Bibiriya irasubiza - Recent questions and answers in Ibibazo byerekeye umuryango (family)

Answered: Ese abana bose ni umugisha, tutitaye ku buryo bavutsemo?

Wed, 04 Oct 2023 20:50:08 +0000

Bibiriya itubwira neza ko mu iremwa rya buri muntu, mu guteranywa kwe akiri no mu nda ya nyina, Imana ibifite mu biganza byayo. Zaburi 139:13-14 "Kuko ari wowe waremye ingingo zanjye, Wanteranirije mu nda ya mama. [14]Ndagushimira yuko naremwe uburyo buteye ubwoba butangaza, Imirimo wakoze ni ibitangaza, Ibyo umutima wanjye ubizi neza. ...[16]Nkiri urusoro amaso yawe yarandebaga, Mu gitabo cyawe handitswemo iminsi yanjye yose, Yategetswe itarabaho n’umwe."

Nubwo Dawidi atinyuka kwatura aya magambo, igisekuru cye si abatagatifu gusa: Mu gisekuru cye dusangamo indaya nka ba Rahabu, dusangamo abasambanyi nka Yuda, ariko ntibimubuza kwemeza ko Imana iri inyuma y'iremwa rye kuva akiri mu nda ya nyina. Ibyo rero ni byo bikunze kubyutsa ikibazo cyibazwa na benshi, bati none se abana bavuka ku busambanyi, ku gufatwa ku ngufu, ku ikoranabuhanga (in-vitro), na bo ni umugisha uturuka k'Uwiteka?

Ijambo ry'Imana riratubwira muri Zaburi 127:3 "Dore abana ni umwandu uturuka ku Uwiteka, Imbuto z’inda ni zo ngororano atanga." Iki cyanditswe kirasobanutse ku buryo tutakwirirwa tugitindaho, niba Bibiriya ivuga ko abana ari umwandu uturuka k'Uwiteka (Umwandu =umugabane, heritage), ikongeraho ko ari ingororano atanga, ntabwo yigeze ikora itandukaniro hagati y'abana bavuka mu rushako rwemewe n'amategeko n'abavuka hanze y'urushako. Ni byo, twemera ko habaho icyaha hakabaho n'ingaruka zacyo, ndetse n'ibyakozwe n'ababyeyi bijya bigira ingaruka ku bana kabone n'iyo baba barihannye, kubabarirwa barababarirwa ariko ntibikuraho ingaruka zishobora kubaho, ariko ibi byose ntibikuraho ko umwana warangije gusamwa ahita yinjira mu mugambi mwiza w'urukundo rw'Imana tutitaye ku buryo yasamwemo.

Iki kibazo cyabonerwa neza igisubizo cyiza tubashije kwibaza ikindi kibazo: Ese aba bana bavutse hanze y'urushako, tubabona nk'uko Imana ibabona? Twebwe iyo tubarebye akenshi tubabonera mu ishusho y'ababyeyi babo, ariko Imana yo ibabonera mu ishusho y'urukundo rwayo. None se ubwacu iyo dukoze icyaha Imana iratuvuma? Iraduca se? Oya rwose, urukundo rwayo ntirurobanura umwana wavutse mu rushako cyangwa hanze yarwo, kabone n'ubwo aba bana bombi bashobora kugerwaho n'ingaruka z'ibyaha byacu mu buryo butandukanye.

Tubashije kureba umwana wese nk'uko Imana imubona, ntitwakwibaza niba umwana wese ari umugisha w'Uwiteka. Twese Imana ijya kuduhamagara ngo tuyikorere ntiyigeze yita ku mivukire yacu, benshi mu bakozi bayo bafite amateka atari meza inyuma yabo. Iyaba umwana wese atari umugisha w'Imana, na Yesu ubwe ntiyaba umugisha kuri twe kuko mu gisekuru cye harimo indaya, abasambanyi, abicanyi, ababeshyi .....

Ubushake bw'Imana ni uko buri mwana wese yavuka hakurikijwe gahunda yayo, ni ukuvuga urushako. Ariko igihe ibyo bitabayeho, ntibivanaho urukundo rw'Imana ku mwana, ititaye ku buryo yavutse. Kimwe n'uko ubushake bw'Imana ari uko twese twakizwa tukamenya ukuri (2 Timoteyo 2:4); ariko iyo umuntu atarakizwa ntibivanaho urukundo Imana imukunda kugeza ku munota we wa nyuma. Aho ni ho Imana yacu ibera Imana, ibasha guterateranya amabi yacu ikayakuramo umugisha! Buri Wera wese afite amateka, na buri munyabyaha wese afite ahazaza.

Tubifurije umugisha w'Uwiteka.

Answered: Ubuzima bw'umuntu butangira ryari?

Fri, 29 Sep 2023 14:22:12 +0000

Iki kibazo cyagiye kivugwaho byinshi kinatandukanya abantu, na n'ubu abanyabwenge ntibaracyumvikanaho. Bamwe kuva kera bagiye bavuga ko umuntu atangira kwitwa umuntu kuva avutse, abandi bavugaga ko umuntu aba umuntu agisamwa, hari n'abavuga ko umuntu aba umuntu mu kwezi runaka uhereye igihe yasamiwe.

Muri iyi minsi ya none, ibihugu byinshi bifite amategeko yemera gukuramo inda, ibyinshi muri byo bikaba byemeza ko umwana ukiri mu nda ya nyinda aba ataraba umuntu, ku buryo gukuramo inda itaravuka bidafatwa nk'icyaha cyo kwica umuntu.

Mu buryo budashidikanywaho, Abakristo bizera ko umuntu atangira kwitwa umuntu agisamwa. Dawidi yandika Zaburi ya 139:13, 16 yagize ati: "Kuko ari wowe waremye ingingo zanjye, Wanteranirije mu nda ya mama. Nkiri urusoro amaso yawe yarandebaga, [16]Mu gitabo cyawe handitswemo iminsi yanjye yose, Yategetswe itarabaho n’umwe."

"Nkiri urusoro amaso yawe yarandebaga....", bisobonuye ko nkiri urusoro nari ndiho. Kuva imbuto y'umugabo igihura n'iy'umugore, ako kanya umuntu n'ibizamuranga byose biba bibonetse: Ese azaba umuhungu cyangwa umukobwa? muremure? Mugufi? Amaso manini? Umusatsi w'umweru?.... ikiba gisigaye gusa ni uko ahabwa igihe cyo gukurira mu nda ya nyina kugirango tubashe kumubona, naho ubundi aba yabaye umuntu kuko n'Imana iba ibasha kumubona kuko yo ibona ibyo twe tutabasha kubona.

Uretse n'igihe cy'isamwa, Imana yo iba inatuzi mbere yaho. Bibiriya ibivuga muri aya magambo: Yeremiya 1:5 “Nakumenye ntarakurema mu nda ya nyoko kandi nakwejeje utaravuka, ngushyiriraho kuba umuhanuzi uhanurira amahanga.” Turi mu bihe bigoye aho isi yashyizeho amahame yayo ndetse inasobanura ibintu mu buryo buhabanye n'umwimerere wabyo, byose biganisha ku cyo Bibiriya yita "Ubuhenebere bw'iminsi y'imperuka". Ariko ukuri guhari ni uko umugore akimara gusama, ako kanya umuntu aba yabaye umuntu.

Ikindi kibazo wasoma: "Bibiriya ivuga iki ku kuringaniza urubyaro? Kanda hano ubone igisubizo

Umwami Yesu abagirire neza.

Answered: Kuki Imana yemeye ko Salomon arongora abagore 1001?

Fri, 29 Sep 2023 14:04:00 +0000

Ibyanditswe byera bigira biti: 1 Abami 11:1,3 "Umwami Salomo yabengutse abagore benshi b’abanyamahanga udashyizeho umukobwa wa Farawo: Abamowabukazi n’Abamonikazi n’Abedomukazi, n’Abasidonikazi n’Abahetikazi. Yari afite abagore b’imfura magana arindwi, n’ab’inshoreke magana atatu. Nuko abagore be bamuyobya umutima."

Abisirayeli bakiri mu butayu, Imana yari yarababuriye ko nibagera mu gihugu cy'isezerano, bazimika umwami, ariko ko Umwami atagomba kurongora abagore benshi kugirango batamuyobya umutima. Bibiriya ibivuga muri aya magambo: Gutegeka kwa kwabiri 17:14,17 "Numara kugera mu gihugu Uwiteka Imana yawe iguha, ukaba umaze kugihindūra no kugituramo, ukibwira uti “Ndiyimikira umwami nk’uko ayandi mahanga angose yose ameze; [17]Kandi ye kuzishakira abagore benshi, kugira ngo umutima we udahinduka ukava ku Uwiteka, kandi ye kuzarushaho kwishakira ifeza n’izahabu byinshi.”

Kuba Salomon yarafashe umwanzuro wo guca ku mabwiriza yari ahari, akarongora abagore 1000 akiyongeza n'umunyegiputakazi w'1001, ntibisobanuye ko Imana ari yo yamuhaye uruhushya rwo kubikora, ahubwo bisobanuye ko Salomon yahisemo kwica itegeko ry'Imana, Imana ikareka bikaba bityo. Kuva isi yaremwa, no kuva umuntu wa mbere yashyirwa mu isi, Imana yagaragaje ko itifuza kuyobora umuntu nka Robot, ahubwo yahaye umuntu ubwenge, imwereka icyiza n'ikibi, irangije irekera muntu uburenganzira bwo kwihitiramo. Kuva icyo gihe kugeza n'ubu, iyo umuntu afashe umwanzuro wo gusuzugura Imana, arabikora bikamushobokera, ntawe Imana igira icyo ikoresha ku ngufu.

Salomon yatangiye ingoma ye neza, asaba Imana ubwenge bwo kuyobora Abisirayeli. (1 Abami 3:5-9). Imana yaramwumviye, imuha ubwenge buhambaye, ubwenge bwe bukaba bugaragarira mu gitabo cy'imigani n'igitabo cy'indirimbo ya Salomon. Uko iminsi yagiye yicuma, Salomon yatandukiye nkana itegeko ry'Imana, atangira kurongora abagore benshi. Ibyo byamukururiye ingaruka nk'uko Imana yari yarabivuze mu mirongo twatangiriyeho. 1 Abami 11:4 "Salomo amaze gusaza, abagore be bamutwara umutima agakurikiza izindi mana, bigatuma umutima we utagitunganira Uwiteka Imana ye nk’uko uwa se Dawidi wari umeze"; Salomon wari warubakiye Uwiteka urusengero rwiza, yageze n'aho yubakira ibigirwamana ingoro kugirango anezeze abagore be. 1 Abami 11:5 "Kuko Salomo yakurikiye Ashitoreti imanakazi y’Abasidoni, na Milikomu ari yo kizira cy’Abamoni. [7]Bukeye Salomo yubakira Kemoshi ingoro ku musozi werekeye i Yerusalemu. Kemoshi yari ikizira cy’Abamowabu, kandi iyindi ayubakira Moleki ikizira cy’Abamoni."

Amahitamo ya Salomon ntiyari kubura kuzana ingaruka, nk'uko bimeze na bugingo n'ubu, amahitamo yacu agira ingaruka mu buryo bumwe cyagwa ubundi. Iyo duhisemo, Imana iratuburira ariko ntiyitambika mu mahitamo yacu, irabireka bikabaho. N'amahitamo mabi ya Salomon ntiyanejeje Imana, kandi ntiyari kubura kugira ingaruka mbi: 1 Abami 11:11 "Ni cyo cyatumye Uwiteka abwira Salomo ati “Kuko wakoze ibyo, ntiwitondere isezerano ryanjye n’amategeko yanjye nagutegetse, ni ukuri nzakunyaga ubwami bwawe mbugabire umugaragu wawe."

Ingaruka z'aya mahitamo mabi ya Salomon zabaye mbi kuri Salomon no kuri Isirayeli yose, kuko Salomon akimara gupfa ubwami bwa Isirayeli bwigabanijemo kabiri, buri gice kikajya kiyimikira umwami wacyo. Ibi biraduha isomo rikomeye: Amahitamo dukora mu buzima ashobora kudukururira byinshi, bibi cyangwa byiza.

Imana yaduhaye Ijambo ryayo ngo rituyobore, iduha n'Umwuka Wera ngo adufashe. Ariko iyo duhisemo kwitandukanya n'Imana no kutayumvira, Imana yubaha amahitamo yacu kuko ntijya idukoresha nka telecommande batunga kuri TV. Ku iherezo ry'ubuzima bwe, Salomon yitegereje ibyo byose yaciyemo, amakosa yakoze, ubutunzi yatunze, ubwenge yari afite, arangije abibumbira mu gitabo cya nyuma yanditse cy'umubwiriza, atugira n'inama ikomeye: Umubwiriza 12:13 "Iyi ni yo ndunduro y’ijambo, byose byarumviswe. Wubahe Imana kandi ukomeze amategeko yayo, kuko ibyo ari byo bikwiriye umuntu wese." Umurongo wa nyuma w'iki gitabo (14) utugaragariza ko amaherezo buri wese azirengera ingaruka z'amahitamo ye: "Kuko Imana izazana umurimo wose mu manza, n’igihishwe cyose ari icyiza cyangwa ikibi."

Uko bigaragara, mu maherezo ye Salomon yarihannye, gusa ni ngombwa cyane gutandukanya ibintu bibiri:

1. Kuba Imana ireka ibintu bikabaho, bitandukanye cyane no kuba wavuga ngo biri mu bushake bw'Imana. Kuba Imana ireka abantu bagateza intambara mu isi, amakumbirane, inzangano, ibyaha.... ntibisobanuye ko biri mu bushake bw'Imana. Ntibibaho, Imana ntishobora koshywa n'ibibi, kandi ntabwo ishobora koshyeshya umuntu ibibi. Ibyo rwose ni Bibiliya: Yakobo 1:13 Yakobo 1:13 "Umuntu niyoshywa gukora ibyaha ye kuvuga ati “Imana ni yo inyoheje”, kuko bidashoboka ko Imana yoshywa n'ibibi, cyangwa ngo na yo igire uwo ibyohesha."

2. Ni ngombwa cyane gutandukanya "ICYAHA" n' INGARUKA Z'ICYAHA: Iyo ukoze icyaha ukihana ubikuye ku mutima, urababarirwa. Ariko ntibisobanuye ko ingaruka z'icyo cyaha zisibama ako kanya. Urabibona ko nubwo yaba yarababariwe, ingaruka z'ibyo Salomon yakoze byarakururukanye zigera no ku batarabigizemo uruhare, imyaka myinshi ibarirwa mu binyejana, yewe, na Yesu yasanze izo ngaruka zikiriho muri Isirayeli! (Ngirango muribuka urwango Yesu yasanze ruri hagati y'Abayuda n'Abasamariya? kandi bose ari Abisirayeli? Izo ni ingaruka zakomotse ku cyaha cya Salomon).

Murakoze, Uwiteka abagirire neza

Answered: Ese hari icyo bitwaye abashakanye gusengera mu matorero / amadini atandukanye?

Fri, 29 Sep 2023 10:50:11 +0000

Iki ni ikibazo gikunze kuboneka mu miryango aho usanga umugabo asengera mu Itorero runaka kubera impamvu runaka, umugore na we agasengera mu rindi torerero ritandukanye kubera impamvu runaka.

Iyo ubajije buri wese impamvu bimeze bityo, birumvikana ko buri wese agerageza kuguha no kukumvisha impamvu ze. N'ubwo tutakwihandagaza ngo tuvuge ko ari icyaha, ariko nanone ntidutinya kuvuga ko atari byiza. (Kandi buriya ibintu bitari byiza ariko atari ibyaha, amaherezo iyo bishyize kera bibyara icyaha). Imana imaze kuremera Adamu umugore, yavuze ko umugabo n'umugore babaye umubiri umwe (Itangiriro 2:24).

Ishyingirwa, urugo cyangwa urushako ni igikorwa cyashyizweho n'Imana ubwayo, ihuriza hamwe abantu babiri bahamagariwe guhura mu bumwe bwuzuye. Ubu bumwe ntibusobanuye ko abantu bagomba guhuza imico, (kuko n'abonse ibere rimwe ntibayihuza), ariko abashakanye bagomba kwitondera ibintu bifite ingaruka mu isi y'umwuka. Ubumwe buranga abashakanye bukwiriye kurenga imbibi z'ibifatika bugasingira imbibi z'ibidafatika, bakitondera kureba niba bumva kimwe ibibazo by'imyemerere igize inkingi za mwamba z'ukwizera kwabo: Imana, Yesu, Umwuka Wera, Itorero, Agakiza, Icyaha, Ijuru, Umuriro .... gusenga, kwiyiriza, gutanga .... Iyo abashakanye bumva kimwe ibibazo by'umwuka, birema ubumwe hagati yabo kurusha ikindi kintu icyo aricyo cyose.

Ni byo ko abashakanye bashobora kuryoherwa bitandukanye na gahunda z'amatorero atandukanye, n'ubwo ayo matorero yaba ahuje ibyo twizera (Doctrine), wenda ugasanga ntibaryoherwa kimwe n'ibindi bitagize inkingi z'ukwizera nk'umuziki, uko babwiriza, uko baramya, uko bahimbaza, uko bicara mu rusengero, uko bakira abashyitsi .... ariko ibi byose nta na kimwe gifite ibiro bihagije byatuma abashakanye bashyira mu kaga ubumwe bwabo.

No mu buzima busanzwe kugirango wubake ubumwe n'undi muntu bisaba gushyira ku ruhande bimwe mu bikunezeza, ukagerageza kwiyima ibintu bimwe na bimwe kugirango uringanize imibereho yawe n'iya mugenzi wawe. Ibi birakora no mu rushako: Niba amatorero yombi afite doctrine nzima, umwe mu bashakanye yakwiyima bimwe mu byamunezezaga mu Itorero runaka, agashyira ku ruhande amahitamo adafite ingaruka ku myizerere, agashyira imbere ubumwe bwabo kurenza ibinezeza umubiri bidafite ingaruka ku Mwuka.

Imbogamizi ikunze kubaho ituma iki kibazo kibaho, ni ukudakurwa ku ijambo kw'abantu cyangwa kutava ku izima. Ugasanga umuntu yarafashe aragungumira gusa, wanashaka impamvu ifatika ituma agungumira ukayibura. Ngo nkunda uko hariya babyina, ngo nkunda uko bacuranga, ngo hariya ni ho nakuriye sinahava, ngo nkunda umuntu runaka hariya..... Abashakanye bakwiye kuzirikana iki cyanditswe: 1 Samuel 15:23 "Kuko ubugome busa n’icyaha cy’uburozi, kandi n’udakurwa ku ijambo asa n’uramya ibishushanyo na Terafimu."

Ubundi iki ni ikibazo abashakanye bagomba kuganiraho bakanagifatira umwanzuro mbere y'uko bashyingirwa. Iyo bananiwe kucyumvikanaho hakiri kare batarashyingirwa, bakwiriye kwibaza niba ibindi byo bazabyumvikanaho. Iyo bije nyuma yo gushyingirwa, amatorero yombi akaba adahuje imyizerere (Doctrine), aho ho uri mu Itorero rifite doctrine nzima nta mpamvu afite yo kujya mu buyobe. Iyo amatorero ahuje imyizerere (Doctrine), bakwiriye gushyira imbere ubumwe bwabo kurusha ibibanezeza bidashyira mu kaga ubuzima bw'Umwuka.

Murakoze, Uwiteka abagirire neza.

Answered: Bibiriya ivuga iki ku kuringaniza urubyaro?

Thu, 13 Jul 2017 16:12:35 +0000

Iki ni kimwe mu bibazo bikunze gukurura impaka mu bizera, cyane cyane ko ari kimwe mu bibazo Bibiriya itagira icyo ivugaho mu buryo bweruye. Igihe Bibiriya yandikwaga, ibijyanye no kuringaniza urubyaro si ikintu cyariho, ni yo mpamvu nta mwanditsi wigeze agira icyo akivugaho cyangwa ngo hagire Itorero rikibaza.

Muri Bibiriya Yera, tubona ingero nyinshi z'abatewe Umunezero n'ibyishimo byo kubyara umwana, ariko nta na hamwe havugwa umuntu waba yarigeze kubabazwa n'uko abyaye.

Muri Bibiriya Yera, icyanditswe kimwe abantu bakunze gutekereza nkaho kiganisha ku kuboneza urubyaro, kiboneka mu Itangiriro igice cya 38, aho Bibiriya ivuga iby'abana ba Yuda, Eri na Onani. Bibiriya ivuga ko Eri yarongoye umukobwa witwa Tamari, ariko kuko yari umunyabyaha (Eri), Uwiteka aramwica, apfa atabyaranye n'umugore we Tamari. Nk'uko umugenzo w'Abaheburayo wari uri, mwene se wa Eri, Onani, yari afite inshingano zo kumuzungura, akarongora Tamari, kandi akamubyaraho umwana kugirango acikure mwene se. Ku murongo wa 9-10, Bibiriya igira iti "Onani amenya yuko umwana atazaba uwe, nuko aryamanye na muka mwene se ashyira intanga hasi kugirango adacikura mwene se. Icyo yakoze icyo cyari kibi mu maso y'Uwiteka, na we aramwica". Onani yakoze ikintu kibi, yarikunze cyane kugeza aho yishakira ibyishimo by'umubiri gusa, ariko yanga inshingano zo gucikura mwene se.

Iki cyanditswe ni cyo gikunze gukoreshwa nko kwerekana ko Imana idashyigikiye kuringaniza imbyaro, ariko ababivuga batyo birengagiza ko Onani atazize kuringaniza urubyaro, ahubwo yazize kwanga inshingano ze zo gucikura mwene se. Nkuko bigaragara mu nkuru ya Onani, kuringaniza urubyaro cyangwa kutaruringaniza sicyo kibazo, ahubwo ikibazo ni impamvu yihishe inyuma yo kururinganiza cyangwa kutaruringaniza. Abashakanye bashobora kwifuza kuringaniza urubyaro kubera impamvu zitandukanye. Bamwe bashobora kubiterwa no kwifuza guha Umwana bafite ibyo akeneye byose mu buryo bunyuze bakurikije ubushobobozi Imana yabahaye. Abandi, ku bw'umurimo w'Imana, bashobora kwifuza kutishyiraho inshingano nyinshi kugirango babohokere gukorera Imana mu buryo burushijeho kuba bwiza. Ku bw'umurimo w'Imana Pawulo yahisemo kuguma ari ingaragu ubuzima bwe bwose, ibyo si icyaha. Umugambi w'Imana uba wihariye kuva ku rugo rumwe kugera ku rundi. Igikwiye ni uko abashakanye bashaka uko bamenya umugambi w'Imana ku buzima bwabo, naho ubundi ikibazo cyo kuringaniza urubyaro cyangwa kutaruringaniza kiri hagati yabo n'Imana yabo.

Muri Bibiriya, igihe cyose kutabasha kubyara byafatwaga nk'ikintu kitari kiza. Kandi nta na hamwe tubona muri Bibiriya umuntu waba yarigeze aha Imana ikifuzo cyo kutabyara. Ariko nanone, ukoresheje Bibiriya ntushobora guhamya ko kuboneza urubyaro ari icyaha, byaba iby'akanya gato cyangwa ibya burundu. Buri couple yagombye gushakisha ubushake bw'Imana ku byerekeye iki kibazo, kandi bakareka kugitwara muri rusange kuko ubushake bw'Imana ku bantu A singombwa ko igihe cyose busa n'ubushake bwayo ku bantu B. Ku bw'izi mpamvu, nta muntu ukwiriye gucira undi urubanza cyangwa ngo amutegeke kubyara cyangwa kutabyara.

ICYITONDERWA: Nubwo tutifuza kwinjira muri iki kibazo mu buryo bwa kiganga, abashakanye bagomba guhitamo neza uburyo bakoresha igihe biyemeje kuringaniza urubyaro. Twebwe abizera, twizera ko ubuzima bw'umuntu butangira intanga-ngabo ikimara guhura n'igi ry'umugore. Birazwi mu buryo budashidikanywaho, ko bumwe mu buryo bukoreshwa mu kuringaniza urubyaro harimo ubutangira gukora nyuma yo guhura kw'intanga-ngabo n'igi ry'umugore. Mwene ubu buryo twatanga urugero rw'ibyitwa "pillule de lendemain" n'ibindi. Abakristo ntibemerewe gukoresha mwene ubu buryo kuko bifatwa nko gukuramo inda. Igihe abashakanye bafashe umwanzuro wo kuboneza urubyaro, bagomba kwitonda bakagisha inama Abashumba babo n'abaganga.

Ikindi kibazo cyagufasha gusobanukirwa kurushaho: Ese gukuramo inda ni kimwe no kwica umuntu? Kanda hano urebe igisubizo.

Imana ibahe umugisha.

Ese ababyeyi b'Abakristo, bakora iki igihe umwana wabo ahindutse ikirara?

Thu, 06 Jul 2017 12:28:57 +0000