buzira icyaha; hano mu isi ni inzozi. Ntibishoboka; Ubwabyo no kuba uri umuntu birahagije ngo ube udatunganye. 1 Yohana 1: 8-10: "Nituvuga yuko ari nta cyaha dufite tuba twishutse, ukuri kuba kutari muri twe. Ariko nitwatura ibyaha byacu, ni yo yo kwizerwa kandi ikiranukira kutubabarira ibyaha byacu no kutwezaho gukiranirwa kose. Nituvuga yuko ari nta cyaha twakoze tuba tuyise umunyabinyoma, kandi n’ijambo ryayo ntiriba riri muri twe."

Ariko rero, nubwo tudakiranuka mu maso y'isi, iyo Imana iturebeye muri Yesu dufatwa nk'abakiranuka, gusa hari igihe tuzambikwa gukiranuka kwa nyako Yesu nagaruka gutwara umugeni we! Uyu mubiri ubora numara kwambikwa kutabora, n'uyu mubiri upfa numara kwambikwa kudapfa, urubori rw'urupfu n'byaha bizazima burundu! Impamvu yabyo iri muri uyu murongo: 1 Abakorinto 5:21: "Kuko Utigeze kumenya icyaha Imana yamuhinduye kuba icyaha ku bwacu, kugira ngo muri we duhinduke gukiranuka kw’Imana."

Murakoze, Imana ibahe umugisha.

Answered: Bivuze iki "Kwikorera umusaraba wawe ugakurikira Yesu?

Sat, 23 Sep 2023 18:07:11 +0000

Iryo jambo riboneka ahantu hatatu muri Bibiriya aho rigira riti: “Umuntu nashaka kunkurikira yiyange, yikorere umusaraba we ankurikire" (Matayo 16:24) (Mariko 8:34) (Luka 9:23) Mbere yo kuvuga icyo iri jambo risobanura, mutwemerere tubanze tuvuge icyo ridasobanura.

Twagiye twumva kenshi abantu bahumuriza abandi bababwira ngo "Ubwo uwo ni wo musaraba wawe nyine, ihangane ntakundi.... n'ibindi nk'ibyo". Umusaraba wagiye ufatwa mu buryo butaribwo nk'ikibazo cy'ingutu umuntu atapfa kwigobotora mu buryo bworoshye: Indwara idakira, ikibazo kiremereye, ubukene burambye, gupfusha cyane.... n'ibindi nkibyo. Ibyo byose nta na kimwe umusaraba usobanura, Nta naho bihuriye n'icyo Yesu yashaka kuvuga ubwo yavugaga ati "...yikorere umusaraba we, ankurikira."

Igihe Yesu yari yikoreye umusaraba awerekeza i Golgota, abamubonaga icyo gihe ntibatekerezaga umusaraba nk'ikimenyetso cy'ikibazo runaka. Ku muntu wo mu kinyejana cya mbere, umusara wasobanuraga ikintu kimwe rukumbi: Urupfu. Muri ibi bihe byacu, Abakristo tubona umusaraba nk'ikimenyetso cyo gucungurwa, imbabazi, ubuntu n'urukundo, ariko mu gihe cya Yesu siko byari bimeze, umusaraba wasobanuraga urupfu. Iyo wabonaga umuntu wikoreye umusaraba, wahitaga umenya nta gushidikanya ko uwo muntu yatanzwe, agomba gupfa. Icyo gihe iyo abaromani bagukatiraga urupfu rwo ku musaraba, bagutegekaga kwikorera umusaraba wawe uri bubambweho, ukawucana mu nzira yose uwerekeza aho uri bubambwe, aho uciye hose bigafatwa nk'isoni n'ikimwaro.

Kubera izo mpamvu rero. Kwikorera umusaraba wawe ugakurikira Yesu bisobanuye kuba witeguye gupfa, wowe wa kera agapfa, ukaba undi wundi ukamukurikira ntaho uhuriye na wowe wa kera.

Hari akajambo kari muri uwo murongo abantu bakunze kwirengagiza: "Maze Yesu abwira abigishwa be ati “Umuntu nashaka kunkurikira yiyange, yikorere umusaraba we ankurikire". Abantu bareba "Kwikorera umusaraba gusa bakibagirwa ko harimo no "kwiyanga." Mbere yo kwikorera umusaraba umuntu agomba kubanza kwiyanga. Igihe ukikunda, wowe wa kera ntashobora gupfa. Kwiyanga ukikorera umusaraba ni icyemezo umuntu afata atitaye ku bimukikije, yaba ameze neza cyangwa nabi, yaba akize cyangwa akennye, yaba ari muzima cyangwa arwaye, murumva ko ntaho bihuriye no kwemera ibigukandamije ubyita umusaraba wawe.

Ushobora kuba wibaza niba witeguye kwikorera umusaraba wawe ngo ukurikire Yesu. Hari ingingo zagufasha:

- Ese witeguye gukurikira Yesu kabone nubwo byagusaba gutakaza inshuti zawe?

- Ese witeguye gukurikira Yesu kabone nubwo byagusaba kwangwa n'umuryango?

- Ese witeguye gukurikira Yesu kabone n'ubwo icyubahiro cyawe cyahagwa?

- Ese witeguye gukurikira Yesu kabone n'ubwo byagusaba gutakaza akazi kawe?

- Ese witeguye gukurikira Yesu kabone n'ubwo byagushyira mu kaga ko kuhasiga ubuzima?

- Ese witeguye kureka ibya kera, kamere ya kera, ibyaha....?

Bamwe mu biyemeje gukurikira Yesu, ibyo tuvuze hejuru byababayeho. Ikindi kandi, kwiyemeza gukurikira Yesu ntibisobanuye ko ibyo tuvuze hejuru bizakubaho byanze bikunze. Ikibazo gikomeye ni iki: Ese biramutse bikubayeho, biramutse bigusabye guhitamo, wafata umwanzuro uhamye ugakurikira Yesu? Niba igisubizo ari Yego itajijinganywaho, ubwo wowe wa kera yarapfuye, wikoreye umusaraba wawe ukurikira Yesu!

Luka 14:27 Bibiriya igira iti: "Utikorera umusaraba we ngo ankurikire, ntashobora kuba umwigishwa wanjye." Kuba umwigishwa wa Yesu ni ugufata umwanzuro uhamye, ugakura amaso ku butunzi bwawe, ku nshuti zawe, ku muryango wawe, ku nzozi zawe....ndetse no ku buzima bwawe, ukayahanga Yesu.

Ngibyo kwikorera umusaraba wawe!

Uwiteka abagirire neza kandi abahe umugisha.

Answered: Bibiriya ivuga iki ku cyacumi? Ese ni ngombwa gutanga icyacumi?

Mon, 18 Sep 2023 22:37:15 +0000

Bibiriya yose ivuga ibijyanye n'amafaranga inshuro zigera kuri 800, ndetse n'imigani Yesu yigishirizagamo, kimwe cya kabiri cyayo gifite aho gihurira n'amafaranga! Kubera iki? Kuko iyi ngingo ishitura imitima y'abatari bake, haba kera cyangwa ubu.

Icyacumi ni imwe mu nyigisho zo muri Bibiriya zagiye zikurura impaka z'urudaca kugeza n'ubu. Bamwe baravuga bati ibyo bintu byarangiranye n'isezerano rya kera, abandi bati Isezerano rishya ntacyo ribivugaho, abandi bati Abashumba baba bishakira indamu, n'ibindi bitandukanye mujya mwumva hanze aha. Dushobora kwifashisha Bibiriya tukareba mu buryo budasubirwaho icyo ivuga kuri iki kibazo.

1: INKOMOKO Y'ICYACUMI: Umuntu wa mbere Bibiriya itubwira wagize umutima wo gutanga icyacumi ni Aburahamu. Icyo gihe Imana yari itarasaba umuntu gutanga icyacumi, ariko Aburahamu yarabitekereje arabikora: Itangiriro 14:18-20 [18]Kandi Melikisedeki umwami w’i Salemu azana imitsima na vino, yari umutambyi w’Imana Isumbabyose. [19]Amuhesha umugisha ati “Aburamu ahabwe umugisha n’Imana Isumbabyose, nyir’ijuru n’isi, kandi Imana Isumbabyose ihimbazwe, yakugabije ababisha bawe.” [20]Nuko Aburamu amuha kimwe mu icumi cya byose."

Aburahamu yahaye Melikisedeki icyacumi, nyamara nta tegeko ryabagaho ryabimusabaga. Melikisedeki yari muntu ki? Ubundi mu Bayuda ntiwashobora kuba Umwami ngo ube n'umutambyi icyarimwe, kuko Umwami yagombaga gukomoka mu muryango wa Yuda, Umutambyi agakomoka mu muryango wa Lewi. Kuri Melikisedeki byabaye irengayobora: Yari umwami akaba n'umutambyi icyarimwe! (Itangiriro: 14:18). Bibiriya itubwira ko Yesu na we ari umutambyi mu buryo bwa Melikisedeki: Abaheburayo 6:20 "aho Yesu yatwinjiriye atubanjirije, amaze guhinduka Umutambyi mukuru iteka ryose mu buryo bwa Melikisedeki. Aburahamu yaribwirije aha Melikisedeki wo mu gihe cye icyacumi: Ese aho twe ntitwaba dutegerejweho guha Melikisedeki wo mu gihe cyacu icyacumi, tutiriwe dutegereza ko haba itegeko ribidutegeka? Reka dukurikirane Ijambo ry'Imana turebe icyo rivuga.

2) ICYACUMI MU GIHE CY'ABISIRAYELI MU BUTAYU

Igihe Abisirayeli bari mu butayu, Imana yasabye Mose gukora ihema ry'ibonaniro ahagombaga gukorerwa imirimo y'ubutambyi. Ndetse yatoranije Abalewi, ibasaba kutagira imirimo yindi bakora, keretse iy'ubutambyi mu ihema ry'ibonaniro cyangwa mu rusengero igihe bari bamaze kurwubaka bageze mu gihugu cy'isezerano. None se ko bari babujijwe kwikorera indi mirimo bagombaga gutungwa n'iki? Dore ijambo ry'Imana:

- Kubara 18:21 “Abalewi dore mbahaye kimwe mu icumi cya byose kizatangwa n’Abisirayeli, kibe gakondo yabo. Nkibahembeye imirimo bakora yo mu ihema ry’ibonaniro." Imana yabwiye abisirayeli ko icyacumi ari icyayo muri aya magambo:

- Abalewi 27:30 “Mu bimeze mu butaka byose, naho yaba imyaka cyangwa imbuto z’ibiti, kimwe mu icumi ni icy’Uwiteka. Ni icyera cy’Uwiteka".

- Gutegeka kwa kabiri 14:23 "Ntuzabure gutanga kimwe mu icumi cy’imyaka yose iva ku mbuto wabibye, iyo imirima yawe izera uko umwaka utashye."

Mu buryo budasubirwaho kandi butajijinganywaho, Imana yategetse Abisirayeli gutanga icyacumi kivuye mu byo bejeje cyangwa bungutse, kugirango abalewi bakora umurimo wayo mu ihema ry'ibonaniro babone ikibatunga.

3. INGARUKA ZO KUNANIRWA GUTANGA ICYACUMI MU ISEZERANO RYA KERA.Nk'uko mubizi, Abayuda bakoze ibyangwa n'Uwiteka, bituma bajyanwa bunyago i Babuloni bamarayo imyaka 70. Nyuma y'iyi myaka baratahutse, ariko bageze mu gihugu cyabo bateshuka ku nshingano zo kuzana icyacumi mu nzu y'Imana. Nk'uko twabibonye hejuru, Abalewi nta gakondo bahawe muri Isirayeli, bagombaga kwibera mu murimo w'ubutambyi igihe cyose, bagatungwa n'icyacumi. Kuri iyi nshuro icyacumi cyabuze mu nzu y'Uwiteka, Abalewi barasonza, barasohoka bigira mu misozi gushaka ikibatunga. Icyakurikiyeho ni uko inzu y'Imana yabaye umusaka! Dore uko Bibiriya ibivuga: Nehemiya 13:10-12 "Kandi menya yuko Abalewi ntabwo bahawe amagerero yabo, bituma Abalewi n’abaririmbyi bakoraga imirimo bahunga, umuntu wese ajya imusozi mu gikingi cy’iwabo. [11]Nuko ntonganya abatware nti “Ni iki cyatumye inzu y’Imana irekwa?” Mperako nteranya Abalewi mbasubiza ahabo. [12]Maze Abayuda bose bazana kimwe mu icumi cy’imyaka y’impeke na vino n’amavuta, babishyira mu bubiko."

Aba Balewi rwose nta wabaveba: None se bari gupfira mu nzu y'Imana bazize inzara kandi bafite amaboko? Inzu y'Imana yabuze n'uyitaho, kugeza ubwo bafashe umupagani witwaga Tobiya bamutuza mu rusengero, Nehemiya ni we waje amujugunyana hanze n'ibintu bye! Ibyo byose byari ingaruka zo kunanirwa gutanga icyacumi bari barategetswe n'Imana.

4. ISEZERANO RY'UMUGISHA W'IMANA KU BAZANA ICYACUMI:

Ntitwabura kuvuga kuri iri sezerano ry'Umugisha ku bazana icyacumi: Ariko iri sezerano ry'umugisha rinajyana n'umuburo w'umuvumo ku batazana icyacumi: Malaki 3:8-10 [8] Mbese umuntu yakwima Imana ibyayo? Ariko mwebwe mwarabinyimye. Nyamara murabaza muti ‘Twakwimye iki?’ Mwanyimye imigabane ya kimwe mu icumi n’amaturo, [9]muvumwa wa muvumo kuko ishyanga ryose uko mungana mwanyimye ibyanjye. [10]Nimuzane imigabane ya kimwe mu icumi ishyitse mubishyire mu bubiko, inzu yanjye ibemo ibyokurya. Ngaho nimubingeragereshe, ni ko Uwiteka Nyiringabo avuga, murebe ko ntazabagomororera imigomero yo mu ijuru, nkabasukaho umugisha mukabura aho muwukwiza.

5. ICYACUMI MU ISEZERANO RISHYA N'UBU

Tugarutse kuri cya kibazo: Ese uyu munsi Umukristo aracyategetswe gutanga icyacumi? Cyangwa iryo tegeko ryarangiranye n'isezerano rya kera? Reka turebe icyo Yesu yaba yaravuze ku cyacumi: Iri jambo ryavuye mu kanwa ka Yesu ubwe: Matayo 23:23 “Mwebwe banditsi n’Abafarisayo, mwa ndyarya mwe, muzabona ishyano kuko mutanga kimwe mu icumi cy’isogi na anisi na kumino, mukirengagiza amagambo akomeye yo mu mategeko, ari yo kutabera n’imbabazi no kwizera. Ibyo mwari mukwiriye kubikora, na bya bindi ntimubireke". Biragaragara: Yesu arabisobanura, ati "Mwari mukwiye kugira amagambo yo kutabera n'imbabazi no kwizera, na byabindi ntimubireke (Icyacumi yavuze haruguru).

Tugana ku mwanzuro, twagushishikariza gusoma ikibazo kigira kiti: "Ese abashumba bagomba/bashobora kugenerwa umushahara?" Kanda hano urebe igisubizo cyacyo.

UMWANZURO

Turebye byinshi dukuye mu ijambo ry'Imana. Ubundi mu byo Umukristo yungutse, icyacumi cyabyo ntakwiriye kugifata nk'aho ari icye, ni icy'Imana. N'ubu rwose turahamya tudashidikanya ko icyacumi ari itegeko ku Mukristo. Icyacumi ntigifashishwa abakene. Malaki anakoresha ijambo rikomeye: Icyacumi ntibagitanga ahubwo barakizana.Umuntu atanga ibye, akazana ibitari ibye. Bakizana mu nzu y'Imana ikabamo ibyokurya. Urusengero rugena imikoreshereze y'icya cumi (Kimwe n'indi mitungo yarwo) bitewe n'imikorere y'urwo rusengero. Ubundi nta Mukristo wakagombye kuzana icyacumi mu nzu y'Imana kubw'itegeko, agononwa. Imana kudusaba kuzana icyacumi si uko ikeneye amafaranga yacu, kuko isi n'ibiyuzuye ni ibyayo. Yobu 41:3 "Ni inde wabanje kugira icyo ampa kugira ngo mwiture? Ibiri munsi y’ijuru byose ni ibyanjye."

Kuzana icyacumi mu nzu y'Imana ni igikorwa mbere na mbere cy'umutima, ni igikorwa cyo kuramya Imana, ni uburyo bwo kuvuga ngo "Mana, aho ubutunzi bwanjye buri niho umutima wanjye uzaba, dore ubutunzi wampaye mbuzanye iwawe, ubwo umutima wanjye uzaba iwawe. Kuzana icyacumi ni igikorwa cyo kwemera ko nta na kimwe ufite utahawe n'Imana, ko kandi Imana iramutse ibishatse yabyisubiza igihe icyo aricyo cyose.

Nta Mukristo ukwiriye gutanga icyacumi kubw'itegeko. Ikindi kandi, Umukristo wese ufite umutima ushima, yoroherwa no gutanga icyacumi ntawe ubimuhatiye. Gutanga icyacumi ugononwa, birutwa no gutagitanga, kuko umuntu wese ukora umurimo w'Imana agononwa aba yikururira umuvumo mu kimbo cy'umugisha. Yeremiya 48:10 “Havumwe ukora umurimo w'Uwiteka agononwa [...]

Nkunda Pawulo, yabwuzaga abantu ukuri yarangiza akababwira: "Ariko jyeweho nta cyo muri byo nakurikije, kandi sinandikiye ibyo kugira ngo mubinkorere. Ibyambera byiza ahubwo ni uko napfa, kuruta ko umuntu yahindura ubusa uko kwirata kwanjye." (1 Abakorinto 9:15)

Murakoze cyane, Imana ibahe umugisha.

Ev. Innocent Munyaneza

Answered: Pasika twizihiza isobanuye iki?

Sat, 16 Sep 2023 22:13:07 +0000

'Pasika twizihiza isobanuye iki? Ese niba isobanuye kuzuka kwa Yesu, kuki mu isezerano rya kera yizihizwaga kandi Yesu yari ataravuka?', '

Ndibuka kera nkiri mu mashuri abanza, batwigishaga ko Pasika itwibutsa izuka rya Yesu. Maze gukizwa ntangiye gusoma Bibiriya, nsanga Pasika yarizihizwaga kuva kera Yesu ataranabaho. Ndetse Bibiriya inagaragaza ko Yesu ubwe na we yitabiriye umunsi mukuru wa Pasika i Yerusalemu inshuro zigera kuri eshatu. Umuntu wabajije iki kibazo si we wenyine ukibaza, tugiye kugerageza kurebera hamwe ibyerekeye Pasika n'uburyo abakristo bakwiye kuyifa.

Ijambo Pasika ubusanzwe rikomoka ku giheburayo Pesach, rikaba rigaragara bwa mbere muri Bibiriya mu gitabo cyo Kuva 12:11, ubwo ni mu myaka irenga 1,400 mbere ya Yesu. Ni byiza cyane ko tubanza gusobanura amagambo abiri ari budufashe kumva iki kibazo, aya magambo yombi asobanuzwa ijambo rimwe mu kinyarwanda, nyamara mu ndimi z'amahanga zimwe aya magambo aratandukanye. Ayo magambo ni "Passover" na "Easter". Aya magambo yombi mu kinyarwanda asobanuzwa Pasika, nyamara ubundi ni amagambo atandukanye.

1) PASIKA MU ISEZERANO RYA KERA.

Inkomoko ya Pasika tuyisanga mu isezerano rya kera mu gitabo cyo kuva. Ubwo Imana yari imaze gufata umwanzuro wo kubohora abana bayo bari bamaze imyaka 430 mu bucakara muri Ekiputa, yohereje Mose. Kugirango Farawo yemere kubarekura, byabaye ngombwa ko Mose ateza ibyago 10 muri Egiputa. Pasika ya mbere ihura n'ijoro ry'icyago cya cumi. Muri iryo joro, Imana yasabye Mose ko abwira Abisirayeli bose bakabaga umwana w'intama, bagashyira amaraso ku nkomanizo z'imiryango ya buri nzu, bityo Marayika urimbura nahagera, azabona ayo maraso asimbuke iyo nzu akomeze. (Kuva 12:21-23). "Mose ahamagara abakuru bose bo mu Bisirayeli arababwira ati “Nimurobanure mujyane abana b’intama, uko amazu yanyu ari, muzabikīre umwana w’intama wa Pasika. Mwende umukamato wa ezobu muwinike mu maraso yo mu rwabya, mumishe amaraso yo mu rwabya mu ruhamo rw’umuryango no ku nkomanizo zombi, he kugira uwo muri mwe usohoka mu nzu ye, mugeze mu gitondo. Kuko Uwiteka azanyura muri mwe ajya kwica Abanyegiputa, kandi nabona ayo maraso, ari mu ruhamo rw’umuryango no ku nkomanizo zombi, Uwiteka azanyura kuri urwo rugi ye gukundira umurimbuzi kwinjira mu mazu yanyu ngo abice."

Ngiyo inkomoko ya Pasika. Byumvikane ko iyo ari "Passover" (Gucibwaho), ntabwo ari "Easter\". Uhereye ubwo, Imana yategetse Abisirayeli kuzajya bizihiza Pasika buri mwaka ku munsi wa 14 w'ukwezi kwa mbere, kugirango bajye bahora bibuka uko Imana yabakijije muri Egiputa ikabakuzayo amaboko akomeye. Yesu yarinze avuka nyuma y'imyaka igera ku 1,400 uhereye icyo gihe abisirayeli bakizihiza Pasika (Passover). Yesu ageze ku isi, ntiyigeze asuzugura Pasika cyangwa ngo abuzanye kuyizihiza. Na we ubwe yakoraga urugendo akava aho yakuriye i Nazareti akajya i Yerusalemu kuyizihiza. Bibiriya igaragaza kenshi ko Yesu ubwe yizihizaga Pasika (Passover):

- Yohana 2:23 "Nuko ubwo yari i Yerusalemu mu minsi mikuru ya Pasika, abantu benshi babonye ibimenyetso akora bizera izina rye."

- Matayo 26:17-18 Ku munsi wa mbere wo kurya imitsima idasembuwe, abigishwa begera Yesu baramubaza bati “Urashaka ko dutunganiriza he aho uri burire ibya Pasika?Arabasubiza ati “Mujye mu murwa kwa ntuza, mumubwire muti ‘Umwigisha aravuze ngo igihe cye kirenda kugera, ngo iwawe ni ho ari busangirire ibya Pasika n’abigishwa be.’ ”

Ngiyo nkomoko y'ukuri ya Pasika.

2. IGISOBANURO CYIMBITSE MU GIHE CYACU

Yesu adupfira, yapfuye ubwo bari barimo kwitegura kwizihiza Pasika. Byari bifite icyo bisobanuye si kubw'impanuka. Uwo munsi, ni wo munsi batambaga umwana w'intama wa Pasika mu rusengero. Yesu akimara gutanga, kuri uwo munsi sacyenda, ni yo saha umutambyi mukuru yabaga ari ahera mu rusengero, yiteguye gutamba umwana w'intama wa Pasika. Yesu akimara gupfa, habaye umutingito ukomeye, umwenda ukingiriza ahera utabukamo kabiri (Matayo 27:51), ahera cyane hararangara, byahise bihagarika umuhango wari ugiye kuhabera: Umutambyi mukuru yarekuye intama irigendera: Igishushanyo cyari kibonye icyo cyashushanyaga, Yesu ni we Mwana w'intama watambwe. (1 Abakorinto 5:7 "Nuko nimwiyezeho umusemburo wa kera kugira ngo mube irobe rishya, mube mutakirimo umusemburo wa kera koko kuko Pasika yacu yatambwe, ari we Kristo." Uko abisirayeli bashyize amaraso y'intama ku muryango bagakizwa urupfu, niko Yesu yihinduye Umwana w'Intama akatumenera amaraso natwe tugakizwa urupfu, tugahabwa ubugingo buhoraho! Ngiyo Pasika Yacu!

Yesu amaze kuzuka, Abakristo b'icyo gihe basanze bikwiye kushyiraho umunsi umwe mu mwaka wo kwizihiza kuzuka k'umucunguzi wacu. Kwizihiza passover no gutamba igitambo cyayo byari bitagikenewe kuko "igishushanyo" cyari cyarabonye "original". Ariko kuko batashakaga ko Pasika yibagirana, uyu munsi wo kwibuka kuzuka kwa Yesu bawuhurijemo na passover ya kera. Easter ni icyongereza, iri jambo mu kigereki ni pascha. Uku kwizihiza kuzuka kwa Yesu byatangiye mu kinyejana cya kabiri, biza kwemezwa bidasubirwaho na Kiriza Gatolika mu kinyejana cya 3 nyuma ya Yesu. Bibiriya ntaho igaragaza ko intumwa zigeze zizihiza uyu munsi mukuru nyuma ya Yesu, ndetse nta n'aho idusaba kuwizihiza. Ibi ntabwo bivuze ko kuwizihiza ari bibi cyangwa ari icyaha, kuko ntanaho Bibiriya idusaba guterana ku cyumweru kandi turabikora.

3. PASIKA KU MUKRISTO

Ibyerekeranye n'amatariki n'imboneko z'amezi sicyo kibazo ku mukristo. Bibiriya igiri iti "Nuko rero ntihakagire ubacira urubanza ku bw’ibyo murya cyangwa ibyo munywa, cyangwa ku bw’iminsi mikuru, cyangwa ku bwo kuziririza imboneko z’ukwezi, cyangwa amasabato, kuko ibyo ari igicucu cy’ibizaba, naho umubiri wabyo ufitwe na Kristo." (Abakolosayi 2:16).

Yesu yazutse ari ku itariki runaka (ntizwi), nyamara Pasika iba ku matariki ahindagurika. Bisobanuye ko igifite umumaro atari itariki Yesu yazutseho, igifite umumaro ni ukwizihiza ko yazutse, kandi ukabyizihiza nkaho yakuzukiye akakubera Umwami n'Umukiza w'ubugingo bwawe. Ku mukristo rero Pasika igomba kumubera imbumbe y'ikintu kimwe gikomatanya Passover + Easter: Yesu yatumeneye amaraso kugirango atuvane mu isi y'ibyaha, arapfa arazuka aduha ubugingo bw'iteka.

NOTE: Mu guhindura Bibiriya mu zindi ndimi abasobanuzi bamwe bagiye bakoresha ijambo "passover", abandi bagakoresha "easter" ahantu hatandukanye muri Bibiriya. Ni nk'uko natwe mu kinyarwanda ayo magambo yombi tuyasobanuza "Pasika" icyarimwe. Icyo ni ikibazo cy'ururimi gusa, ariko uko bimeze ni uko byasobanuwe.

Imana ibahe umugisha.

Answered: Umukristo akwiriye kwitwara ate ku kibazo cy'imisoro?

Thu, 14 Sep 2023 12:20:38 +0000

Iki kibazo Abakristo bari muri business bakunze kucyibaza cyane. Yewe, si n'ab'iki gihe bacyibaza gusa, no mu gihe cya Yesu baracyibazaga. Bamwe usanga bijujuta ngo imisoro ni myinshi, bikabatera kuyikwepa cyangwa kuyinyereza, Abandi bakibwira ko ayo ari amategeko y'isi agenga ab'isi gusa... n'ibindi. Mbere yo kureba ibyerekeye ubwinshi n'ubuke bw'imisoro, reka tubanze turebe ku kibazo cy'imisoro nyirizina. Umukristo akwiriye kwitwara ate ku kibazo cy'imisoro?

Abo mu gihe cya yesu iki kibazo bakibajije Yesu. Dore uko Bibiriya ibivuga: Matayo 22:16-21 [16] Bamutumaho abigishwa babo hamwe n’Abaherode bati “Mwigisha, tuzi yuko uri inyangamugayo kandi ko wigisha inzira y’Imana by’ukuri, nturobanura abantu ku butoni, kuko utita ku cyubahiro cy’umuntu wese. [17]Nuko tubwire, utekereza ute? Amategeko yemera ko duha Kayisari umusoro, cyangwa ntiyemera? [18] Ariko Yesu amenya uburiganya bwabo, arababaza ati “Mungeragereje iki, mwa ndyarya mwe? [19] Nimunyereke ifeza y’umusoro.”Bamuzanira idenariyo. [20] Arababaza ati “Iyi shusho n’iri zina ni ibya nde?” [21] Baramusubiza bati “Ni ibya Kayisari.” Maze arababwira ati “Nuko rero ibya Kayisari mubihe Kayisari, iby’Imana mubihe Imana.”

Iki gisubizo cya yesu kirasobanutse ku buryo nta n'urujijo na ruto giteye. Ni ibintu bibiri by'ingenzi muri ubu buzima, buri cyose tugomba kugikora mu mwanya wacyo mu buryo bwacyo: Iby'Imana tugomba kubikora neza mu gihe cyabyo, n'iby'isi tukabikora neza mu gihe cyabyo.

Uretse na Yesu Pawulo na we yagize icyo abivugaho: Abaroma 13:5-7 [5]Ni cyo gituma ukwiriye kuganduka utabiterwa no gutinya umujinya gusa, ahubwo ubyemejwe n’umutima uhana.[6]Ni cyo gituma musora, kuko abatware ari abagaragu b’Imana bitangiye gukora uwo murimo. [7]Mwishyure bose ibibakwiriye: abasoresha mubasorere, abahinisha mubahinire, abo gutinywa mubatinye n’abo kubahwa mububahe.

Ibyanditswe tuvuze haruguru biragaragaza mu buryo budasubirwaho ko Umukristo agomba gutanga imisoro kandi akayitanga atagononwa. Habaho imisoro y'uburyo butandukanye bitewe n'igihugu na system icyo gihugu gikoresha. Hari aho imisoro ifatwa n'abasora nk'aho ari myinshi, hari aho abasoresha badakundwa n'abasora....ariko ibi na byo si bishya, kuko no mu gihe cya Yesu ariko byari bimeze. Dore uko Yesu abivuga, Matayo 11:28-29 [28] Kuko Yohana yaje atarya atanywa, bagira bati ‘Afite dayimoni.’[29]Umwana w’umuntu aje arya anywa, bagira bati ‘Dore iki kirura cy’umunywi w’inzoga, incuti y’abakoresha b’ikoro n’abanyabyaha.’ Ariko ubwenge bwerekanwa n’imirimo yabwo. ”Iki cyanditswe tuvuze haruguru kigaragaza ko abo ku gihe cya Yesu batekerezaga ko Yesu adakwiriye gusangira n'abakoresha b'ikoro (Abasoresha) kuko ntibari bakunzwe na gato. Gusa Yesu we si uko yabibonaga, gusangira n'abasoresha nta cyaha cyari kibirimo nta n'ikibazo byari bimuteye.

Ariko nanone, bibiriya isaba abasoresha kudasoresha ibirenze ibyo bagomba gusoresha. Luka 3:12-13 hagira hati:[12] N’abakoresha b’ikoro na bo baje ngo babatizwe baramubaza bati “Mwigisha, tugire dute?” [13]Arabasubiza ati “Ntimukake abantu ibiruta ibyo mwategetswe.”

Impande zombi ziravugwaho: Abasoresha babujijwe gusoresha ibiruta ibyo bategetswe. Abasora na bo basabwe gusora nk'uko Abasoresha babibasaba. Imisoro yaba myinshi yaba mike, abasora basabwa gusora uko byagenwe n'amategeko abareba. Abaroma igice cya 13 uhereye ku murongo wa 1 Bibiriya idusaba ikomeje kubaha abatuyobora. Ahantu honyine twemerewe kutubaha abatuyobora, ni igihe badusabye gukora ibyo Bibiriya itubuza. Ahongaho Umukristo ahitamo kumvira Imana kuruta kumvira abantu. (Act 5:29 "Petero n’izindi ntumwa barabasubiza bati “Ibikwiriye ni ukumvira Imana kuruta abantu."

Ikibazo cyo kumenya ibyerekeye uko waranguye.... uko wacuruje....ntabwo twabyinjiramo cyane, icyo tuzi ni uko Imana dusenga igendera ku mahame Umukristo atemerewe guca ku ruhande. Umukristo agomba kwitwararika aya mahame y'Imana, agahitamo ubucuruzi butamushyira mu moshya kuko ubucuruzi bwose ntibukorwa kimwe. Abakristo bamwe bavuga ko bibagora guhurira ku isoko rimwe na bamwe badatinya Imana ntibanubahe Leta, bamwe muri bo (wenda) ngo bashobora no kuba bakwepye imisoro cyangwa bagakora andi manyanga atuma ibiciro byabo bijya hasi. Ni byo rwose, gucururiza iruhande rwa mwene aba biragora kuko ibiciro byawe biba biri hejuru ugereranije n'ibyabo. Uko byagenda kose ntibikuraho amahame y'Imana, nta nubwo biguha urwitwazo rwo kwigana abakora nabi kugirango nawe ubone uko ucuruza.

Inama iruta izindi twaha Umukristo ujya mu ijuru, ni ugushaka ubucuruzi butamushyira mu moshya, ubundi akubaha amabwiriza n'amategeko uko ashyirwaho n'ubuyobozi.

Murakoze, Imana ibahe umugisha

Answered: Ese Umukristo yemerewe kujya mu bikorwa bya Politiki?

Fri, 04 Aug 2017 19:27:03 +0000

Iki ni ikibazo abakristo benshi bakunze kwibaza, bamwe bagira ipfunwe ryo kukibaza, abandi bakigengesera, abandi bakagira umutima wishinja, ndetse bamwe ntibatinya gushinja mu mitima bagenzi babo.

Bamwe bagiye bavuga ko Politiki n'Iyobokamana bitajya imbizi, ngo ntibijyana. Ese mu by'ukuri niko bimeze? Ese igihe Umukristo agiye mu bikorwa bya Politiki aba akoze icyaha? Ese Umukristo ashobora kujya mu bikorwa bya Politiki kandi agakomeza kuba Uwera? ibi ni byo bibazo tugiye kugerageza gusubiza.

Mbere yo kwinjira cyane muri iki kibazo, mutwemerere tubanze dushimangire ko Bibiriya ihamya ko ubushake bw'Imana busumba byose, bugomba kubahwa kuko bufata umwanya wa mbere mu buzima bw'Umukristo. Matayo 6:33 Bibiriya itubwira ko tugomba kubanza gushaka Ubwami bw'Imana mbere y'ibindi byose. Imigambi y'Imana ni ihame ritavogerwa, kandi ubushake bwayo ntibugibwaho impaka. Kuva kera, Abahanuzi bari barabihishuriwe ko Imana ariyo yimura abami ikimika abandi (Daniyeli 2:21). Bari barahishuriwe kandi ko Isumbabyose ari yo itegeka ubwami bw'abantu, ikabugabira uwo ishatse wese. (Daniyeli 4:22). Niba dufashe Politiki nk'imiyoborere y'abantu, iyo urebye neza ibi byanditswe byera usanga Imana ubwayo ifite ikiganza muri Politiki y'abantu, igakoresha politiki kugirango isohoze imigambi yayo ku bantu. Ikibazo isi yagiye igira gusa ni uko abanyapolitiki babi bagiye bakoresha nabi ubuyobozi bahawe, bagakoresha Politiki mu gusohoza imigambi yabo mibi. Ibi byatumye ijambo "Politiki" rihabwa inyito itariyo, bigatuma umuntu wese wumvise iri jambo yikanga, akumva imigambi igamije kugira nabi gusa, nyamara siko biri.

Icya kabiri Umukristo akwiriye gusobanukirwa, ni uko Guverinoma zo mu isi zidashobora kurokora umuntu! Imana ni yo yonyine ibasha kudukiza. Muri Bibiriya, nta na hamwe dusoma ko haba hari inyigisho zigamije kwerekana uko Guverinoma zo mu isi zakora kugirango zijyane abantu bazo ku gakiza. Guhera mu kinyejana cya mbere, mu gihe hariho ingoma z'igitugu cy'Abaroma, nta na hamwe intumwa zigeze zihamagarira abakristo kwigomeka ku ngoma y'Abaroma yabagiriraga nabi. Ahubwo babashishikariza kubaha ababayobora, ariko bataretse inshingano zabo zo kubwiriza abantu inkuru nziza y'agakiza.

Nta kujijinganya, Bibiriya itubwira ko dufite inshingano zo kubaha abatuyobora no kuba abaturage beza. Abaroma 13:1-2 "Umuntu wese agandukire abatware bamutwara, kuko ari nta butware butava ku Mana, n'abatware bariho bashyizweho n'Imana. Ni cyo gituma ugandira umutware aba yanze itegeko ry'Imana, kandi abaryanga bazatsindwa n''urubanza". Imana yadushyiriyeho abatuyobora ku bw'inyungu zacu, kugirango bashime abakora neza kandi bahane inkozi z'ibibi. Ibyo bivugwa muri 1 Petero 2:13-14. Na Yesu ubwe ntiyigeze adusaba kwigomeka ku batuyobora. Yadusabye kubaha ibibagenewe, n'Imana tukayiha ibiyigenewe. Aho Umukristo asabwa gutora, aba agomba gutora. Aho Umukristo asabwa gutanga umusoro, aba agomba kuwutanga. Igihe Umukristo akoze ibi, mu by'ukuri aba akoze ibikorwa bya Politiki. Nta cyaha aba akoze. Izi mpande zombi ntabwo zirwanyana, ahubwo ziruzuzanya. Umukristo ashobora no gukora imirimo mu nzego za Leta cyangwa iza Politiki, si icyaha. Gusa agomba guhora azirikana uwo ari we, akarangwa n'indangagaciro za Gikristo kandi akabera intangarugero abo bakorana.

Ahubwo inzozi za mbere z'Abakristo zakagombye kubona igihugu kiyobowe n'abantu bafite indangagaciro za Gikristo, bigisha urukundo no kubahana, kandi bemera ko Imana ifite umwanya wa mbere mu buzima bwa buri muntu. Gusa nanone, ubutumwa twahawe si ubwo guhindura igihugu dukoresheje impinduramatwara zishingiye kuri politiki, ahubwo ni uguhindura imitima y'abantu dukoresheje ubutumwa bwiza dukura muri Bibiriya.

Si icyaha rwose kuba umukristo yakora ibikorwa runaka bya Politiki, kuko ibyo bikorwa duhura nabyo buri munsi mu buzima bwo muri iyi si. Gusora, gutora, gutorwa, gutanga igitekerezo, kujya mu nama y'ubuyobozi, gukora akazi ka Leta, kwikorera, gukora umuganda, ibi byose ni ibikorwa bifite aho bihuriye na Politiki. Ahubwo kutabikora ni cyo cyaha kuko Bibiriya idutegeka kubaha abadutegeka.

Gusa hari ibyo kuzirikana: - Igihe itegeko ry'isi rihabanye n'iry'Imana, Umukristo asabwa gukurikiza iry'Imana.

- Igihe Umukristo ari muri Politiki nk'akazi yahisemo, agomba kwitwararika kugirango atisanga yijanditse mu byoretse iyi si.

Murakoze, Imana ibahe umugisha

Ni ubuhe buryo butandukanye bwo kwiyiriza?

Mon, 07 Nov 2016 21:43:11 +0000

Kuki gushima Imana ari ingenzi?

Mon, 07 Nov 2016 21:40:35 +0000

Urwenya: Umukristo ararwemerewe?

Mon, 07 Nov 2016 21:39:53 +0000

Umukristo yakwitwara ate mu mpaka?

Mon, 07 Nov 2016 21:39:10 +0000

Kuba muri Kristo bisobanuye iki?

Mon, 07 Nov 2016 21:35:48 +0000

Ese Kubwiriza "urugi ku rugi" ni uburyo bwiza bwo kubwiriza?

Mon, 07 Nov 2016 21:34:58 +0000

Ese kuba "Uwera birashoboka", kandi tuzi ko Imana ariyo yonyine Yera?

Mon, 07 Nov 2016 21:33:57 +0000

Ni gute namenya ko ndimo kuyoborwa n'Umwuka Wera?

Mon, 07 Nov 2016 21:32:31 +0000

Namenya nte gutandukanya aya majwi akurikira: Ijwi ry'Imana, irya satani, n'ibitekerezo byanjye?

Mon, 07 Nov 2016 21:31:37 +0000

Kuki ari ngombwa kwihererana n'Imana wowe ubwawe wenyine?

Mon, 07 Nov 2016 21:30:11 +0000

Kuki inyigisho zo gutanga zishyirwamo ingufu cyane muri iyi minsi?

Mon, 07 Nov 2016 21:29:18 +0000

Ni gute Umukristu yanesha ubwoba bumubuza guhamya?

Mon, 07 Nov 2016 21:28:09 +0000

Ese kubwiriza ku muhanda ni uburyo bwiza bwo kuzana abantu kuri Yesu?

Mon, 07 Nov 2016 21:27:03 +0000

Ni gute namenya ko igihe cy'Imana kigeze?

Mon, 07 Nov 2016 21:23:21 +0000

Ni irihe tandukaniro hagati y'icyacumi n'ituro?

Mon, 07 Nov 2016 21:22:11 +0000

Ni ibihe bintu byamfasha kutagwa mu moshya?

Mon, 07 Nov 2016 21:20:31 +0000

Ese ni bibi kuba Umukristo mu ibanga ku mpamvu z'umutekano wanjye?

Mon, 07 Nov 2016 21:17:17 +0000

Kuki guhimbaza Imana ari ingenzi?

Mon, 07 Nov 2016 21:13:58 +0000

Umuntu w'Imana: Bivuze iki? (Man of God)

Mon, 07 Nov 2016 21:13:20 +0000

Namenya nte ko Imana hari icyo insaba gukora?

Mon, 07 Nov 2016 21:12:22 +0000

Ni gute twamenya ijwi ry'Imana?

Mon, 07 Nov 2016 21:11:35 +0000

Nabatijwe mu mazi menshi ntazi ibyo ndimo: Ngomba kongera kubatizwa

Mon, 07 Nov 2016 21:10:14 +0000

Namenya nte ubushake bw'Imana ku buzima bwanjye?

Mon, 07 Nov 2016 21:08:34 +0000

Amavuta: Bisobanuye iki gusigwa amavuta?

Mon, 07 Nov 2016 21:07:33 +0000

Kuki mu buzima bw'umukristo hari igihe Imana isa n'iyicecekeye?

Mon, 07 Nov 2016 21:06:29 +0000